Roma 16 - Bible en Guidar

Əsɗa

¹ In tat əslən sukumət Fobet məlməmə, məgəɗ wəza naddəv Gəla na Maŋgəlva na Keŋkeriya tə.

² Mətafət də iya na Daya va an dəslə azet məzutafaŋgə, məsla zukum nabbah sət addəv wəray nat pakə, vi təbbah sitik ɗiy diyɗa, təbbah suwəka'e.

³ Məsɗet mãy Piriskilla də Akilas, məɗɗaŋ wəza na Yesu Kristu də ina.

⁴ Net akay əzanən zeŋgilet vi kawkõhgən zeŋgilewa. Intə takərgu nədawgəɗ sit soko ɓa, ya ɗiy naddivit Gəlaɗe-na-Maŋgəlva net ɗiy-ɗar pak tay əɗɗaŋgə'e.

⁵ Məsɗet məzutafaŋ məzəkkalaŋ eŋgil anetda. Məsɗan Epaynetus baynaw na makrawa, məs dətaf Kristu aka dələv na Asiya daabəŋ.

⁶ Məsɗat Miryam ndət məs təgəɗ wəza diyɗa vikum.

⁷ Məsɗet mãy Andronikus də Yuniyan həlfiŋgiɗwa, makayeŋgiɗu na fərsənaŋ. Də gagdakəŋ a walaŋgit maslənɗe, ndəɗaŋ dətafən Kristu daabəŋ kiwa.

⁸ Məsɗan Ampliyatus baynaw na makraw addəv wən na Daya.

⁹ Məsɗan Urbanus, məgəɗ wəza na Kristu də mənamə, gəm Stakus baynaw na makrawa.

¹⁰ Məsɗan Apelles, dərban təstəs nan addəv Kristu, məsɗet ɗiy neŋgil ana Aristobulus da.

¹¹ Məsɗan həlfu Herodiyon. Məsɗet ɗiy neŋgil ana Narkissus da, məs dətafən Daya.

¹² Məsɗat Trufayna dət Trufosan, məs dəsokən zit diyɗa addəv wəza na Daya. Məsɗat Persida, məlməm məs məŋgələ, təsoku zət diyɗa addəv wəza na Daya.

¹³ Məsɗan Rufus, məwelin vi wəza na Daya, gəm mani ya mawtə'e.

¹⁴ Məsɗet mãy Asiŋkritus, də Felegon, də Hermes, də Patrobas gəm Hermas, dit milmiŋgiɗəm məs dədassoŋ dənɗaŋ.

¹⁵ Məsɗet mãy Filologus, də Yuliya, də Neriyus, dət məlməni, gəm Olimpas, dit məzutafaŋ məs dədassoŋ dənɗaŋ pakə.

¹⁶ Məsɗan zukum də ərma zukum na zazaya. Məzutafaŋ na Kristu pak asɗokumunko.

Əsəɓ an bayma faɗə

¹⁷ Ya in tat əsɓokum milmiŋgiɗwa, məsla zukum səzet ɗiy məsilginin uɗaka gəm əzbərgit ɗiyi, də əzelen əyak məs kərahaŋgə. Məzar səzeti.

¹⁸ Vi zeŋvit ɗiy en veski, wəza na Daya nam Kristu adaɗɗaŋ ɓa na gədivti. Tay əmbəɗetin ɗiy məs dəsənaŋ gabba zəga ɓa də ma neneke gəm də əpel nawmbəɗa.

¹⁹ Vi ɗiy pak asənnənək əprəm ma nokum, ndəni kan nədanneken zu aka wən nokum, ya nəŋgələk kəssoŋgən məs maɗɗula dəwəl sən əɗɗa moggoni gəm bartata dəwəl sən əɗɗa mbərayən.

²⁰ Maŋgəlva, afən zazaya, aliy na daŋkən Satan ammba təlkum ɓa. Mbəlembəle na Daya nam Yesu dəsan akokum.

²¹ Timote məgəɗ wəza də in tay əsɗokum, gəm Lukiyus gəm Yason gəm Sosipatrus həlfiŋgiɗwa.

²² Nəsɗokuməko, in Tertiyus məs dəver letərəŋ də iya na Daya.

²³ Məsgəlaw Gayus, məs məzutafaŋ baymet adakkalaŋ eŋgil ananda asɗokumko. Erastus mərəm deleɗ net ɗiy na walaŋgəla-metiŋ asɗokumko gəm Kawartus məlməmə. [

²⁴ Mbəlembəle na Daya nam Yesu Kristu dəsan akokum pakə. Amin!]

Əɗikiya an nagrakən

²⁵ Məgagdakan səm Maŋgəlva, tay də gbogboŋ nawziwgukum ɓəlɓəl addəv ətafa va Alabara nenek məs nədarban aka Yesu Kristu, aslək də ərba na wən məɗama dəsan haɗamma lahəŋ farə.

²⁶ Ya kakaŋ kan na, arbanək zən də ɗerewel net məskəleŋɗe: Va wən məs Maŋgəlva Məfaɗ aɗi wən nani, arban sitik ɗiy nammba dələv pakə, vi dəɓe'eŋ sənəngən də ətafa.

²⁷ Maŋgəlva yi məs maɗɗula kaka'ə, gagdak səni də Yesu Kristu hã faɗə. Amin!