Va'Atəŋ 26 - Bible en Guidar

Isak də Abimelek

¹ May agəɗək aka dəlva, temme də an dəgəɗ aka pay na Abraham. Isak ambatək a Gerar, ana Abimelek, məlĩ net mə Filistiɗe da.

² Yawe arbanək zən azani, aɓsən na: «Kəprik a Eziptə ɓa, asok aka dələv məs nədarbə suko.

³ Asok aka dələv nani, wanəsaw də isi, wanəzaɓoko. Suko, gəm sən mazlalwõk nədapsukum dəlveŋgeŋki, wanəzban əsway naw nəsway sən Abraham afukəŋka.

⁴ Wanuwan zeŋvuk va gərzleɗ na disiŋ, wanəpsin dəlveŋgəŋ pakə, səzani ɗiy naka dələv pak adawrahaŋ əzaɓa,

⁵ vi Abraham aprəmək mawa, armak an nəɗi sən naɗɗa, əpel na ənziya nawa, wəzga' nawa, də mahenziŋ nawa.»

⁶ Isak asanək a Gerar də gəla.

⁷ Ɗiy nadak assohõnən aka wən nat ɗak nani. Azlan sit na, «Məlmuwtə». Ageslne'ik dawnəh na, ɗak nantə, vi ɗiy nadak adawbaynən aka wən nat Rebeka vi lalawəktə aza ula.

⁸ Agəɗək əvoŋ diyɗa adaka. Yaŋ Abimelek, məlĩ net mə Filistiɗe dawla kəla təkifoŋgo məppan naza gəla na, awla Isak tay əsmay dət guluk nan Rebeka.

⁹ Abimelek ayak Isak, aɓsən na: «Sessel guluk noktə! Vimi kənah na: “Məlmuwtə di?”» Yaŋ Isak azlan sən na: «Nənah vasna, vi geslne dəduwa, azaw na, kawbaywi yi ammbata.»

¹⁰ Abimelek anah sən əmpa: «Miy kəgəɗ səməŋka! Siɗikke ɓa na kəta ɗəf maɓɓan wavoŋgət guluk noko, is kakkpaŋgan wəray nan akam kəta.»

¹¹ Abimelek aɗi wən nan sit ɗiy dəwən neti: «Ɗəf an dərəŋgən ɗəfəŋ dət goni, kawbayni yi.»

¹² Isak azləgək aka dələvəska, arahək zəga na mabardaw əzva nan ndoɗoɗ ndoɗoɗu. Yawe aɗɗak əzaɓ akani,

¹³ Yaŋ akkpaŋ ɗəf metiŋgini; tay əmbat abe abe, hã ndən kpaŋ məsarya diyɗa.

¹⁴ Akkpaŋgək afit gazlaŋɗe net wasliɗe, net gəlew dit timeŋgiɗi gəm məɗɗaŋ wəza eŋgil diyɗa. Mə Filistiɗe aɗɗaŋgək kotorok nani,

Isak aɗiyək wənmiyna də Abimelek

¹⁵ andəktinik vovɗe net iŋkile məs gewleɗ na Abraham afən, aso'oŋ gala asan daran pakə, mə Filistiɗe aknihinik də dələv səɗal səɗalə.

¹⁶ Abimelek anah sən Isak na: «Dok səzam, vi kəkkpaŋgək məzuɓap diyɗa day kiymə.»

¹⁷ Isak ambatək sədak ama məlpa na Gerar, asan də gəla adaka.

¹⁸ Isak aso'etik vovɗe məso'it gala afən asan, məs mə Filistiɗe andəkaŋ dərɓaga əmta na abraham naka. Ayek də iya va afən alvet lahəŋka.

¹⁹ Gewleɗ na Isak aso'inik a məlpa, yaŋ arahaŋ vov net iŋkile məzva.

²⁰ Məzuteɗeŋɗe na Gerar aŋgarzlahaŋgək dit məzuteɗeŋɗe na Isak, tahəŋ ənahaŋ sitin na: «Iŋkəleŋ naməŋgə.» Aya vov net iŋkile vanəs na, wəŋgarzlahã, vi aŋgarzlahaŋgək dəndəni.

²¹ Aso'oŋguk vov net iŋkile maɓɓan, məseɓi akani'e; ayak na Sitna «Wəseɓe.»

²² Yaŋ azar sədaka, aso' vov maɓɓan məgarzlãhĩ akan ɓa, aya na, Rehobot «Təki məwəl sahã» dawnəh na: «Kakaŋ na Yawe appan səmək təki dəmani, wamərah zəga səka dələv vani.»

²³ Sədak ambat a Ber-Seba.

²⁴ Yawe arbanək zən azan dəfəɗ nani, aɓsən na: «Intə Maŋgəlva na afuk Abraham; kəgeslne' ɓa, vi in tat də isi. Wanəzaɓoko, wanuwan zeŋvuk diyɗa ammba məgəɗ wəza naw Abraham.»

²⁵ Yaŋ arkək təki nawzaɓ-Maŋgəlva adaka, akkaman Yawe də iya nani. Aherik gizlirke nan adaka, gewleɗ na Isak aso'oŋguk vov net iŋkile adaka.

²⁶ Abimelek alək sə Gerar də baynan Ahuzat gəm Pikol daya nalpa nani.

²⁷ Isak aɓsit na: «Vimi kəzzoŋ azaw di? Mənokum tat əzelewa, kərɓahawənək sənokum da.»

²⁸ Aɓɗaŋ na: «Ula mula Yawe tay də isi, yaŋ mənah na: Əsway dəsan aka walaŋgəm də isi; məɗi səm wənmiyna aka walaŋgəm də isi!

²⁹ Asway səm na kəgəɗ səm na mbərayən ɓa, nam pak mərəŋguk na ɓa, adan moggon kaka' məgəɗ suko, məppok əmbat məzəzayko, is məs kakaŋ Yawe azaɓokəŋka.»

³⁰ Agəɗ sitik waynabaya; azəmaŋka, asaŋka,

³¹ alvəɗaŋ pumu, aswayaŋ aza ziti. Isak ataw sit tive, appanənək də zazaya.

³² Dəpas vani, gewleɗ na Isak azzoŋ ənahaŋ sənən wən na vov net iŋkile aso'oŋgu. Aɓsənən na: «Mərihik iŋkile.»

³³ Aya vov van na Sibe'a; vini yi, walaŋgəla van adawyanən na Ber-Seba, hã dəpaŋka'e, va wənəh na vov net iŋkile na Əswaya.

Əɗi guluk na Esaw

³⁴ Esaw tay də wəzva kaklaw poɗo, agim gil mə Hittiɗe sula, may: Yehudit, wətən Be'eri gəm Basmat, wətən Elon.

³⁵ Zəga naɗɗa net adannək gidivit may Isak dət Rebeka.