Va'Atəŋ 30 - Bible en Guidar1 Adan Rakel tula tat əwə sən kirin sən Yakob ɓa, kpaŋ məs kotorokək nat məlməta. Təɓsən Yakob na: «Avay uwa, an vaski ɓa, nəmtə!» 2 Yakob adək gədəv diyɗa akat Rakel, amna: «Intə a gəla Maŋgəlva məs dətakuk səza uwa sa!» 3 Təmna: «Balamək naw Bilha yakəŋkə, avoŋgəta, təwəgən aka takprawa; nərahgən muzliya səzat tamə.» 4 Təpsəntək Bilha balamək nata, ka gulku, Yakob avoŋgətəka. 5 Bilha təgəmək daway, tuwə sənək wiyin sən Yakob. 6 Rakel təmna: «Maŋgəlva ataw suwək wən nan təstəsə! Aprəm suka, avayək wiyna.» Vini təlvan na Dan (wən atawka). 7 Bilha, balamək nat Rakel, təɗiyək daway əmpa, tuwə sənək Wiyən masulan sən Yakob. 8 Rakel təmna: «Də wəgay na Maŋgəlva yi, nəgayək dət məlmuwa, in wəlat ka'ə.» Yaŋ təlvan na Neftali (wəgaya). 9 Adan Le'a tula na təziwik də uwa, təgəmət Zilpa, balamək nat təpsənət Yakob ka gulku. 10 Zilpa, balamək nat Le'a, təwək wiyin sən Yakob. 11 Le'a təmna: «Wəzaɓ aka wəzaɓa!» Yaŋ təlvan na Gad (wəzaɓa). 12 Sissiŋ Zilpa balamək nat Le'a, tuwə wiyin masulan sən Yakob 13 Le'a təmna: «Makraw avoŋguk kana! Vi kirin muguluŋgit wanahaŋ suwən na mokrok avoŋko.» Yaŋ təya na Aser (makra məvoŋgun). 14 Pay nawbəl temsele agapə, Ruben alək awra arahək mihã net zeli. Akiy sətək Le'a, mani. Rakel təpsət Le'a na: «Avay mihã na gawla an wətuk akiy əŋka.» 15 Yaŋ təpsət na: «Kəmõh su zəlwəŋ na gəs azok hara nawmõh mihã na gawla na wətuwa'e sa?» Rakel təpsət na: «Asna, Yakob dəvoŋgən azok dəpaŋ a gəla mihã na gawla na wətuko.» 16 Adan moskoy agəɗə, Yakob tay əzzan sura, Le'a təgilik ələmsəni, təmna: «Azaw kədazzoko, vi nəlbəhkuk də mihã na gawla na wətuwa.» Avoŋguk ndəndət dəfəɗ nani. 17 Maŋgəlva aprəm sətək Le'a, təgəmək daway, tuwə wiyin mesle'en sən Yakob. 18 Le'a təmna: «Maŋgəlva afaɗ suwək wəya nawa, vi nəpsənət balamək naw sən zəlwa.» Yaŋ tiya na Isakar (məfaɗ səni). 19 Le'a təɗiyək daway əmpa, tuwə wiyin mesləre'en sən Yakob. 20 Yaŋ Le'a təmna: «Maŋgəlva avayək əvəl moggoni! Yaŋkəŋna, zəluw waɗiy kiywa, vi nəwə sənək kirin mezeŋgleket sləre.» Yaŋ təlvan na Zabulon (nawgakdakani). 21 Sissiŋ tuwə waŋkə, təlvat na Dina. 22 Maŋgəlva aɗɗumuk akat Rakel, aprəmək wəkkam nata, akol sətək uwa. 23 Təɗiyək daway, ndət bok wiyna, təmna: «Maŋgəlva atoruk wil səraw kana!» 24 Təlvan na, Yosef dawnəh na: «Kəta Yawe dəvay wiyin maɓɓan əmpa!» Yakob agəɗək arya 25 Yaŋ gala Rakel tuwa Yosef, Yakob apsən Laban na: «Appaw nəmbat aka dələv anawda. 