Va'Atəŋ 2 - Bible en Guidar

¹ Disiŋ, dələvafuŋ aɗɗaŋgək pak gərak dit zəgeɗ naddiviti.

² Adan Maŋgəlva agrak wəza nani, affetik aka pay mabuhulon səka wəza nan məs agəɗ pakə.

³ Maŋgəlva aɗɗak əzaɓ aka pay mabuhuloni, aɗiyək ka nan vi aziwginək wəza nawzəməɗ zəga nan pakə.

⁴ Vaski wətəŋ na disiŋ də dəlvafuŋ gala wəzəməɗ neti. Pay Yawe Maŋgəlva azəməɗ dəlvafuŋ də disiŋ,

Guli net wəleŋɗe na Eden

⁵ gaslamba nawra tay təttaka aka dələv dayday ɓa, kevile nawra tay dəgil ɓa'a, vi Yawe Maŋgəlva dəɓəl əziy buwən aka dəlvafuŋ tagay ɓa, gəm ɗəf tay nanse dəlvafuŋ ɓa.

⁶ Iŋkile dədantəsaŋ səfuŋ əlɓan dəlvafuŋ kaka'ə.

⁷ Yawe Maŋgəlva aɗɗak ɗəf titir də burɗuk səka dəlvafuŋ. Sissiŋ Afu' sən əmpəs na zeŋgile a məŋkənni, ɗəf titir nak kpaŋ ɗəf də zeŋgilen madarani.

⁸ Yawe Maŋgəlva aɗiyək guli net wəleŋɗe aka dələv na Eden, dəmmba pay nampummo, aɗiyək ɗəf an arkə nak adaka.

⁹ Yawe Maŋgəlva agilginək wəlaŋga səka dəlvafuŋ, də wəlaŋ zən nawsime, moggon ara ɗəfa, moggon nawzəma, wəlaŋga na zeŋgile addak guli net wəleŋɗe, gəm wəlaŋga nawsən əgo'on moggon də mbərayən.

¹⁰ Məlpa guzlo dəgil səka dələv na Eden kalɓan guli net wəleŋɗe vani. Sədak awizlirihen zən poɗo.

¹¹ Kiyvan taka iya nan na, Pison: ndəni dətərwəsl dələv na Hawila, məs meleŋge asan adaka

¹² meleŋge naka dələv nan moggoni sawɓa vaski yi'e timbe məs məŋgənən nek məslahan də bədola gəm zev gərəm na sləma pepreŋ witwiti.

¹³ Məlpa masula'a, iya nan na, Gihon, ndən dətərwəsl dələv na Etiyopi baymani.

¹⁴ Məlpa mahoko'o, dawyanən na, Hidekel, dəmmba pay nampummo na walaŋgəla-metiŋ na Asiri adawmbata. Məlpa mapoɗo'o, ndəni Efrat.

¹⁵ Yawe Maŋgəlva agəmək ɗəf naka, aɗiyək addəv guli net wəleŋɗe na Eden, dinsegəni, gəm dəgagəni.

¹⁶ Yawe Maŋgəlva, aɗiyək wən nan sən ɗəf dawnəh na: «Wakəɓap əzəm wəleŋɗe na guli net wəleŋɗeŋ pakə,

¹⁷ ya wəlaŋga an nawsən əgo'on moggon də mbərayən hara na, kədawzəmən ɓa, vi pay kəzəmə, əmta kədamta.»

¹⁸ Yawe Maŋgəlva anahə: «Lewi yi ka ɗəf titir dəsangən takərgən ɓa. Wanəgəɗ sən məbbahaŋgək təsatgən mədaha nani.»

¹⁹ Yawe Maŋgəlva də dələv azəmiɗ zev zəgeɗ nawra, zev bəŋga na disiŋgi, akiy aza ɗəf titire, kawlan va mbar adalvet di. Va ɗəf adalvan «zəga madaranəŋ» pak, vaski iya nan adawsani.

²⁰ Ɗəf titir alvetik zəgeɗ memeyẽɗ pakə, bəŋga na disiŋ va asani, zəgeɗ nawra va assoŋgu, sən kiyən kan na, dərah məbbahaŋgək mədaha nan ɓa.

²¹ Yawe Maŋgəlva akiy sin aka ɗəf naka, aleŋgənək həddəkə. Ndən səret hembehen taka gəmə, ndən slu sərət a gəlani.

²² Yawe Maŋgəlva, azəməɗət guluk də hembehe məs agəm səza ɗəf naka, akiysənta.

²³ Ɗəf amna: «Kakaŋki mbel zuwa, sleŋsleŋ səzet sleŋsleŋɗe nawa, gəɓa səza gəɓa zuwa, kawyətiy na, ɗakə, vi səza ɗəf məgəmta.»

²⁴ Vi vaski, ɗəf mizilin wappan afən dət mani kawsap azat goni, wakkpaŋgaŋ gəɓa zit taka.

²⁵ Ɗəf mizilin dət guluk nan sulegiti assoŋguk zit mekeleŋ, məza əɗɗa wil sən zit ɓa.