Va'Atəŋ 1 - Bible en Guidar

Va'atəŋ ( 1:1—11:32 ) Maŋgəlva azəməɗək zəga pakə gəm ɗəfa 1:1—2:25

¹ Də wətəŋ na, Maŋgəlva azəməɗək disiŋ də dəlvafuŋ.

² Dəlvafuŋ asanək ɗarə, pak dəmani, guzli dəsan aka təki mekeleŋ, heret iŋkile kpukpumɗe məbayaŋ gəgay dəsərətəni; əmpəs na Maŋgəlva dədabbal aket iŋkile,

³ yaŋ Maŋgəlva amna: «əkeɗeɗe dəkekeɓe'i!» əkeɗeɗe akekeɓe'ke.

⁴ Maŋgəlva awlak na əkeɗeɗe məkekeɓe'in lewi yi. Maŋgəlva agohonək əkeɗeɗe məkekeɓe'in də guzliyo.

⁵ Maŋgəlva aya əkeɗeɗe məkekeɓe'in na, «kapaya», guzli na «dəfəɗa». Təki atirke, təki addaŋka: pay maddaabəŋgi yi.

⁶ Maŋgəlva anah əmpa na: «Təki keŋreŋge dəsan addekit iŋkile, duɗeket iŋkile!»

⁷ Maŋgəlva aɗɗak təki keŋreŋge naka, awɗeketik iŋkile nafuŋ dit en balsən təki keŋreŋge. Vas agəɗə.

⁸ Maŋgəlva aya təki keŋreŋge nak na, disiŋ. Təki atirke, təki addaŋka: pay masulani yi.

⁹ Maŋgəlva anah na: «Iŋkile nammba disiŋ əŋ dəkkalaŋ a təki taka, təki məklakan dərbangən zəni!» Vas agəɗə.

¹⁰ Maŋgəlva aya təki məklakan nak na, dəlvafuŋ; aya əkkal net iŋkile tam na, pehe. Maŋgəlva awla na, moggoni sawɓa.

¹¹ Maŋgəlva amna: «Dələv dəgilgit zəgeɗ məkdəketi: kevile aɗi mahanyən va zeŋvin asani, wəleŋɗe məzuwaŋ duwaŋ va zeŋvit asani!» Agəɗək vaska.

¹² Dəlvafuŋ agilgitik zəgeɗ məkdəketi: kevileɗ məzəɗɗaŋ mahẽyit təstəsə, gəm wəleŋɗe məzuwaŋ məs də mahẽyit addəvit kirtit va zeŋvit asani. Maŋgəlva awlak na, moggoni.

¹³ Təki atirke, təki addaŋka; pay mahokoni yi.

¹⁴ Maŋgəlva anah na: «Zəgeɗ məzuwiɗeŋ dəssoŋ a təki keŋreŋge na disiŋ, kawɗakan kapay də dəfɗa, dəssoŋgən zəgeɗ narban pay net wəzləreɗi, net əvoŋɗe gəm əzvaɗe,

¹⁵ dəssoŋgən məzuwiɗeŋ a təki keŋreŋge na disiŋ, kawkekeɓe' dəlvafuŋ!» Vas agəɗə.

¹⁶ Maŋgəlva aɗɗek məzuwiɗeŋ gugriɗ sula, məzuwiɗ metiŋgini, ammba kawdawgən kapaya, an muzliya, kawdawgən dəfɗa, gəm ŋgərzleɗi.

¹⁷ Maŋgəlva aziy a təki keŋreŋge na disiŋ nak kawkekeɓe' dəlvafuŋ,

¹⁸ kawdawgit may kapay də dəfɗa, kawɗakan əkeɗeɗe'e gəm guzliyo. Maŋgəlva awlak na, moggoni.

¹⁹ Təki atirke, təki addaŋka: pay mapoɗoni yi.

²⁰ Maŋgəlva anah na: «Zəgeɗ memeyẽɗ mederet duwaŋ hõslõ' hõslõ' aret iŋkile, biŋgeɗ dəveŋgeŋ a təki keŋreŋge na disiŋ aka dəlvafuŋ.»

²¹ Maŋgəlva azəməɗik eŋzleɗ gugriɗ na pehe, zəgeɗ mederet məzəɓlaŋ də zeŋvit məgusiŋgusiŋ temtem məs dəknihtin iŋkile, dit biŋgeɗ pak va zeŋvit asani. Maŋgəlva awlak na, moggoni.

²² Maŋgəlva aɗɗak əzaɓ aketi, amna: «muwə, mənzlərə, məknih iŋkile na pehe, biŋgeɗ duwanən kiyit aka dəlvafuŋ!»

²³ Təki atirke, təki addaŋka: pay masle'eni.

²⁴ Maŋgəlva anah na: «Zəgeɗ mederet duwaŋ aka dələv va zeŋvit asani: zəgeɗ memeyẽɗ neŋgili, dit en memeɗeŋɗe, vẽvẽɗe va zeŋvit asani!» Agəɗək vaska.

²⁵ Maŋgəlva aɗɗek zəgeɗ nawra va zeŋvit asan, zəgeɗ memeyẽɗ neŋgil va zeŋvit asani, dit vẽvẽɗe temtem naka dələv va zeŋvit asani. Maŋgəlva awlak na, moggoni.

²⁶ Maŋgəlva anah na: «Məɗɗa səm ɗəf dəgil va mənamə, va mənam səɗeki, dəzəmgən məlĩ aket kilfeŋge na pehe, biŋgeɗ na disiŋ, zəgeɗ memeyẽɗ naka dəlvafuŋ, gəm zəgeɗ memeɗeŋɗe məzəɓlaŋ aka dəlvafuŋ!»

²⁷ Maŋgəlva azəməɗək ɗəf vit va ndəni, vit va ndən zəknan səɗek azəməɗ ɗəfa; ɗəf mizilin dət guluk azəmiɗe.

²⁸ Maŋgəlva aɗɗak əzaɓ aketi, Maŋgəlva aɓsit na: «Muwə, mənzlərgən kiykum, məknəh dəlvafuŋ, məzəm məlĩ akani. Məzəm məlĩ aket kilfeŋge na pehe, biŋgeɗ na disiŋ, dit zəgeɗ məzəɓlaŋ aka dəlvafuŋ pakə!»

²⁹ Maŋgəlva anah na: «Yaŋ in tat əpsukum kevileɗ məzuɗiyaŋ mahẽyit naka dəlvafuŋ pakə, wəlaŋga muwə uwa nan də wətəni, awaniɓa məs mahanyən addəvən pakə, wasan wəzəm nokum.

³⁰ Kevile məkdəkan pak nəpsitik zəgeɗ memeyẽɗ naka dəlvafuŋgu, biŋgeɗ na disiŋ dit zəgeɗ məzəɓlaŋ məzəmpəsaŋgə, zəgeɗ mederet pakə, ka zəga nawzəma.» Vas agəɗə.

³¹ Maŋgəlva awla an agəɗ pak moggoni sawɓa. Pay atirke, təki addaŋka: pay masləre'eni.