Va'Atəŋ 3 - Bible en Guidar

Mərɓahani ɗəf dət ɗak sə guli na Eden ( 3:1-24 )

¹ Dohõy, məs pepet daykiyit zəgeɗ nawra, məs Yawe Maŋgəlva agəɗ pakə. Anah sət ɗak na: «Maŋgəlva dənah gesiŋ na: “kədawzəmaŋ uwa na wəlaŋga na guli net wəleŋɗeŋ ɓa sa?”»

² Guluk nak təzlan sən dohõ na: «waməɓap əzəm uwa net wəleŋɗe na guli net wəleŋɗeŋ pakə,

³ Uwa na wəlaŋga an naddak guli net wəleŋɗe hara na, Maŋgəlva amna: “Kədawzəmaŋ ɓa, kədawrəŋgənən ɓa, vi kədamtaŋ ɓa.”»

⁴ Dohõ anah sət guluk na: «Owwo, kəmtaŋ na ɓa,

⁵ Maŋgəlva asənək na pay kəzəmaŋgə, horokum wakolu, wakəssoŋ va Maŋgəlva, məsənaŋ moggon də mbərayni.»

⁶ Yaŋ guluk tula na, uwa na wəlaŋga nak moggoni nawzəma, tay lewi, nawsimi, nawsən gabba wən kpekpe'i. Ndət wətən nak ɓuh namnamə, ndət tah sən zələt a maŋgavata, ndən namnamə.

⁷ Heret sulegit pak akolko, asənənək na, zit mekeleŋgi ɗarə. Armahaŋ va sokoyo ka zana.

⁸ Yaŋ aprəmənən ɓaɓəlma Yawe Maŋgəlva, dabbalan guli moskoy təki zayə. Ɗəf dət ɗak nak aɗamaŋgək sə ma hara Yawe Maŋgəlva a weleŋgit wəleŋɗe na guliyo.

⁹ Yawe Maŋgəlva ayak ɗəf naka, apsən na: «Aŋga kənan di?»

¹⁰ Yaŋ amna: «Wəlok nəprəm a guli net wəleŋɗe, nəgeslne'i, vi zuw mekeleŋ nani, yaŋ nəɗamə.»

¹¹ Yaŋ amna: «Naway dənah suk na, zuk mekeleŋ kənani di? Kəzəmək ki wəlaŋga məs nəɗi suk wən nan kədawzəmən ɓa nak sa?»

¹² Ɗəf, amna: «Ɗak məs kəvay nakə, ndəttə təpsu uwa na wəlaŋga van nəzəma.»

¹³ Yaŋ Yawe Maŋgəlva anah sət ɗak nakə: «Miy kəgəɗəŋ di?» Təmna: «Dohõy dəmbəɗawa yaŋ nəzəma.»

¹⁴ Yawe Maŋgəlva anah sən dohõ: «Adan kəɗɗa vaska, wakəray sə weleŋgit zəgeɗ memeyẽɗ dit mokrokeɗ nawra pakə; də gədəvuk kədawdaw ənziya nok pakə burɗuk kədawzəm pay ənziya nok egge pakə.

¹⁵ Wanəɗiy əseɓ a waloŋguk dət ɗakə, a weleŋgit kirtuk dit kirtita. Waklopnən kiyko, wakəbəl motokpotokpo tilti.»

¹⁶ Anah sətək ɗak na: «Wanətatwahãn əssa na daway noko, wakəzəm sahã də uwa kirtuko. Mok wanzan aka zəlko, wazəm məlĩ akoko.»

¹⁷ Anah sən ɗəf na: «Adan kəprəm mat ɗak noko, kəzəm uwa na wəlaŋga məs nəɗi suk wən nan dawtakuk maw taŋtaŋ kədawzəmən ɓa, kakaŋ na, dələv waray aka batamko. Də tatwãh diyɗa, kədawzəmgən kiyuk pay ənziya egge nok pakə;

¹⁸ Dələv wagilgit gedirgeɗ dit nzewɗe, gaslamba nawra ɗar kədawzəma.

¹⁹ Way nok na, də hanza na mirbizuk kədawrəhni, gap əmnda nok ammba burɗuk na dəlvafuŋ, məs kəgil səddəvni, səka burɗuk məgəmko, aka burɗuk kədamndoko.»

²⁰ Ɗəf nak alvat ɗak nan na, Hawwa, va-ənəh-na Madarata, vi ndəttə met ɗiy mederet pakə.

²¹ Yawe Maŋgəlva agəɗ sitik lukutɗe məgbəŋtəŋɗe na gəba sit may Adam dət ɗak nani, agul siti.

²² Yawe Maŋgəlva anahə: «Yaŋ na ɗəf titir tay va taka səramə, də wəsən nawɗakan moggon də mbərayini. Kakaŋ na adawtəl van əɓuh uwa na wəlaŋga na zeŋgile, ndən kawzəmən kawsan faɗ ɓa!»

²³ Yawe Maŋgəlva arɓahanək ɗəf nak sə guli net wəleŋɗe na Eden, vi dəmbatgən inse dəlvafuŋ məs egil səddəvnəŋka.

²⁴ Adan arɓahan ɗəf naka, ndən sek əziy kerubaɗe kəlammba pay nampum na guli net wəleŋɗe na Eden, dəganəngən tive na wəlaŋga na zeŋgile, də masalam avet adaɓlanən əwiɗ kwitikwiti.