Va'Atəŋ 15 - Bible en Guidar

Wənmiyna na Maŋgəlva də Abram

¹ Dərɓaga wənəska, Yawe apel sənək Abram addəv ula. Amna: «Kəgeslne' ɓa Abram, intə baray noko, wərəh ammba an kəgəɗ wasan diyɗa ndoɗoɗ-ndoɗoɗu.»

² Abram azlan səni: «Yawe Maŋgəlva, miy kədawvay di? In tat əmbat məza uwa naw ɓa, məzəmgəla naw na, Eli'ezer na Damas iyi.»

³ Abram amna: «Yaŋ kəvay zeŋvu ɓa, taka səret məɗɗaŋ wəza nawi yi nawzəmgəla nawa.»

⁴ Əpel na Yawe yaŋ azan dawnəh na: «Ndəni nawzəmgəla nok ɓa, ɗəf an dəgil səddəvuk tusso dədawzəm gəla noko.»

⁵ Agilginək səŋgili, apsən na: «Asəŋgləkan disiŋ, aŋɗet ŋgərzleɗi, an wakəɓap wəŋɗeti.» Sissiŋ aɓsən na: «Zeŋvuk vas adawsani.»

⁶ Abram atafək Yawe, sən aski Yawe aɗi ka ɗəf təstəsə.

⁷ Anah sən na: «Intə Yawe, məs dəgilguk sə Ur net mə Kaldiyeɗi, vi kapsuk dəlvəŋ ka noko.»

⁸ Azlan sənək: «Yawe Maŋgəlva, aza miy nədawsənən na, wasan ka nawa di?»

⁹ Anah sən əmpa: «Akay su bəlatək na wəzva hoku, hãw na wəzva hoku, ndargayã na wəzva hoku, mukuɗuŋgulok taka, gəm wətət bəŋgək na maha taka.»

¹⁰ Abram apsənək zəgeɗ memeyẽɗis pakə, arsletik sek sula sek sula, aɗi an mərslan pak, haran aka mbərən seki; biŋgeɗiŋ məs dərah wərslet ɓa kaka'ə.

¹¹ Mogdokɗe ziriv aket zəgeɗ neki, Abram rəɓə ərɓeheti.

¹² Aza pay ətəpa na, sin armanənək Abram toɗoɗ toɗoɗu. Geslne də guzli titir agulnənka.

¹³ Anah sən Abram na: «Asən lewlewi, zeŋvuk wasan aka guwa. Kawɗiyti yi ka belemɗe, waɗɗaŋ sitin wəza gap wəzva səkat poɗo.

¹⁴ Wanətaw wən net ɗiy en aɗɗaŋ sitin wəza vani, sədərɓagan na, wagilyoŋ də arya sədak kənaykənayə.

¹⁵ Isi, addəv zazay kədamta əzbet migilko, sədərɓaga əgal nok moggon adawndəkkuni.

¹⁶ Aka sayit kirtuk məpoɗoti, wamndoŋ aŋka, vi mambray net mə Amorɗe dəknah ɓa hã kakaŋka.»

¹⁷ Pay atəpka, movoro məs enene yaŋ ara guzliyo, offo məzulorro atoŋguk pəɗak net zəgeɗ memeyẽɗi.

¹⁸ Pay nan dəpaska, Yawe aɗiyik wənmiyna də Abram vaŋka: «Sən mazlalwõki nədapsən dəlvəŋka, təŋ sə məlpa na Eziptə hã gap Efrat, məlpa metiŋgini

¹⁹ mə Kenɗe, mə Kenizziɗe, mə Kadmoniɗe,

²⁰ mə Hittiɗe, mə Perziɗe, mə Rafayɗe,

²¹ mə Amorɗe, mə Kana'anɗe, mə Girgasɗe gəm mə Yebusɗe.»