Titus 2 - Bible en Guidar

Wəza temtem sən əsap net məzutafaŋ temtemi ( 2:1-15 ) Əyak məs dəslə

¹ Ya noko, apel an məs dəslə də əyak an moggoni,

² mezeɗ dəslanən ziti, dəssoŋ məɗiyaŋ kiya, məpeleŋ naprəma, dəziwweŋ addəv ətaf an salala, addəv əŋgla gəm addəv əsok zə ɗəfa.

³ Vaska'e gil məsɓeti, dədawaŋ va an dəslə azet ɗiy salala məza əgeyet ɗiy ɓa, adassoŋ belemɗe na mbazla ɓa, dərbanən əɗɗa moggoni,

⁴ vi dəziwginingən maɗɗulet gil en kirin kirin dəŋgluningin zilŋgiɗti dit kirtiti,

⁵ dəssoŋgən də maɗɗuleti, salala, məɗɗaŋ wəza eŋgil anet da, moggeti, məprəmən met zilŋgiɗti, vi ɗiy adawpeleŋ mbərayən aka əpel na Maŋgəlva ɓa.

⁶ Vaski anah sit gewleɗi dəssoŋgən də maɗɗulet

⁷ addəv zəga pakə. Is sən kiyuk aslək kəsokgən va zəga nawla azok addəv moggoni, addəv əyaka, addəv əssa salala, addəv əɓe'e.

⁸ Əpel dəsan moggoni, məza nawzelen ɓa, vi wil dədanəngən məzuzele, vi arəh na an nawpel mbərayən akam ɓa.

⁹ Balamɗe dəprəmən met deyeɗe net addəv zəga pakə, dətafsitini adaŋzlaŋ ma ɓa.

¹⁰ Adawsornən zəga net ɓa, ya dərbanən ətaf moggoni, vi dəɗinəngən ki əyak na Maŋgəlva Məkõhgəm addəv zəga pakə.

¹¹ Vi mbəlembəle na Maŋgəlva məkõhgit ɗiy arbək viyit ɗiy pakə.

¹² Tay əyagam vi məppangən ədaw mbərayən gəm əsim zəga negge, məsamgən də maɗɗula də təstəsə gəm də geslne na Maŋgəlva addəv ənziya an kakaŋka,

¹³ də əɗɗum əga neneke gəm ərba na gagdak na Maŋgəlva metiŋ gəm na Məzukõhgəm Yesu Kristu,

¹⁴ məs dəppan kiyən viyəm vi kamam səka mambray pakə, abbur ɗiy kanan dəssoŋgən məs kotorokɗe naɗɗa wəza moggoni.

¹⁵ Apel wənəska, asɓeti, ahayẽt zuk soksoku. Ɗəf adawzelok ɓa.