Va'Atəŋ 11 - Bible en Guidar

Gəlaməɓayən na Babilon ( 11:1-9 ) Gəla mələklək na Babel

¹ Aka dələv va asan, ma taka yi, əpel məstakayi.

² Gala ɗiy adawzaraŋ kəlammba pay nampum, arahaŋ təki məpəlayya aka dələv na Sine'ar, yaŋ assoŋ də gəla adaka.

³ Apeleŋ awalaŋ zit na: «Mədamə, məbaysəm menekeɗe, məzlegin a movoro.» Menekeɗe agəla gərma, membezleŋ ka nawsleren waleŋti.

⁴ Yaŋ anəhaŋgə: «Məmpa səm walaŋgəla-metiŋ də gəla-ləklək hã kiyən dəne'gən aza disiŋ. Sləmam dəgilgəni vasna mətray na aka dəlvafuŋ ɓa.»

⁵ Yawe aprikik vi kawla walaŋgəla-metiŋ gəm gəla-ləklək məs kirtin Adam adarkaŋ naka.

⁶ Yawe amna: «Awle, ɗiyiŋ asapaŋgək taka, ma taka, ya aŋki wəza maddaabəŋ neti! Kakaŋ zəga tay nawtekit dəɗɗa an aɗɗumon ɓa!

⁷ Mədamə, miprik səmə, məzlzlaɓan səm ma neti, adaprəmanən an adawpeleŋ aza zit ɓa!»

⁸ Sədak Yawe atəraygit aka dələv gboŋgu, aziwginənək wərka walaŋgəla-metiŋ naka.

⁹ Vini məlvan na, Babel, vi sədaki Yawe azlzlaɓan əpel nammba dələv pakə, gəm sədaki Yawe atəraygit ɗiy aka dələv gboŋgu.

Təŋ səza Sem aza Abram ( 11:10-32 )

¹⁰ Iya na mazlalwã Sem yaŋka: wəzva na Sem agəɗək səkat, gala awa Arpaksat, wəzva sula sə dərɓaga buwən məvekeveke.

¹¹ Səza awa Arpaksat na, Sem azəvək, səkat sle'i, awək kirin mezeŋgleket dit muguluŋgiti.

¹² Arpaksat duwa Sela aka tay də əzva kaklaw hoku kiyən sle'.

¹³ Dərɓaga muwa Sela, Arpaksat azəvək səkat poɗo də hoku, awək kirin mezeŋgleket dit muguluŋgiti.

¹⁴ Sela agəɗək wəzva kaklaw hoku, yaŋ awa Eber.

¹⁵ Dərɓaga uwa na Eber na, Sela azəvək, səkat poɗo də hoku, awək kirin mezeŋgleket dit muguluŋgiti.

¹⁶ Eber azəvək kaklaw hoku kiyən poɗo, yaŋ awa Peleg.

¹⁷ Dərɓaga Eber awa Peleg, azəvək səkat poɗo də kaklaw hoku, awək kirin mezeŋgleket dit muguluŋgiti.

¹⁸ Peleg azəvək kaklaw hoku, yaŋ awa Rewu.

¹⁹ Dərɓaga muwa Rewu na, Peleg azəvək səkat sula də vaytak, awək kirin mezeŋgleket dit muguluŋgiti.

²⁰ Rewu azəvək kaklaw hoku kiyən sula, awa Serug.

²¹ Sə dərɓaga muwa Serug, Rewu azəvək səkat sula də buhul, awək kirin mezeŋgleket dit muguluŋgiti.

²² Serug azəvək kaklaw hoku, yaŋ awa Nahor.

²³ Dərɓaga muwa Nahor, Serug azəvək səkat sula awək kirin mezeŋgleket dit muguluŋgiti.

²⁴ Nahor azəvək kaklaw sula kiyən vaytak, yaŋ awa Terah.

²⁵ Dərɓaga muwa Terah, Nahor azəvək səkat də kəlaw kiyən vaytakə, awək kirin mezeŋgleket dit muguluŋgiti.

²⁶ Terah azəvək kaklaw buhul, awa Abram, Nahor gəm Haran.

²⁷ Mazlalwã Terah yaŋka: Terah awak Abram, Nahor gəm Haran. Haran awak Lot.

²⁸ Haran amtək daabəŋ ki Terah afəni, aka dələv nan a Ur dələv net mə Kaldiyeɗi.

²⁹ Abram də Nahor akayaŋgək gili; ga Abram dawyətən na Saray, ga Nahor na, Milka, wətən Haran, afit may Milka dət Yiska.

³⁰ Saray ndarzlayəktə, tərah muzliya ɓa.

³¹ Terah agəmək Abram wətəni, Lot, wətən Haran, wətən wətəni, dət Saray atəni, ga Abram wətəni, agilyoŋ dənɗaŋ sə Ur net mə Kaldiyeɗi, kawmbat aka dələv na Kana'an. Agapaŋgək a Haran, assoŋ adaka.

³² Terah azəvək səkat sula də sle'i, amtə a Haran.