Roma 8 - Bible en Guidar

Zeŋgile də Əmpəs na Maŋgəlva

¹ Vas kan na, kakaŋ na ətawwən tay narme ɗiy dəsapaŋ də Yesu Kristu ɓa.

² Vi mahenziŋ na Əmpəs məzuki zeŋgile addəv əsap də Yesu Kristu apəlmək səddəv mahenziŋ na mambray gəm səddəv əmta.

³ Vi, zəga an mahenziŋ aɓap na ɓa yi, vi gəɓa zə ɗəf tay əddakani, Maŋgəlva aslənək Wətən də gəɓa zən va gəɓa zə ɗəf na mambraya, dəwəl sən mambray na, atawwən aka mambray addəv gəɓa zə ɗəfa.

⁴ Vi wəza na təstəs də mahenziŋ dəgəɗgən addəvəm mənam məzudaw də Əmpəsa məza na gəɓa zəm ɓa.

⁵ Vi ɗiy en dəzbanən əŋgla na ziti, aket zəgeɗ na gəɓa zə ɗəf adaɗɗumoŋgu. En dəzbanən Əmpəsa, aket zəgeɗ na Əmpəsa.

⁶ Vi əɗɗum na gəɓa zə ɗəf na, əmta adawkiya, ya Əmpəs na, zeŋgile gəm zazay adawkiya.

⁷ Vi əɗɗum na gəɓa zə ɗəf na, əɓoŋ aka Maŋgəlva yi. Awɓe' sən mahenziŋ na Maŋgəlva ɓa, aɓap na əzban lah ɓa.

⁸ Ɗiy en dəssoŋ addəv əŋgla na gəɓa ziti, aɓapaŋ na əssa lew ara Maŋgəlva ɓa.

⁹ Ya nokum, addəv əŋgla na gəɓa zukum kənanən ɓa, addəv an na Əmpəs kənanəni, an gesiŋ Əmpəs na Maŋgəlva tay azokum. An ɗəf tay də Əmpəs na Kristu ɓa na, nani ɓa.

¹⁰ An Kristu tay addəvkum, asna gəɓa zukum amtək sə kəlaza mambraya, ya Əmpəs wasan sukum zeŋgile vi təstəsə.

¹¹ An Əmpəs na məs dəsilgin Yesu səret ɗiy mimtit tat addəvkum, məs dəsilgin Kristu səret ɗiy mimtit van wapsən zeŋgile sən gəɓa zukum məs namtaŋka'e də Əmpəs nan məs naddəvkum.

¹² Vas kan na, milmiŋgiɗwa, dəmən tay akamə, ya na gəɓa zə ɗəfi kanziya va na gəɓa zə ɗəf ɓa.

¹³ Vi an mənokum tat ənziya va na gəɓa zə ɗəfa, wakəmtaŋgə; ya an va na Əmpəsi, əŋgla na gəɓa zukum kədawbayaŋgə, wakəssoŋ madorokum.

¹⁴ Vi en məs Əmpəs na Maŋgəlva adadawgit pak, net kirtin Maŋgəlva əŋgə.

¹⁵ Vi əmpəs məs nakkpaŋgokum belemɗe əmpa kərahaŋ ka kawgeslne' ɓa, ya əmpəs nakkpaŋgokum kirtin Maŋgəlva kərahaŋgə, məs dəpsəm tive mədawyan na Abba, Afəni.

¹⁶ Əmpəs van sən kiyən dədawnah sən əmpəs nam na, kirtin Maŋgəlva mənani.

¹⁷ Ya an kirtin mənani, məzəmgəlaɗe mənani'e, məzəmgəlaɗe na Maŋgəlva gəm məzəmgəlaɗe sap də Kristu, an gesiŋ mənam tat əzəm sahã sap dəndəni, wamərah gagdak sap dəndəni'e.

Gagdak nazzani

¹⁸ Vi in tat ula əzəmsahã na pay an kakaŋkəŋ aslə na də gagdak məs narbə səməŋ ɓa.

