Va'Atəŋ 20 - Bible en Guidar

Abraham də Abimelek

¹ Sədak na, Abraham ambatək aka va na Negev. Asan də gəla aka walaŋ Kades də Sur, siske na ndən pay ənziya siɗikke a Gerar.

² Abraham anah akat Sara ɗak nan na: «Məlmuwtə», yaŋ Abimelek, məlĩ na Gerar, agəmta.

³ Yaŋ Maŋgəlva ade aka Abimelek addəv issine də dəfɗa, aɓsən na: «Wakəmtə aka batamət ɗak kəgəm kəŋkə, vi də zələttə.»

⁴ Abimelek dəzar azat tagay ɓa, yaŋ amna: «Yawe! Wakəzet ɗiy metiŋ-metiŋ vaŋ də an təstəsəŋ dayday sa?

⁵ Ndəni dənah su na: “Məlmuwtə ɓa sa”? Nat pak tənahək na: “Məlmuwi yi.” Də makraw bartata nəɗɗa wən nani, vaw salala yi addəv wən nani.»

⁶ Yaŋ Maŋgəlva azlan sən addəv issine na: «Naw pak nəsənək na, də mokrok bartata yi kəɗɗa, naw intə nətakuk dəɗɗa mambray akawa; sən wən nani nəpəlsuk tive nawrəŋgət ɓa.

⁷ Amndagat sənət ga ɗəfəŋ kakaŋka, vi məskəleŋgi yi wakkam ammbok kəmbəlgəni. Ya an kəmndagat ɓa, asən na, wakəmtə is dit ɗiy nok pakə.»

⁸ Abimelek alvəɗka, ayek gewleɗ nan pakə, anah sit wən nan pakə, ɗiy nek ageslne'eŋgik diyɗa.

⁹ Yaŋ Abimelek aya Abraham, apsən na: «Miy kəgəɗ səməŋ di! Mambray miy nəgəɗ suk nawkiy mambray metiŋgin akaw də dələv naw di? Zəga an naɗɗay ɓa kəgəɗ suwa.»

¹⁰ Abimelek anah sən Abraham əmpa na: «Miy kəwəl kəɗɗa zəga vaŋkəŋ di?»

¹¹ Abraham amna: «Naw azawna: “Geslne na Maŋgəlva tay ahəŋ siɗikke dayday ɓa yi, kawbaywiy ammbat guluk nawa.”

¹² Gesiŋ nan na, məlmu wətən əbbatə, wətət əmmatə ɓa hara, yaŋ nəgəmət ka guluk nawa.

¹³ Adan Maŋgəlva agilgu səna afu da, nənah sət na: “Moggon nok yaŋ an kədagəɗ su a təki məmbat pakə, anah na: məlmuwiyi.”»

¹⁴ Abimelek agəmək gilew dit wasliɗe, belemɗe mezeŋgleket dit muguluŋgiti epsin Abraham, amilgət sənət Sara guluk nani,

¹⁵ Abimelek amna: «Dələv naw yaŋ aboko, asok akkiy mokrok aŋgəl pakə.»

¹⁶ Yaŋ anah sət Sara na: «Awle, in tat əpsən təbəz babar gabal sən məlmuko, wasan ka zəga narban azet geleŋgiɗuk dit meggeŋgiɗuk na, bartata kənani.»

¹⁷ Abraham akkamanək Maŋgəlva, Maŋgəlva anzaɗək Abimelek, guluk nan dit belemɗe muguluŋgit nan pak, awaŋka.

¹⁸ Vi Yawe akkpeŋgetik gil na Abimelek pak ndarzlayɗe, aka batamət Sara, ga Abraham.