Roma 14 - Bible en Guidar

Kədawtaw wən aka məlmuk ɓa

¹ Mətaf ɗəf məddakən addəv ətafa, məza əzelen əɗɗum nan ɓa.

² Ətaf na ɗəf maɓɓan tay əpsən tive dəzəm zəga pakə. Ya ɗəf maɓɓan tam sən əddak nani ndən əzəm teɓ gaslamba kaka'ə.

³ Məzuzəm zəga pak adawzelen məs awzəm pak ɓa ɓa, məs awzəm pak ɓa tam adawtaw wən aka məzuzəm ɓa, vi Maŋgəlva atafka.

⁴ Nok istə nawa nawtaw wən aka məgəɗ wəza na ɗəf di? Dəsan ziw ɓəlɓələ awaniɓa dəskot zlaŋ, ana daya nan awəl səni. Gesiŋ waziw ɓəlɓələ vi Daya waɓap əɗɗan ka dəziwgini.

⁵ Ɗəf maɓɓan tay ulan na, dəɗah pay aŋ ki pay andaka, ɗəf maɓɓan tay ulan na, pay pak dakadakay yi. Ɗəf pak də əsən nani, dəzbani.

⁶ Məzlək sləma aka paya, sən Daya adaɗɗani, məzəm zəga pakə, vi Daya adaɗɗani. Vi tay əɗɗa soko sən Maŋgəlva. Məs awzəm zəga pak ɓa, vi Daya yi azəm ɓa vani, tay əɗɗa soko sən Maŋgəlva.

⁷ Vi ɗəf tay təttaka səmmbam məs dəsan madaran na kiyən ɓa, ɗəf tay dədamta na kiyən ɓa'a.

⁸ An mənam tat madaramə, vi Daya məsam madaramə. An məmtəka, vi Daya məmtə. Kəta məsam madaramə, kəta məmtə, na Daya mənani.

⁹ Vi aski Kristu amtə, amsak əmbəla, vi kawsan məlĩ aket ɗiy məmtiti gəm aket ɗiy medereti.

¹⁰ Ya nok vimi kədawtaw wən aka məlmuk di? Awaniɓa vimi kədawzelen məlmuk di? Vi nam mənam pak, aməziw aba ətawwən na Maŋgəlva.

¹¹ Vi məverni na: Də zeŋgilewa Daya anahə, ɗiy pak wakdukun takperet abawa, ma pak wagagdakan Maŋgəlva.

¹² Vas kan na, mənam pak waŋɗan an məgəɗ sən kiyəm sən Maŋgəlva.

Kədazbərgən məlmuk ɓa

¹³ Məppan səm ətawwən aka zəmə. Ya ətawwən vanəs dərəŋ dəsan ka mədaɗɗa zəga nawtaŋgbaygən məlməmə awaniɓa naskotgən ɓa.

¹⁴ Nəsənək lewlewi, də wəsap də Daya Yesu na, zəga tay mərnokun sən kiyən ɓa, abbər an ɗəf aɗiyən ka mərnokum azani, asna zəga nan wasan mərnokum azani.

¹⁵ An kədanək gədəv məlmuk dəka way nawzəma, asna kədaw aka əŋgla ɓa. Kədawzan ɗəf məs Kristu amtə viyən də way nok ɓa.

¹⁶ Ɗəf adawraygən sləma an kədawɗiyaŋ ka zəga moggon azokum ɓa.

¹⁷ Vi məlĩ na Maŋgəlva na, wən na əzəma gəm əsa iyi ɓa, ya təstəsə, zazaya gəm ənnek addəv Zeŋgile Salala iyi.

¹⁸ Vi ɗəf məs dəgəɗ sən wəza sən Kristu addəv as pak na, tay lew aza Maŋgəlva, ɗiy wannekeŋ dəndəni.

¹⁹ Vas kan na, məzbet səm zəgeɗ en nawki zazaya gəm en nawɓaygəm a walaŋ zəmə.

²⁰ Kədawraygənən wəza na Maŋgəlva dəka wən na way ɓa. Zəga pak salalay, ya zəga mbərayni aza ɗəf məs dəkkpaŋgan zəga nawzəm nan ka nawtaŋgbaygən ɗəfa.

²¹ Dəɗah kədawzəm slu ɓa, kədawsaŋ mbazla ɓa, kədaɗɗaŋ an nawtaŋgbaygən məlmuk ɓa.

²² Arma ətaf nok a mokrok aba Maŋgəlva. Əzaɓi aza ɗəf an məs arma ki zən addəv uwel nan ɓa.

²³ Ya məzuzəm də əɗɗa kuzuŋ, mətawi wən akan səkayə, vi əɗɗum van dəsil səza ətaf ɓa. Ya məs dəsil səza ətaf ɓa pak mambrayi.