Va'Atəŋ 23 - Bible en Guidar

Abraham albahək təki na magamas nat Sara

¹ Sara təgəɗək wəzva səkat də kaklaw sula kiyən buhulu.

² Sara təmtək aka dələv na Kana'an a Kiryat-Arba, awaniɓa Hebron. Abraham adek əɗɗa gəlabayət Sara, də wəhəmta.

³ Abraham asilik səza ki gəbayta, ambat ənah sit kirtin Het amna:

⁴ «Nəsaw də munokuməŋ na, va molhõyõ gəm məzgəlokum nani. Məvay təki anokumda aŋ nawndəkət ɗak naw sə maharawa.»

⁵ Kirtin Het azlan sənən Abraham də wənahaŋ na:

⁶ «Aprəm səmə daya nawa. Maŋgəlva aɗiykuk ka ɗəf metiŋ a walaŋgəm aŋka, andəkət ɗak nok addəv magamas moggon səret magamasɗe namə. Ɗəf tay təttaka səram dədawtakuk səka magamas nan dawndəkət ɗak nok ɓa.»

⁷ Abraham asilike, kagduk abet kirtin Het, ɗiy naka dələvəska.

⁸ Apel sit dawnəh na: «An gesiŋgi yi, gəbayək naw watə sat addəv magamas nokumu, asna məprəm suwa, məkkaman su Efron wətən Sohar,

⁹ dəpsugən magamas na Makpela, a metteɓ ma guli nani. Dəpsugən va wəlbəh nan də təbəz babar adawsan təstəsə, dəsangən ka təki naw nawndik ɗiy naw a walaŋkum aŋka.»

¹⁰ Efron tay ɗewwe a weleŋgit kirtin Het; Efron, mə Hitti, azlan sən Abraham deret kirtin Het pakə, vasna deret en məzəzzoŋ a mahara walaŋgəla-metiŋ nan pakə, amna:

¹¹ «Vaski ɓa, ɗəf daya nawa, aprəm suwa: deret kirtit ɗiy naw pakə! Guli zəknani, nəpsukko! Bətəŋ naddəvən, nəpsukko. Andəkət gəbayək noko.»

¹² Abraham agdukuk abet ɗiy naka dələv vani

¹³ anah sən Efron deret ɗiy naka dəlvəs na: «Aw, va wakəprəm su kəta na! Ataf, nəpsuk təbəz babar va wəlbəh na guli van asani! Vasna adak nədawndəkət gəbayək nawa.»

¹⁴ Efron azlan sən Abraham apsən na:

¹⁵ «Ɗəf daya nawa, aprəmwa. Təki nalbəh koɓeɗ na təbəz babar səkat poɗo kaka'əŋ, miy eskiŋ aka walaŋgəm də is di? Andəkət gəbayək noko!»

¹⁶ Abraham aslerik də Efron. Abraham asla sənək əlbah nan va anah abet kirtin Het, koɓeɗ na təbəz babar səkat poɗo, va lumu adawzəma.

¹⁷ Guli na Efron na Makpela aba Mamre, guli də bətəŋ sap pakə, dit wəleŋɗe naddəv guliyo, dit en naket meŋge nan sulək pakə,

¹⁸ na Abraham iyi kana, deret kirtin Het, dit ɗiy en məzəzzoŋ a mahara walaŋgəla-metiŋ nani.

¹⁹ Dərɓaga asna, Abraham andəktək guluk nan Sara a bətəŋ naddəv guli a Makpela, aba Mamre; Hebron aka va na Kana'an.

²⁰ Kirtin Het aziwgənənək wən na guli də bətəŋ naddəvən na, na Abraham iyi.