Va'Atəŋ 29 - Bible en Guidar

Yakob aləmək dət Rakel

¹ Yakob armak tive nawmbat aka dələv net ɗiy nammba pay nampum.

² Haran sek na, vov net iŋkile yaŋ awra. Gazlaŋɗe net gilew tahəŋ hoku adaka, ɗufɗuf a maŋgavani, vi sədaki zəgeɗ adawsaŋ iŋkile. Ya kalaɓ metiŋgin məmpan amani.

³ Pay gilew akkalaŋ pak adaka, daski adawkəɗəŋgəlnən kalaɓ səma vov net iŋkile nak kapsitin gilewi. Asna kamsak əmpan kalaɓ a gəlani.

⁴ Yakob assohẽt məzuteɗeŋge na: «Milmiŋgiɗwa, səŋga kənanən di?» Aɓɗaŋ na: «Sə Haran mənani.»

⁵ Aɓsit na: «Kəsənənək Laban, wətən Nahor sa?» Aɓɗaŋ na: «Məsənka.»

⁶ Aɓsit na: «Tay lewlew sa?» Aɓɗaŋ na: «Lewlewi yi, wətən akən Rakel yakəŋ əzzat dit gilew nata.»

⁷ Yaŋ Amna: «Mula! Pay a disiŋgi; pay nakkelet zəgeɗi ɓa. Məpsit iŋkile sit gilewi, məke dəzəmaŋgə.»

⁸ Azlan sənən na: «An gilew dəkkalaŋ gərak ɓa na, məɓap na əkol ma vov net iŋkile, kapsit dəsaŋgən ɓa.»

⁹ Dəɓəl əgrak əpel ndənɗaŋ ɓa, Rakel gap dit gilew na afəta, vi məzutaɗaŋgəktə.

¹⁰ Səza Yakob awlət Rakel, wətən Laban gəmsəni, dit gilew na Laban gəmsəni, ambat akəɗəŋgəl kalaɓ səma vov net iŋkile naka, apsitik iŋkile sit gilew na Laban, gəmsəni.

¹¹ Yakob allamtək Rakel a makrani, ndən həmhəmə.

¹² Yakob aprəman sətək Rakel na, məlmaŋ də afəta, wətət Rebeka yi. Tənzatək ənah sən afəta.

¹³ Adan Laban aprəm wən na Yakob, wətət məlməni, anzanək ələmsən ləŋgə. Ndən kərəm ərman lalam, mah əkiyən ananda; Yakob aboton sənək an dəgəɗ təɗe'i.

¹⁴ Laban aɓsən na: «gesiŋ slesleŋ səzet slesleŋɗe nawa, mbel səza gəɓa zu kənani.» Yakob asanək ananda gap təla dəndəni.

Wətəp gil na Yakob

¹⁵ Laban aɓsən Yakob na: «Vi məlmu kənan dayday na, adahək kan kəgəɗ sugən wəza na makaryam sa? Anah su va nədawfaɗ suko.»

¹⁶ Ya Laban tay dit kirin muguluŋgit sula, akən daya dawyətən na Le'a, akən sawã tamna, Rakel.

¹⁷ Le'a birndiffe tə, Rakel, nat ŋgbat ləɗəɗətə aza ula.

¹⁸ Yakob aŋglutək Rakel, amna: «Wanəgəɗ suk wəza wəzva buhul akat Rakel, wətuk akən sawã.»

¹⁹ Laban azlan sən na: «Dəɗah əpsukət, ki əpsənət ɗəf ɗarə; asok də iyna.»

²⁰ Yakob agəɗək wəza wəzva buhul akat Rakel, ndən ulan na, əvoŋ siɗikke agəɗə, vi aŋglutəka.

²¹ Yaŋ Yakob anah sən Laban: «Apsuwət ɗak nawa. Vi əvoŋ naw aknahka, nəvoŋ dəndəta.»

²² Laban akkeletik ɗiy na walaŋgəlas pakə, adə sit waynabaya.

²³ Adan moskoy agəɗə, Laban agəmət Le'a wətəni, akət sənət Yakob, avoŋ dəndəta.

²⁴ Laban agəmət balamək nan Zilpa, apsətət ka balamək nat Le'a, wətəni.

²⁵ Təki addaŋ na, mbara Le'a tə! Yaŋ Yakob anah sən Laban: «Miy kəgəɗ suwəŋ di? Akat Rakel nəgəɗ suk wəza ɓa sa? Vimi kəmbəɗaw di?»

²⁶ Laban apsən na: «Məssərək əkət akən sawã ammba zil daabəŋ kiyət daya anamda ɓa.

²⁷ Agrak lumu taka dət akəŋkə, kapsukut maɓɓat vat, an kəgəɗək wəza wəzva buhul əmpa.»

²⁸ Vaski Yakob agəɗə. Agrakək lumu taka dət Le'a, Laban apsənət Rakel, wətən, ka goni.

²⁹ Laban apsəttək balamək nan Bilha, sət Rakel ka balamək nata.

³⁰ Yakob, avoŋguk dət Rakel anat aŋgəl daykiyit Le'a: agəɗ sənək wəza sən Laban, wəzva buhul əmpa.

Kirtin Yakob

³¹ Adan Yawe awla na, məzelti Le'a, akol sətək uwa, nat Rakel, ɗew ndarzlaykə.

³² Le'a təgəmək daway, bok wiyna, təlvan na Ruben: «Vi təmna Yawe awlak əzəmsahã nawa vi kakaŋ na, zəluw waŋgluwu kana.»

³³ Təɗiyək daway əmpa, bok wiyina, təmna: «Ha'aw, Yawe aprəmək na, məzelwi yi, apsuw aŋkəŋ tamə», yaŋ təlvan na Simeyon.

³⁴ Təɗiyək daway əmpa, ndət bok wiyna, təmna: «Kakaŋ kan na, wabay zən azawa, adan nəwə sən kirin mezeŋgleket hoku»; vini məlvan na Levi.

³⁵ Təɗiyək daway əmpa, bok wiyna, təmna: «Aŋ na, wanəɗiy ki Yawe!» Vini tiya na Yuda. Ndət ziw də uwa kana.