Va'Atəŋ 12 - Bible en Guidar

Dəha məkuturkutur: Abraham, Isak, Yakob ( 12:1—35:29 ) Maŋgəlva tay əya Abram dəzargən səka dələv nani

¹ Yawe aɓsən Abram na: «Dok səka dələv noko, səret ɗiy noko, səŋgil ana afukda, dəka dələv məs nədarban suko.

² Wanəkkpaŋgok ka ɗiy diyɗa, wanəɗɗa əzaɓ akoko. Wanəkkpaŋgan iya nok metiŋgini. Akəsok ka əzaɓ net ɗiy mbirti.

³ Wanəɗɗa əzaɓ aket ɗiy en dədawzaɓokuni, wanəreygit en dədawraygukuni; ɗiy nammba dələv pak, warahaŋ əzaɓ ammboko.»

⁴ Abram ambatək va Yawe anah səni, Lot ambatək dəndəni. Wəzva na Abram agəɗək kaklaw buhul kiyən sle', gala asil sə Haran.

⁵ Abram agəmtək Saray ɗak nani, Lot wətən məlməni, arya an arah pak dit belemɗe en albah sə Haran. Addoŋguk aka dələv na Kana'an. Agapaŋgək aka dələv na Kana'an.

Abram aka dələv na Kana'an gəm a Eziptə

⁶ Abram aggarək ki dələv van hã gap a təki adawyaŋ na Sikem, hã gap aza wəlaŋga adawyaŋ na Elon na More. Mə Kana'anɗeŋ aka dələv vani.

⁷ Yawe arbanək zən aza Abram, amna: «Sən mazlalwõkiy nədapsən dəlvəŋka»; adak arkə təki nawzaɓ-Maŋgəlva sən Yawe dərban zən azanəŋka.

⁸ Sədak ambat a walaŋ gərəm dəmmba pay nampum na Betel. Aziy gizlirke nan a walaŋ Betel dəmmba pay na moskoyo də Ay dəmmba pay nampummo, arkə təki nawzaɓ-Maŋgəlva sən Yawe adaka, akkaman Yawe də iya nani.

⁹ Siske na, Abram adder siɗikke siɗikke, kəla Negev.

¹⁰ May agəɗək aka dəlva, Abram alək a Eziptə kawsan siɗikke adaka, vi may gədaki diyɗa aka dəlva.

¹¹ Adan go'oy nawtoŋ a Eziptə na, anah sət ɗak nan Saray na: «Awle, nəsənək na, guluk lalawək kənan aza ula.

¹² Vasna an mə Eziptiɗ awlukunko, wanahaŋ na: “Guluk nantə,” wabaywən, kappok anok madaroko.

¹³ Kamə, anah na, məlmuw kənani, vi dərmuwəngən moggon moggon aka batamko, nəsawgən madaraw ammboko.»

¹⁴ Agəɗək va Abram anahə aka agap a Eziptə, mə Eziptiɗ awlətənək guluk nak lallawək diyɗa sawɓa.

¹⁵ Ɗiy gugriɗ na Farawən awlətəni, aɗiynən kiyət aza Farawən, agəmtənək guluk nak eŋgili.

¹⁶ Aɗɗaŋ sənənək moggon sən Abram aka batamta, arahək gilewi, wasliɗe, korɗe, belemɗe mezeŋgleket dit muguluŋgiti, korɗe muguluŋgit dit zlogomeɗi.

¹⁷ Yaŋ Yawe akiy wəray metiŋgin aka Farawən də gəla nani, aka wən nat Saray, guluk na Abram.

¹⁸ Farawən ayak Abram, apsən na: «Miy kəgəɗ suwəŋ di? Vimi kənah su na, guluk noktə ɓa di?

¹⁹ Vimi kənah su na: “Məlmuwtə di?” Hã in gəm əgəmət ka guluk naw ɗarə. Yaŋ na Guluk nok yakəŋkə, agəmta doko!»

²⁰ Farawən aɗi wən nan sit zeli, appanənək əmbat dət goni dit zəgeɗ nan pakə.