¹⁹ Vi əzəməɗ pak tay əga əzza na Wətən Maŋgəlva də hoɗhoɗ ammbani.

²⁰ Vi əzəməɗ pak tak əɓe' sən zəga ɗarə, dəvani ɓa, vi an dədoɗ kiyən dəɓe' səngəni yi, tay əgani.

²¹ Vi kawpəlni an məzəməɗ van səka balam na əmta vi dəsangən na kiyən addəv gagdak net kirtin Maŋgəlva.

²² Vi məsənək na, an məzəməɗən pak tay əŋɗəsa gəm tay əzəm sahã sən əssa na əɓay uwa hã kakaŋka.

²³ Ndəni kaka ɓa, mənam məs mərah əvəl na Əmpəs daabəŋ pak, nam van, mənam sən kiyən tat ənɗəs addəv gəɓa zəm də əya əga əkkpaŋ kirtin Maŋgəlva gəm əbit na gəɓa zəmə.

²⁴ Vi də əga mərah əkõho, ya əga məs hara ɗəf adawla na əgay ɓa, kawgani an ɗəf adawla əmpa sa?

²⁵ Ya an mənam tat əga an mawlan ɓa, asna waməsok zəm əgan də hoɗhoɗ ammbani.

²⁶ Əmpəs tay əzzan əbbah səm addəv əddak namə, vi məsən əkkam va an dəslə ɓa. Ya Əmpəs zək nan tay əkkam vimə, də ənɗəs məza nawpeli ɓa.

²⁷ Maŋgəlva məzula kpukupum na makra ɗəf asənək əɗɗum na Əmpəsa, vi tay əkkam va Maŋgəlva aŋgəl ammbet ɗiy en salala.

²⁸ Məsənək na, Maŋgəlva tay əɗɗa zəga pak vi moggon net ɗiy en dəngluwəni, viyit ɗiy en ayə va aza an aziwgini.

²⁹ Vi ɗiy en asən dafsən na, aɗiyik dafsəne'e dəssoŋgən va Wətən asani, vi nan dəsangən uwa maddaabəŋ naret milmiŋgiɗin diyɗa.

³⁰ Ya ɗiy en məs aɗi dafsəni, ayeke'e, en məs ayə, akkpeŋgetik təstəsə'e, en məs akkpeŋgek təstəsə, agagdaketike'e.

Memetiŋ na əŋgla na Maŋgəlva

³¹ Mbar mədawnəh kan aka wənəs di? An Maŋgəlva tay də mənam na, naway nalpa də mənam di?

³² Ndən məs dərma van aka Wətən ɓa, yaŋ appan əmta ammbam pakə, an vaski na, apsəm na zəga pak dəndəne'e də mbəlembəle ɓa sa?

³³ Naway nawka dolgoy aket məweleɗe na Maŋgəlva di? Maŋgəlva yi məzəkkpeŋget təstəsə.

³⁴ Naway nawtawwən aket di? Yesu Kristu məs dəmtə! Dəday na, asilike, tay aka va dəzəŋ na Maŋgəlva, ya tay əkkam ammbamə.

³⁵ Ya naway nawɗakam də əŋgla na Kristu di? Əzəm sahã sa, əɗɗum sa, əsərma sa, mãy sa, sahã sa, wən tatwãh sa, awaniɓa masalam?

³⁶ Va məverin na: Aka wən noki adawbaymən ɗayɗayə, tay uləmən va timeŋgiɗ nawtaw wəleti.

³⁷ Ya addəv Zəgas pak na, məskək wəla dərwadərwa də əbbah na an məs dəŋgələmə.

³⁸ Vi nəsənək gesiŋ na, əmta, zeŋgile, maslayɗe, ɗiy gugriɗ na dəlva, əssa an kakaŋka, əssa an nabe, əɓapɗe,

³⁹ gagdak na disiŋ, gagdak nammba dəlvafuŋ, zəga məzəməɗən maɓɓan, tay an məs nawɓap uɗakam də əŋgla na Maŋgəlva məs dərbə də Yesu Kristu Daya nam ɓa.