Roma 4 - Bible en Guidar

Ətaf na Abraham

¹ Mbar mədawnah kan aka an dəhəm Abraham arah dəwəl sən gəɓa zə ɗəf di?

² An va Abraham arahək əssa təstəs dit wəzeɗe na, wakaɓ kəta, ya aba Maŋgəlva yi ɓa.

³ Mi Əver adawnah di? Abraham atafək Maŋgəlva, Maŋgəlva aŋɗan sənək as van ka təstəsə.

⁴ Ya na məgəɗ wəza na, əfaɗ na wəza nan kaŋɗani ka mbəlembəle ɓa, ərəh na wəza nani.

⁵ Ya ɗəf məs dəgəɗ wəza ɓa, dətaf Maŋgəlva məkkpaŋgan məs mambray ka ɗəf təstəs, ətaf nan dədaŋɗa ka təstəsə.

⁶ Vaski yi'e Davit anah aka ənneke na ɗəf məs Maŋgəlva aŋɗan ka ɗəf təstəs məza wəza ɓa, amna:

⁷ Əzaɓ azet ɗiyen məvvuyon sit mambray neti, en məsərət ki mambray net pakə.

⁸ Əzaɓ aza ɗəf məs Daya dəŋɗan sən mambray nan kpak ɓa.

⁹ Əzaɓ nan viyit məs dəskəlaŋawraŋ kaka tay vi məs dəskəlaŋ awra ɓa sa? Vi mənahək na: Ətaf na Abraham məŋɗa ka təstəs nani.

¹⁰ Ya va mbar məŋɗan kan di? Aka askəlawra sa, awaniɓa aka dəɓəl əskəlawra ɓa? Owwo, aka askəlawray ɓa, aka dəɓəl əskəlawra ɓa yi.

¹¹ Dərɓagani arah əskəlawra ka zəga narban təstəs na ətafa, aka asan dəɓəl əskəl awra ɓa. Ndəni efit ɗiy en dətafaŋ pakə, məs dəskəlaŋ awra ɓa vi kaŋɗan sit ka təstəs tamə.

¹² Gəm efit məs dəskəlaŋawra, en dədaskəlaŋawra kaka ɓa dit en dəzbanən ətaf məs afəm Abraham atafə, aka dəɓəl əskəlawra ɓa.

Iynama na Maŋgəlva mərəhən də ətafa

¹³ Vi də tive na mahenziŋgi məɗɗa iynama napsən dələv sən Abraham ka nani awaniɓa sən Mazlalwan ɓa, də tive na təstəs dəde səza ətafi.

¹⁴ An əssa məzəmgəla də əzban mahenziŋgi na, asna ətaf wakkpaŋ zəga ɗarə, iynama wazə.

¹⁵ Vi mahenziŋ ədagədəv adawkiya, a təki mahenziŋ tay ɓa, əggar ki mahenziŋ tay ɓa'a.

¹⁶ Vini məziwgin iynama aka ətafa, vi dəsangən mbəlembəle sit ɗiy pakə, sit məzbanən mahenziŋgi kaka ɓa sit məs də ətaf va na afəm Abrahami'e,

¹⁷ vi tay məverin na: Nəɗikuk ka efit ɗiy diyɗa, asan vasna aba Maŋgəlva məs atafi, məzumbəlgit ɗiy mimtiti, gəm məzəɗɗa an tay ɓa dəsangəni.

¹⁸ Tay əga dayki an nawga, atafka, akkpaŋgək efit ɗiy diyɗa, va mənahən na: Vas zeŋvuk adawsani.

¹⁹ Də adawla zən va məmtək səkay gəm gəlet kirin na Sara agalka, dəddak səddəv ətaf ɓa, tay də zəga na əzva səkatə.

²⁰ Ya dəzlzlaɓ səka ətaf nan səba iynama na Maŋgəlva ɓa, ətaf asɓanəka, agagdakanən Maŋgəlva.

²¹ Atafək gesiŋ na, an Maŋgəlva aynə na, waɓap əɗɗani'e.

²² Vi vaski yi'e məŋɗan sən ka təstəsə.

²³ Səni məverin kaka na: Məŋɗan səni əŋ ɓa.

²⁴ Ya səmi'e adaŋɗa, mənam məs mətaf Maŋgəlva məs dəsilgən Yesu Daya nam səret ɗiy mimtiti,

²⁵ ndən məs məppan əmta viyit heslepeɗe namə, gəm dəsil səka əmta, vi mərahgən əssa təstəsə.