Roma 7 - Bible en Guidar

Əslakiva wən də əɓele

¹ Milmiŋgiɗwa, sit ɗiy məs dəsənnən mahenziŋ nədawpele. Kəsənnən mahenziŋ na, tay əzəm məlĩ aka ɗəf pay asan madaran kaka'ə ɓa sa?

² Va guluk nammba zile, mahenziŋ aynatək aza zələt pay asan madarani. Ya an zələt amtəka, mahenziŋ diynat aza zələt apəlka.

³ Vini kan an təgəmək zil mbərən aka zələt tay madarani, kawyəti na, məkuh a gizbe. Ya an zələt amtəka, na kiyəttə səza mahenziŋ: Kawyəti na, məkuh a gizbe an təgəmək zil maɓɓan ɓa.

⁴ Vaski munokumu'e milmiŋgiɗwa, kəmtaŋgək sə kəlaza mahenziŋ də əsap də gəɓa zə Kristu vi kakkpaŋ sən ɗəf mbərni, məs dəsil səret ɗiy mimtiti, ka məgəɗgən an nawtər sən Maŋgəlva.

⁵ Vi aka məsam addəv gagdak na gəɓa zəmə, əsim na mambray tay əɗɗa wəza addəv gəɓa zəm də mahenziŋ, tay əɗɗa ka məgəɗgən an nawtər sən əmta.

⁶ Ya kakaŋ na məbitmi səza mahenziŋ, vi məmtəm mənan səza an dədarməm ka belemɗe, vi məgəɗ wəza də tive meleketen na Zeŋgile Salala məza də mahenziŋ məzvan məverin ɓa.

Mahenziŋ gəm mambraya

⁷ Mbar mədawnah kandi? Mahenziŋ na mambrayi sa? Tay vas ɓa! Ya nəsən mambray na də mahenziŋgi. Vasna nəsən na əsim zəga kəta va mahenziŋ dənah na: Kədawsim zəga ɓa ɓa.

⁸ Ndəni mambray andəreh dəmmbet mahenziŋɗe asilgən əsim zəga temtem azawa. Vi məza mahenziŋ ɓa na, mambray amtəka.

⁹ Madaraw nan lahəŋ aka mahenziŋ tay ɓa. Ya səza mahenziŋɗe azzoŋgu, mambray le' madarani.

¹⁰ Ya naw nəmtəka. Vasna, mahenziŋɗe məs nawkaŋ ɗəf addəv zeŋgile naka, akisuwək əmta.

¹¹ Yaŋ mambray andəreh ammbet mahenziŋɗe naka, arakawa, abayu dənɗaŋ.

¹² Gegesiŋ, mahenziŋ salalay yi, mahenziŋɗe salalaŋgə, təstəsəŋ gəm moggeti.

¹³ Zəga moggon naki kan dəkkpaŋ su əmta sa? Tay vas ɓa! Vas na mambray vi dərbəgən mambray na, awək əmta də zəga moggon naka, vaski kan mambray akkpaŋ dit mahenziŋɗe mambray an mbərrayən.

Ɗəf məs mambray adawzəm məlĩ akani

¹⁴ Məsənək na, mahenziŋ səza Maŋgəlva ade, ya nawa, əŋgla na gəɓa zu azəmək məlĩ akawa, məvəlwi sən mambraya.

¹⁵ Nawsən an nədaɗɗa ɓa, naɗɗa an nəŋgəl ɓa, abbər an məs nəzel nədaɗɗa.

¹⁶ Ya an, an nəŋgəl nədaɗɗa ɓa, asna nəsənək na mahenziŋ moggoni.

¹⁷ Ya kakaŋ na, intə nədaɗɗan as van ɓa, mambray an naddəvwi.

¹⁸ Nəsənka, zəga moggon tay azaw ɓa, va ənəh na, addəv gəɓa zu ɓa. Vi əŋgla na moggon tay azawa, ya nawɓap əɗɗan ɓa.

¹⁹ Naɓap əɗɗa moggon məs nəŋgələŋ ɓa, mbərayən məs nəzeləŋ nədaɗɗa.

²⁰ An in tat əɗɗa zəga an nəŋgəl ɓa, asna intə nədaɗɗan as van ɓa, mambray naddəvwi.

²¹ Mahenziŋ iŋki kan nədawrəha, in məs nədaŋgla əɗɗa moggoni, mbərayən nədawrah abawa.

²² Vi addəv makraw na, in tat ənan nek də mahenziŋ na Maŋgəlva.

²³ Ya in tat ula mahenziŋ maɓɓan addivit zəgeɗ na gəɓa zuwa, tay əgay də mahenziŋ na əsən nawa, ndən əkkpaŋgaw balam na mahenziŋ na mambray məs dəsan addivit zəgeɗ na gəɓa zu naka.

²⁴ Ɗəf na sahã nani! Naway nawkõhgu səza gəɓa zə ɗəf namtaŋ di?

²⁵ Ya soko sən Maŋgəlva də Yesu Kristu, Daya namə. Vas kan na, naw nəsənək də maɗɗulaw na, balam na mahenziŋ na Maŋgəlva nani, ya addəv gəɓa zu na, balam na mahenziŋ na mambray nani.