Sefanya 2 - Bible en Guidar

Iya məzurayɗe

¹ Məkkalə, məkkalə, ɗiy məza wil aret ɓa,

² tak pay net herɗe adazzan adawkukum va heslesle, tak herɗe na Yawe adawsilyoŋ akokum, tak pay nawda gədəv na Yawe adazzan akokum.

³ Məkayan Yawe, mənokum məzurayɗe naka dəlvafuŋ, məzəɗɗaŋ wəza də an agəɗə; məkayan təstəsə, məkayan əɓe'gən kiya, kuzuŋ wakəɗamaŋ aka pay nawda gədəv na Yawe soko.

Əza net meggeŋgiɗ Israyel ( 2:4-15 ) An dədaŋgla ərəh ɗiy nammba pay na moskoyo

⁴ Kappani Gaza friki, kawzani Askelon; karɓahani Asdod aka tataŋ paya, kawfu'ni magabba Ekron.

⁵ Əray akokum, ɗiy naka va na pehe, dələv net mə Keretɗe; akokumi əpel na Yawe, Kana'an dələv net mə Filistiɗe: wanəzoko, vi ɗəf tay addəvuk ɓa.

⁶ Dələv nok na ma məlpa wakkpaŋ ka təki nawtaɗa, ka təki nawtoŋ net məzuteɗeŋge dit gazlaŋɗe net timeŋgiɗ neti.

⁷ Wasan ka kiyva net madembirgit ɗiy na Yuda; wataɗaŋ akani, wavoŋgoŋ addəvit gəleɗe na Askelon də moskoyo, vi Yawe Maŋgəlva net wazgə sləma aketi, wazaɓan wən neti.

An dədaŋgla ərəh ɗiy nammba pay nampum

⁸ Nəprəmək əra na Mo'ab, ətuɗok wən net kirtin Ammon, ndəɗaŋ dəretin ɗiy nawa, aɓaygənənək dələv net də ərras an net ɗiy nawa.

⁹ Yawe Məzuɓappak na disiŋ, Maŋgəlva na Israyel, aɗiyman na, va nəsaw madarawa! Mo'ab wakkpaŋ va Sodom gəm mə Ammonɗe va Gomorra: təki net dewregeɗe, təki nawso' bətuwa, dəlvafuŋ məraygən hã faɗə. Ɗiy naw en dəppaŋ wamohẽtini, ɗiy na mahəlfa naw dəppaŋ wagəmnən ka neti.

¹⁰ An adawrahaŋ a gəla əkaɓ net yaŋka, vi aretinik gəm aɓaygənənək kiyzit aket ɗiy na Yawe Məzuɓappak na disiŋ.

¹¹ Yawe arbanək zən nawgeslne' sən azeti, azetik meŋgilveɗ naka dəlvafuŋ pakə, wappu'oŋ aban naway pak sə gəlan səka dələv nani.

An dədaŋgla ərəh ɗiy na dohoŋ gəm na kəla disiŋ

¹² Nokum pakə, mə Etiyopiɗe! Masalam naw wambokkum.

¹³ Watəl van aka dələv na kəla disiŋ kawzan Asiri. Wakkpaŋgan Niniwe ka kiməskiya, ka mukuro va kapta muyã;

¹⁴ addəvni zəgeɗ memeyẽɗ adawvoŋgoŋgu, zenvit zəgeɗ memeyẽɗ temtemi: aŋkarguzlo, tovvo dayday wavoŋ addəvit daŋgbargeɗ nani, kaprəmi əhəm na gbuzlu ama təkifoŋgo naza gəla. Təŋ sə maddamba ɗəf adawla əraya, kaptiwti gbuŋgburit muguguleɗ na Liban.

¹⁵ Vaski walaŋgəla-metiŋ mənneken zən dəsan də gəla fendeŋgi, an dədawnəh a makran na: «Ina, intə kaka'ə!» Mbar akkpaŋ dələv məzan əmpa, ka bətəŋ net zəgeɗ nawra di? Məzutoŋ pak wafyoku, waɗɗa van weleki.