26 Apsiw gil naw dit kirtuwa, en məs nəgəɗ suk wəza aketi, nəmbatgəni. Vi kəsənək wəza an nəgəɗ suko.» 27 Laban aɓsən na: «Kəɗɗak moggon nok viwa, kəleŋ naw anah suwənək na, vikuy Yawe azaɓawa.» 28 Yaŋ amna: «Ataw su va nədawfaɗ suko, nəpsukgəni.» 29 Azlan sən amna: «Is sən kiyuk kəsənək va nəgəɗ suk wəza, va gazlaŋ nok asan avawa. 30 Vi səza nəɓəl əzzaw ɓa na, arya nok siɗikke yi, awan zən diyɗa abawa, Yawe azaɓokko. Kakaŋ naw dewe nədaɗɗa wəza sən gəla naw tam kandi?» 31 Laban amna: «Miy nədapsuk di?» Yakob amna: «Zəga tay kədawvay ɓa. An wakətaf an nədawnah suko, wanəmsaw əteɗ gəm wəge suk gilew noko. 32 Wanəbbelet gazlaŋɗe nok dəpaŋ pakə, wət time nədawrəh nzefnzefi, nzeɗeɗe, səret timeŋgiɗi, hãw nzezlezle awaniɓa nzefnzefi, ndəni wəya nawa. 33 Mazayin, pay kədazzok ula əfaɗ nawa, wakəsən na təstəs nani, an kərahək nzefnzefiy ɓa, nzezlezle yi ɓa, sə weleŋgiɗ gilewi, an kərahək səret timeŋgiɗ məza tuturɗeŋ ɓa pak, asna dəhal nəhẽlẽ.» 34 Laban amna: «Lewi yi, dəsan va kənahə.» 35 Agohik dəpaska'e, porsokɗe nzezlezle dit en nzefnzefi, gilew muguluŋgit nzefnzef dit en nzeɗeɗe pakə; timeŋgiɗ tuturɗe dit borzloŋ borzloŋ pak epsitik kirtini, 36 azergitik faraɗa, gap əvoŋ hoku aka wədaw səza Yakob. Yakob ɗew əteɗ gilew na Laban en dəppaŋgə. 37 Yakob abələk kivet wəleŋɗe: boto, teŋɗeke gəm meslekelɓe. Age'eti. 38 Aziy zleŋɗe məveret nek abet timeŋgiɗ a təki nawsa iŋkile neti; tahəŋ ərka'aŋ an azzoŋguk əsaŋ iŋkile. 39 Timeŋgiɗ nek ərka'aŋ abet zleŋɗe neki; ndəɗaŋ uwaŋ vəlõh vəlõhu, nzefnzefi, gəm nzezlezle. 40 Timeŋgiɗ məs Yakob agoh a maŋgava neki, ndən əket azet məvəlõh vəlõh neki, gəm kəlazet tuturɗe. Ndən goh əgoh gazlaŋ nan temme, awsepet dit eŋ na Laban ɓa. 41 An timeŋgiɗ dogomɗe tahəŋ ərka'aŋ pak, Yakob əndol zleŋɗe nek abet a təki nawsa iŋkile neti, vi dərka'aŋgən abet zleŋɗe neki. 42 An timeŋgiɗ nzerewɗeŋ na, awndolit abet ɓa. Timeŋgiɗ nzerewɗe na, sən Laban, dogomɗe na, na Yakob. Wəsmaɗ na Yakob səna Laban da 43 Ɗəf nani, abək də arya diyɗa diyɗa, tay dit gazlaŋɗe diyɗa, belemɗe muguluŋgit dit mezeŋgleketi, zlogomeɗ dit korɗe. |
All right reserved
Bible Society of Cameroon