Roma 15 - Bible en Guidar

Əɗɗa an nannek zə megge məza an nannek zuk ɓa

¹ Mənam məs də əɓapa, adahək məslangən əvvir net ɗiy məddekti. Mədaɗɗa an nannek zəm ɓa.

² Ɗəf nam pak dəgəɗ an məs nannek zə meggeni vi moggon nani gəm kawɓaygən addəv ətaf nani.

³ Vi Kristu dəkayan an nanneken zən ɓa. Va məverin na: Əra net ɗiy məzurokun akkpaŋgək akawa.

⁴ Vi an məverin far pak, vi kapsəm əyaki məverin, ka mərahgən əga də əɓəs gəm də əhhaɗ məs Əver adahhaɗamə.

⁵ Maŋgəlva məs dədapsəm əɓəsa gəm dədahhaɗamə, dəpsukum əɗɗum məstaka a walaŋkum va na Yesu Kristu aŋgələ.

⁶ Ka kəgagdakanəngən Maŋgəlva, Afən Daya nam Yesu Kristu, addəv əssa məslerkum, mokum taka.

Alabara nenek viyit ɗiy pakə

⁷ Vini kana, mətaf zukum va Kristu atafkum, vi wagagdakan Maŋgəlva.

⁸ Nəmna: Kristu akkpaŋgək məgəɗ wəza net məs dəskəlaŋ awra vi gegesiŋ na Maŋgəlva, ka kaknahan iynama nan sit efiŋgiɗmə.

⁹ Ɗiy ɗar tam dəgagdakanəngən Maŋgəlva sən ulasahã nani, va məverin na: Sən aski, nadawɗi kiyuk aret ɗiy-ɗarə gəm wanətibiren iya nok də gəlya.

¹⁰ Yaŋ anah əmpa: Ɗiy ɗarə, mənneken zukum sap dit ɗiy nani!

¹¹ Gəm əmpa na: Məɗi kiy Daya, ɗiy naka dələv gboŋgu, ɗiy pak dəgagdakanəni.

¹² Isaya anahək əmpa na: Suwer Yesse wasani, ndəni nawsilyen kawzəm məlĩ aket ɗiy-ɗarə, akani ɗiy-ɗar adawɗiyən əga neti.

¹³ Kəta Maŋgəlva Afən əga dəknahkum də ənneke gəm də zazay addəv ətafa, vi əga nokum dəɓaygən də əɓap na Zeŋgile Salala.

Əgrakən gəm əsɗa nawray nani ( 15:14—16:27 ) Pol tay də tive nawver va avere

¹⁴ Milmiŋgiɗwa, in sən kiyu nəsənək lewlewi, məknahkum də əɗɗa moggon kənanəni, kəknahaŋgək də əsəna, wakəɓapən əsəɓ sən zukum.

¹⁵ Ya nəver sukumək də zu soksoku, vi kaɗɗumon sukum an kəsənaŋ səkayə, də mbəlembəle na Maŋgəlva məs avayə,

¹⁶ ka nəsawgən aka wəza na Yesu Kristu viyit ɗiy-ɗarə. Nəppanək ki zu sən Alabara Nenek na Maŋgəlva. Vi ɗiy-ɗar dəssoŋgən əvəl məpsən Maŋgəlva məs ataf lewlewi, məs Zeŋgile Salala akkpaŋget salala.

¹⁷ In tat də ənnek addəv əsap də Yesu Kristu, aka wən na wəza na Maŋgəlva.

¹⁸ Vi, zəga tay nədawpel abbər an məs Kristu agəɗ addəv wəza naw vi kawki ɗiy-ɗar addəv əɓe'i ɓa ɓa, də əpele gəm də wəza.

¹⁹ Də əɓap net sekeneɗ gəm zəgeɗ naggət aketi, də əɓap na Əmpəs na Maŋgəlva. Təŋ sə Yerusalem kiyən tuwəɗ hã gap a Illuriko nərbanək Alabara Nenek na Kristu.

²⁰ Vasna, nəɗiyək gagdak aka ərban Alabara Nenek a təki məs məɓlay iya iya na Kristu adak ɓa, vi nədarka aka gabban məs ɗəf aɗi ɓa.

²¹ Va məverin na: Məs məpel siti ɗah wən nan ɓa, wawlanəni, Məs dəprəmən ɗah wən nan ɓa, waprəməni.

Pol tay əpel aka wən nan nawmbat malaka a Rom

²² Aski dətaku təl ɓəɓɓay dadda anokumda.

²³ Ya kakaŋ na, Adan təki naɗɗa wəza naw tay aket dəlvəŋgeŋ ɓa, wəzva ɓəɓɓayi maw adazzan aka əda anokumda.

²⁴ Pay nədaddaw a Espay, in tat də əɗɗum namzla ulukum dawtoŋgo. Kəlhãwəngən kan adaka, an nənanək əssa də munokum pay siɗikke.

²⁵ Ya kakaŋ na, in tat əmbat a Yerusalem əɗɗa wəza sit ɗiy na Maŋgəlva.

²⁶ Vi məzutafaŋ na Makedoniya də Akaya awlanənək na moggoni, əsapan zəga ammbet məssehẽŋɗe naret məzutafaŋ en na Yerusalem.

²⁷ Aɗɗanənək də ənneke, aslək dəɗɗanəngən vas ammbeti, adan ɗiy-ɗar arahaŋgək haran net səza ərəh na Əmpəs neti. Aslək tam dəɗɗaŋgən wəza ammbet də ərəh neti.

²⁸ An nəgrakək wənəs kana gəm nəpsitik zəga məkkalən nak keret ɗiy pakə, wanətoŋ kəla nokumda əmbat a Espay.

²⁹ Nəsənək na, an nadaw anokumda, məknahu də əzaɓ na Kristu nədaddawa.

³⁰ Ya in tat əhhaɗokum milmiŋgiɗwa, də iya na Daya nam Yesu Kristu gəm də əŋgla na Əmpəsa, kəgayaŋgən sap də in addəv əkkam ammbaw aba Maŋgəlva.

³¹ Vi nəkõhgən səvet ɗiy məs dəsənən Maŋgəlva ɓa sə Yude, gəm vi məzutafaŋ dətafnəngən wəza naw ammba Yerusalem əŋ lewlewi.

³² Vas na, wanəde anokumda də ənneke, an Maŋgəlva aŋgerke, wanəffet azokum.

³³ Kəta Maŋgəlva afən zazay dəsan dəndəkum pakə. Amin.