Roma 3 - Bible en Guidar

¹ Də mi kan mə Yudeɗ adayaŋgə awaniɓa mi ərəh na əskəlawra di?

² Dahadaha pay diyɗa yi. Vi daabəŋ nani, aveti məppan əpel na Maŋgəlva.

³ Mi kan di? An ɗiy səmmbet tahəŋ də ətaf ɓa na, əssa məza ətaf ɓa net wazan moggon na Maŋgəlva sa?

⁴ Agəɗ na ɓa! Maŋgəlva wassan də gegesiŋ, ɗəf titir pak məwə wəna, va məverin na: Vi kəsoŋgən təstəs addəv əpel noko, kəskəgən wəla an pay ətawwən akoko.

⁵ Ya an mambray nam tay ərban təstəs na Maŋgəlva, mbar mədawnah di? Maŋgəlva təstəsi ɓa an appanək ədagədəv nan akam sa? Ɗəf ɗəf nədawpele.

⁶ Agəɗ na ɓa! An vaski ɓa na, mbarmbar Maŋgəlva adawtaw wən aka dələv gboŋ di?

⁷ Ya an gegesiŋ na Maŋgəlva tay ənzləra də uwa wən naw vi gagdak nani, vimi əmpa naw adawtawaŋ wən akaw va məs mambray di?

⁸ Ya vimi mawnəh va ɗiy məɓɓet məpeleŋ mbərayən aka ɗəf adawnəhaŋ na, mənam tat ənəh na: Məgəɗ səm mambraya ka moggon dədegini ɓa di? Ɗiyiski adahək nawtaw wən aketi.

Ɗəf tay təstəs ɓa

⁹ Ya mi kan di? Mənamtə day sa? Owwo, vi mərbanək səkay na: Mə Yudeɗ dit Gərekɗe pak ammba va mambray assoŋgu,

¹⁰ va məverin na: Ɗəf tay təstəs ɓa, təttaka dayday tay ɓa.

¹¹ Tay məzəprəm gabba zəga ɓa, tay məzukayan Maŋgəlva ɓa.

¹² Baymet pak amzlahaŋka, arayaŋgək pakgiti. Tay məgəɗ moggon ɓa, təttaka dayday tay ɓa.

¹³ Guyorguyor wəlet tay va magamas məkol mani, hurzlumit tay əpel kuket nawzet ɗiyi, muwən na barway tay əgilyen sə meti.

¹⁴ Met aknahək də mefɗeke gəm matatrahã.

¹⁵ Tilit tay petpet ammba əkgbo' mbeli.

¹⁶ Əza gəm tatwãh tahəŋ aket tiveɗ neti.

¹⁷ Dəsənnən tive na zazay ɓa.

¹⁸ Geslne na Maŋgəlva tay a maheret ɓa.

¹⁹ Məsənək na, an mahenziŋ adawpel pak, sit ɗiy en nammba mahenziŋ adawpel siti, vi ma ɗəf pak dəsangən kpuɓu, mammba dələv pak dəsəngən na məs mambrayə aba Maŋgəlva.

²⁰ Vi ɗəf tay nawsan təstəs aban də əzban wəza na mahenziŋ ɓa. Vi mahenziŋ əsən mambray arban kaka'ə.

Tive na Maŋgəlva nawrah əkõho ( 3:21—4:25 ) Mbarmbar Maŋgəlva adawkõhgit ɗiy di

²¹ Ya kakaŋ na, təstəs na Maŋgəlva məs mahenziŋ dit məskəleŋɗe apeleŋ akan far arbək məza də mahenziŋ ɓa.

²² Təstəs na Maŋgəlva də ətaf Yesu Kristu viyit ɗiy məs dətafaŋ pakə. Vi uɗak tay aban ɓa.

²³ Ɗiy pak aɗɗaŋgək mambraya, awɗakaŋgək səza gagdak na Maŋgəlva;

²⁴ Ya na mekeleŋgi akkpaŋgaŋ təstəs də mbəlembəle nani. Də Yesu Kristu məs dəbite.

²⁵ Ndəni məs Maŋgəlva aɗi ka navvuyon mambray dit mbel nan də tive na ətafa, vi karban təstəs nani; vi appanək mambray an məɗɗan lahəŋ məza ətawwən akan ɓa,

²⁶ addəv əɓəs nani, Maŋgəlva aŋgəl karban təstəs nan addəv pay an kakaŋka, vi ndən sən kiyən dəsangən təstəsə gəm kawɗi məs dətaf Yesu pak ka ɗəf təstəsə.

²⁷ Ya ŋgay ənnek kan di? Tay ɓa. Də tive na mahenziŋ awandi? Net wəzeɗe sa? Vaski ɓa, də tive na mahenziŋ na ətafi.

²⁸ Vi məsənək na, də ətafi ɗəf adawsan təstəsə məza də wəza na mahenziŋ ɓa.

²⁹ Awaniɓa Maŋgəlva net mə Yudeɗi kaka sa? Net ɗiy-ɗari ndən ɓa sa? Ha'aw, net ɗiy-ɗari yi'e,

³⁰ adan Maŋgəlva taka yi nawɗi məs dəskəlawra təstəs də ətafa gəm məs dəskəlawra ɓa də tive na ətafa.

³¹ Aməzan mahenziŋ kan də tive na ətaf sa? Agəɗ na ɓa! Ya dərəŋ na, ki mahenziŋ mədawɗiya.