Roma 2 - Bible en Guidar

Ətawwən na Maŋgəlva

¹ Vini, is ɗəf mətaw wən aka ɗəf pak təki narma vok tay ɓa, vi an is tat ətaw wən aka ɗəf maɓɓani, aka zuk kədawtawən, vi zəga məstaka kədaɗɗa də ɗəf məs kədawtaw wən akani.

² Məsənək na, ətawwən na Maŋgəlva aket ɗiy məɗɗaŋ zəgeɗ vas aslək də gegesiŋ.

³ Ya, is əɗɗumon na, is ɗəf mətaw wən aket ɗiy məɗɗaŋ zəgeɗ vaska yaŋ kədaɗɗa va neti, azok na wakəkõh səma ətawwən na Maŋgəlva sa?

⁴ Awaniɓa moggon nani, əssa nan haran sekke gəm əɓəs nan kədawzelen sa? Məza əsən tay akan ɓa, kəsən na moggon na Maŋgəlva tay əreɗuk kəɗigən marava ɓa sa?

⁵ Ya, də ki ɓəɓəl noko gəm mokrok məs awɗi marava ɓa, is tat əkkalan ədagədəv akoko, pay ədagədəva gəm ətawwən na Maŋgəlva də təstəs adarba,

⁶ məs nawfaɗ sən ɗəf pak va aza wəza nani.

⁷ Zeŋgile nassa faɗ sit en məsokən zit əɗɗa moggoni, məkayanən gagdaka, əɗi kiya gəm zeŋgile məs amta ɓa.

⁸ Ya ədagədəva gəm herɗe nan aketi en məgayaŋ ka adawɓe'eŋ sənən gegesiŋ ɓa gəm kazban ɗarɗarə.

⁹ Əzəm sahã də tatwãh aka ɗəf məgəɗ wəza mbərayən pakə, daabəŋ nani aka mə Yuda, asna aka mə Gərek.

¹⁰ Gagdaka, əɗi kiya gəm zay aka ɗəf məgəɗ wəza moggon pakə, daabəŋ nani, aka mə Yuda, asna aka mə Gərek.

¹¹ Vi uɗak tay aza Maŋgəlva ɓa.

¹² Ɗiy məs tahəŋ də mahenziŋ ɓa dəɗɗaŋ mambraya, wazaŋ məza də mahenziŋ ɓa'e. Ya en məs də mahenziŋ dəɗɗaŋ mambray pak, kawtawi wən aket də mahenziŋ.

¹³ Vi məprəmaŋ mahenziŋ də sləmetiŋ təstəs aba Maŋgəlva ɓa, abbər məɗɗaŋ wəza də mahenziŋ nassoŋ təstəsə.

¹⁴ Vi an ɗiy-ɗar məs tahəŋ də mahenziŋ ɓa, an tay əɗɗanən an mahenziŋ anah sən kiyti, ndəɗaŋ məs tahəŋ də mahenziŋ ɓa, aɗiyaŋgək mahenziŋ sən kiyti.

¹⁵ Tay ərbanən na wəza na mahenziŋ tay məverin a mekreti; kpukpum na mekret tay ərbani, əɗɗum net pak tay ətaw wən aketi awaniɓa əka wən ammbet taka taka

¹⁶ pay an Maŋgəlva adataw wən də Yesu Kristu aka an dəsan məɗɗa net ɗiyi, va aza Alabara nenek nawa.

Mə Yudeɗ də mahenziŋ

¹⁷ Ya an nok mə Yuda adawyukuni, ya is əɗi əɗɗum nok aka mahenziŋ gəm ənnek nok aka Maŋgəlva,

¹⁸ is tat əsən əŋgla nani, is tat əwel an moggoni adan mahenziŋ akol suk kiyko.

¹⁹ Kətafək əssa məkdah deŋgerɗe, əkeɗeɗe net ɗiy nara guzli dəvoko,

²⁰ məyeget dərweŋge, mərbəzəga sit kirin məmeɗeŋɗe, vi əsəna gəm gegesiŋ nok na suwerin səddəv mahenziŋ kəraha.

²¹ Is mərbəzəga sən ɗəf mbərən, karban sən zuk ɓa sa? Is mətəl ma na, ɗəf adawhãl ɓa, is əhãl sa?

²² Is mənah na, kədawkuh a gizbe ɓa, is əkuh a gizbe sa? Is tat əzel tuyeŋge, is əppohet gəleɗe net sa?

²³ Is mənneken zuk də mahenziŋ, is əraygən iya na Maŋgəlva də əggar ki mahenziŋ sa?

²⁴ Vi iya na Maŋgəlva tay əray aka wən nokum a walaŋgit ɗiy-ɗar va məverin.

²⁵ Əskəlawra tay də ətərwəraya an is tat əɓe' sən mahenziŋ; ya an məggar ki mahenziŋ kənani, əskəlawra nok akkpaŋgək əskəlawray ɓa.

²⁶ Ya an ɗəf məs dəskəlawra tay əɓe' sən mahenziŋ, əssa nan məza dəskəlawra ɓaŋ na aŋgəɗ na va əskəlawra ɓa sa?

²⁷ Ɗəf məs dəskəl awra ɓa aza əssa nani, məzəɗɗa an mahenziŋ anahə, watawwən akok iskəŋ məs də ɗerewel na mahenziŋ gəm də əskəlawra məzəggar ki mahenziŋ.

²⁸ Vi əssa mə Yuda na aza an dədawlay ɓa, an dədawla appaka aka gəɓa zə ɗəfi əskəlawra ɓa.

²⁹ Ya əssa mə Yuda təstəs na addəv mahaɗamay, əskəlawra nan na a makrani, səza an məverin asil ɓa, səza Əmpəsi, əɗi kiyən səzet ɗiy ade ɓa səza Maŋgəlva yi ade.