Va'Atəŋ 21 - Bible en Guidar

Uwa na Isak

¹ Yawe aɗɗumuk akat Sara va anahə, Yawe aɗɗa sətək Sara va aynan sət wən nani.

² Sara təgəmək daway, tuwə wiyin sən Abraham səka wəgal nata, də pay an Maŋgəlva anah sət lahəŋ naka.

³ Abraham alvanək wiyin məs Sara tuwə sən nak na Isak.

⁴ Aka wəvoŋ dodopoɗo Abraham askəl Isak awra va Maŋgəlva aɗi sən wən naka.

⁵ Wəzva na Abraham səkati gala muwa Isak wətəni.

⁶ Sara təmna: «Maŋgəlva agəɗ suwək zəga nawmasa! Ɗəf dəprəm pak wamas akawa.»

⁷ Yaŋ təmnah: «Naway nawnah sən Abraham lahəŋ na Sara watəweɗgit kirni di? Yaŋ nəwə sənək wiyin aka əgal nani!»

Abraham arɓahatək Hagar də Ismayel

⁸ Wiyin aɓayka, məvokni səmet bide. Abraham agəɗək wəzləra də waynabaya metiŋgin pay məvok Isak səmet bide.

⁹ Yaŋ Sara tula wətət Hagar mə Eziptək tuwə sən Abraham əŋ əsmayã.

¹⁰ Tənah sən Abraham na: «Arɓəhət balamək kəŋ də wətəta, vi wətət balamək azəm na gəla də wətu Isak ɓa.»

¹¹ Wənəs mbərayni diyɗa aza Abraham, aka wən na wətənənka.

¹² Yaŋ Maŋgəlva anah sən Abraham na: «Kədawla wənnəŋ va mbərayən azok aka batam wiyin dət balamək nok ɓa. Aprəm məs Sara tədawnah suk pakə, vi də Isak kədawɗi zeŋvuko.

¹³ Ya an dəwəl sən wətət balamək na, wanəɗɗa dəsangən vanday, vi zeŋvuki ye'e.»

¹⁴ Abraham asilik də mompummo pumu, agəmək peŋ də kwenekwene net iŋkile apsət Hagar. Alap sət wiyin awlata, yaŋ appat tələ. Təmbat slorslor a kapta-muyã na Ber-Seba.

¹⁵ Adan iŋkile naddəv kwenekwene agrakaŋgə, təzgan wiyin ammba gaslamba.

¹⁶ Təmbat əsat ɓuhu, gap nawhon hara. Vi tat ənəh na: «Nədawla əmta na wiynəŋ ɓa!» Təslan wəlat təhəmə.

¹⁷ Maŋgəlva aprəmək wəla wiyna, maslay na Maŋgəlva ayət Hagar sə disiŋ. Apsət na: «Miy dərəhuk di Hagar? Kəgeslne' ɓa, vi Maŋgəlva aprəmək wəla wiyin sə təki asani.

¹⁸ Asili! Asok zuk arma va wiyən ɓəlɓələ, vi wanəkkpaŋgan ka ɗiy diyɗa.»

¹⁹ Yaŋ Maŋgəlva akol harata, tula vov net iŋkile. Təmbat təknəh kwenekwene naka, təpsən wiyna.

²⁰ Maŋgəlva asanək də wiyin naka, aɓayə, asan a kapta-muyã də gəla. Mətəvəla yi;

²¹ asan a kapta-muyã na Paran, man təkay sən guluk səka dələv na Eziptə.

Wənmiyna na Abraham də Abimelek

²² Pay nanəska, Abimelek poh də Pikol, daya net məzəlpaŋ nani, anah sən Abraham na: «Maŋgəlva tay də is addəv zəga kədaɗɗa pakə.

²³ Asway su də Maŋgəlva aŋ kakaŋkəŋka, kəzəm na kiyu ɓa, kiyit kirtu də zeŋvu ɓa: Va moggon nəgəɗ suk aka dələv kəsok molhõyõ akanəŋka.»

²⁴ Abraham aɓsən na: «suwayə.»

²⁵ Abraham akak dolgoy aba Abimelek, aka wən na vov net iŋkile məs belemɗe nan amõhoŋgu.

²⁶ Abimelek, amna: «Nəsən ɗəf dəɗɗa zəgas ɓa; kənah su ɓa, in sən kiyu nəprəm ɗah an dəpaŋki ɓa ɓa.»

²⁷ Abraham agəmək gilew dit wasliɗe epsin Abimelek, ndəɗaŋ sulegit pak aɗiyaŋ wənmiyna.

²⁸ Abraham awelik kirit timeŋgiɗ muguluŋgit buhul temme.

²⁹ Abimelek anah sən Abraham na: «Kirit timeŋgiɗ kuwel buhuliŋ naɗɗa miy di?»

³⁰ Azlan sən na: «Atef timeŋgiɗ buhul səvawiŋki, dəssoŋgən ka narban na, intə nəso' vov net iŋkəleŋka.»

³¹ Ndəni miya təki nan na Ber-Seba, vi adaki aswayaŋ sulegiti.

³² Aɗiyaŋgək wənmiyna net a Ber-Seba. Abimelek asilik də Pikol daya net məzəlpaŋ nani, amndon aka dələv net mə Filistiɗe.

³³ Ampək wəlaŋga adawyaŋ na Esel a Ber-Seba adak akkaman Yawe Maŋgəlva an faɗ də iya nani.

³⁴ Abraham aliyək aka dələv net mə Filistiɗe diyɗa.