Sefanya 3 - Bible en Guidar

Əza na Yerusalem gəm əbit nani ( 3:1-20 ) Yerusalem dəprəm iya na Maŋgəlva ɓa

¹ Əray aka walaŋgəla-metiŋ məɓoŋni, mərnokən gəm məsər met ɗiyi!

² Dəprəm iya ɓa, dətaf iyak ɓa, dəppan zən sən Yawe ɓa, dəzar go'o aza Maŋgəlva nan ɓa.

³ Deyeɗe naddəvən tahəŋ va ɓooliɗ məzuhəmaŋgə; mətawaŋwən nan tahəŋ va kirɗemuyã də moskoyo, məs tahəŋ də zəga narras dəmpummo ɓa.

⁴ Məskəleŋɗe nan məɗiyaŋ kizitiŋ, məs vurumɗeŋgə; məsdəlveŋge nan araygənənək zəga na matuya, aggaraŋgək ki mahenziŋ.

⁵ Yawe təstəsi yi addəv walaŋgəla-metiŋ vani, aɗɗa mbərayən ɓa. Va təki addaŋ pak tay ətawwən nani, aggbi' ɓa. Də as pak məsdaraw dəsən wil ɓa.

⁶ Nəzetik dəlveŋge, nəɓzluwik zlavaɗe net məɓeyti; nəreygitik tiveɗ neti: məzutoŋgoŋ tahəŋ ɓa; məreygiti walaŋgəleɗe gugriɗ neti: ɗəf taka tay ɓa, ɗiy tahəŋ də gəla addəvən ɓa.

⁷ Nənah na: «Ageslne' su kaka'ə, kətafgən iyaka! Təki nassa nan azəna ɓa.» Va pay nəsil akan pakə, agəmənək zit əraygən zəga naɗɗa neti.

⁸ Ya vasna, məguwa Yawe aɗiymani. Məgu pay nədawsilyaw ammba zəga nawrəh səma əgaya! Wətawwən naw wasan nawzet dəlveŋge pakə, nawsepet milyeŋge a təki taka, kawki herɗe naw gəm ədagədəv naw vakvak pak aketi, vi dəlvafuŋ bayman wazlə akoffo na kotorok nawa.

Maŋgəlva wakkpeŋget ɗiy

⁹ Vi wanəkkpaŋgan metteɓ met ɗiy kotakə, vi ndəɗaŋ pak diyanəngən iya na Yawe, vi dəɗɗaŋ sənəngən wəza də mekret taka.

¹⁰ Sə dəgar kiyit məlpeŋge na Etiyopi, məzəkdukoŋ suwən en məs nətəraygiti, wakiyaŋ suwən əvəla.

Mə Israyelɗe en dənduwəɗaŋgə

¹¹ Pay dasək na wil adukun na viyit wəzeɗe nok mbəreyit pak məs kəɓoŋ akawəŋ ɓa; vi wanəzergit məzukaɓaŋ məɗiyaŋ kiyzit səddəvko, kəzban na əɗi kiyzuk aka mossorgo metiŋ salala naw əmpa ɓa.

¹² Wanəɗi ɗiy məssehẽŋɗe məddekit addəvko; wakayaŋ təki nawɗam addəv iya na Yawe.

¹³ Madambirgit mə Israyelɗe aɗɗaŋ na ɗarɗar ɓa; awaŋ na wən əmpa ɓa, akolnən na met nawwa wən ɓa; waɓap əzəmaŋgə, waffeteŋ məza ɗəf əgeslne'git ɓa.

Əzaɓan Yerusalem

¹⁴ Aŋgəzl vaŋvəla, waŋ na Siyon, aɗi salalay, Israyel, anneken zuko, amas də mokrok paparə, waŋ na Yerusalem.

¹⁵ Yawe azargənən wən mətawən akoko, azargənək məzuzel noko. Yawe sən kini məlĩ na Israyel, tay addəvko, kəgeslne' na sən zəga mbərayən əmpa ɓa.

¹⁶ Pay nani, kawnah səni Yerusalem na: «Kəgeslne' ɓa Siyon, vok adaɗɗa ləɓayləɓay ɓa;

¹⁷ Yawe Maŋgəlva nok tay addəvko gambara yi, məskə wəla yi. Zən neki yi aka wən noko, asanək ɓatɓat də zən ənneke.» Addəv əŋgla nani, tay ənneken zən aka wən nok də vaŋvəl na ənneke.

¹⁸ Wanəsapet məzəmaŋ sahã məza awrahaŋ əzləra ɓeŋki; ɓa'əŋ də isi, wil gagdaki aketi.

¹⁹ In yakəŋ əsilyaw aket məs dəsərnən mokum dəpaska, wanəkõhgit timeŋgiɗ vədalɗe, wanəkkelet məzeti. Wanəɗi kiyti, sləmet wabbal aka dələv məs arban wil adak pakə.

²⁰ Pay nan na, wanəmilgukum, pay nədakkolokum wasani; sləmokum wabbalə, wanəɗi kiykum a weleŋgit ɗiy nammba dələv pakə; pay nədawziwgin wən nokum a mahorokum Yawe anahə.