Roma 5 - Bible en Guidar

Zeŋgile meleketen addəv Kristu ( 5:1—8:39 ) Zay də Maŋgəlva

¹ Adan mərah əssa təstəs də ətaf kan na, gəgaŋ na, mənam tat zay də Maŋgəlva dəza Daya nam Yesu Kristu.

² Ɗəzani mərah mbəlembəle əŋ də ətafa, məs mədawziw gəm mədawɗi ənnek nam addəv əga gagdak na Maŋgəlva.

³ An dəday əmpa na, mənam tat ərban ənnek addəv tatwãh daydayə'e vi məsənək na tatwãh waki əɓəsa.

⁴ Əɓəs waki əziwɓəlɓəl aba əraka, əziwɓəlɓəl aba ərak waki əga nawrəh zəga.

⁵ Əga nawrəh zəga arbəsəm na wil ɓa, vi əŋgla na Maŋgəlva məpsəm dəza Zeŋgile Salala tay a makramə.

⁶ Vi, aka məsam məddakmə, Kristu amtək də pay an məɗiyən ammbet məs mambrayɗe.

⁷ Vi tuwãhi ɗəf adawtaf əmta a gəla ɗəf təstəsə. Ammba ɗəf məgəɗ moggon na, kuzuŋ ɗəf wadakiyən əmta soko.

⁸ Ya vaŋki Maŋgəlva arban əŋgla nan azamə, aka məsam məs mambrayɗe, Kristu amtək vimə.

⁹ Sasak kakaŋkəŋka, adan mərah təstəs də mbel nani, wamərah əkõh dəndən səma ədagədəva.

¹⁰ Vi aka məsam məzuzelɗe na Maŋgəlva, məsleremi dəndən də əmta na Wətəni, sasak məsam məslerməŋ na, waməkõh addəv zeŋgileni.

¹¹ Mbəksa aska, mənam tat əɗi ənneke nam əmpa aka Maŋgəlva də əsap nam də Daya Yesu Kristu, məs mərah əsler dəzan gəgaŋka.

Adam gəm Kristu

¹² Sən aski, va mambray ade aka dələv də ɗəf taka, əmta tam ade də mambraya, gəm əmta azlalbay aket ɗiy pak vi ndəɗaŋ pak aɗɗaŋgək mambraya,

¹³ vi hã gap aza mahenziŋ, mambray tay səkay aka dəlva, ya məŋɗani mambray van aka mahenziŋ tay tagay ɓa ɓa.

¹⁴ Ya əmta dəzəm məlĩ təŋ səza Adam hã gap aza Moyis, də aket en dəɗɗaŋ mambray mə zeŋvin na Adam ɓa zlaŋ. Ndən məs dəsan zeŋgile na məs dədazzani.

¹⁵ Ya tay vas də əvəl na mbəlembəle va na mambray ɓa, vi ɗiy diyɗa arahaŋgək əmta dəka mambray na ɗəf taka, sasak mbəlembəle na Maŋgəlva gəm əvəl na mbəlembəle na ɗəf taka, Yesu Kristu, awan zən aket ɗiy diyɗa.

¹⁶ Əvəl na Maŋgəlva tay va mambray na ɗəf taka ɓa. Vi səza mambray na ɗəf taka ətawwən adawraygən sit ɗiy pakə, səzet heslepeɗe diyɗa əvəl na mbəlembəle adakkpaŋget ɗiy təstəsə.

¹⁷ An əmta azəmək məlĩ dəndən heslepe na ɗəf taka, en dərahaŋ mbəlembəle gəm əvəl na təstəs wazəmaŋ məlĩ day addəv zeŋgile də Yesu Kristu takərgəni.

¹⁸ Vas kan na, va məraygən siti ɗiy pak də heslepe taka, vaska'e də təstəs məɗɗan taka, əssa təstəs məs dədawki zeŋgile wazlalbay aket ɗiy pakə.

¹⁹ Vi, va də əɓoŋ na ɗəf taka ɗiy diyɗa akkpaŋgaŋ məɗɗaŋ mambraya, vaska'e də əɓe' na ɗəf taka ɗiy diyɗa wassoŋ təstəsə.

²⁰ Mahenziŋ ade na, vi mambray dəzlərgəni. Ya a təki mambray anzlərə mbəlembəle na Maŋgəlva awanək zəni.

²¹ Vi, va mambray azəm məlĩ addəv əmta, vaska'e mbəlembəle adawzəm məlĩ də təstəs vi zeŋgile an faɗ də Yesu Kristu Daya namə.