Titus 3 - Bible en Guidar

Əsəɓa gəm əzga'a ( 3:1-11 ) Ədaw na məkristu

¹ Aɗɗumon siti dəɓe'eŋ sitin ɗiy gugriɗe gəm sit milyeŋɗe, dəprəmnəngən meti, dəssoŋgən məsla zit vi wəza moggon pakə.

² Adawpeleŋ mbərayən aka ɗəf ɓa, adawgayaŋ ɓa, dəssoŋ də maɗɗula, dərbanən əssa zay net abet ɗiy pakə.

³ Vi nam pak lahəŋ dərweŋge mənani, məɓoŋmə, məzamə, belemɗe na əsim zəga gəm na əŋgla na gəɓa zə ɗəf temtem mənani, məsdarawɗe mənani məsimeŋ zəga mənani, pay pak mənam tat əzele, əzelen zəmə.

⁴ Ya səza moggon gəm əŋgla na Maŋgəlva Məkõhgəm arbə viyit ɗiyi,

⁵ akõhgəməka, vi wəza an məgəɗ təstəsi ɓa, ya vi ulasahã nani, də ərəh baptem nakkpaŋ meggeɗe gəm nakkpaŋ meleketem də Zeŋgile Salala;

⁶ məs atərayan akam diyɗa də Yesu Kristu Məkõhgəmə.

⁷ Vi an mərahək əssa salala də mbəlembəle nani, məkkpaŋgən məzəmgəlaɗe na zeŋgile nasso faɗ məs mədawga.

⁸ Aŋki əpel an dəslə nawtafa. Nəŋgəl kəziwginigin wənəska, vi ɗiy məs dətafən Maŋgəlva dəsokəngən zit əɗɗa wəzeɗe moggeti, wənəs moggoni, watər wəray azet ɗiyi.

⁹ Ya əbayma net dərweŋge, əŋɗet dəhiŋgiɗmə, əgaya gəm əbayma aka wən na mahenziŋ, asla zu səzeti, atəraŋ na ɓa, ɗarəŋ.

¹⁰ Ɗəf məgeyet ɗiy na, asəɓ sən təl sula, an dəprəm ɓa, azar səzani.

¹¹ Kəsənka, ɗəf an vas amzlaka, tay əɗɗa mambraya, atawək wən aka zən dəvani.

Əgrakən ( 3:12-15 ) An məɗi wən nan temtem bayma faɗə

¹² Pay nədawslən suk Artemas awaniɓa Tikikus, kəsokgən zuk əzzok azaw a Nikapolis, vi adak nəziwgin nawar təla paya.

¹³ Asok zuk əbbah sən Zenas mətawwəna gəm Apollos addəv əɗɗa malaka neti vi zəga adakkpap sit ɓa.

¹⁴ Ka ɗiy nam tam dəsokəngən zit əyagan əɗɗa wəzeɗe moggeti, vi dəbbahaŋ sitingin ɗiy meɓɓeti an wəray nan tay, adassoŋ məza atəraŋ na ɓa ɓa.

¹⁵ Ɗiyen məs də in pak asɗokunko. Asɗet baynəŋgiɗəm məs də ətafa. Mbəlembəle na Maŋgəlva dəsan də munokum pakə.