Roma 13 - Bible en Guidar

Əɓe' sit deyeɗe na dəlva

¹ Ɗəf pak dəɓe' sit deyeɗe na dəlva. Vi daya na dələv tay məza Maŋgəlva dəɗi ɓa ɓa. Deyeɗe na dələv pak Maŋgəlva dəɗiye.

² Vasna, məzuɓoŋ aket deyeɗe na dələv pak, ki an Maŋgəlva aɗi azlahə, məzuɓoŋgoŋ pak ətawwən adawkiyaŋ aketi.

³ Vi məlyeŋge na nawgəslne' sitiŋ an ɗəf tay əɗɗa moggon ɓa, an ɗəf tay əɗɗa mbərayni yi. Mok tay aka əgeslne sən daya na dələv ɓa sa? Agəɗ moggoni, asna wakərah əɗi kiya səzani.

⁴ Vi məgəɗ wəza na Maŋgəlva yi vi moggon noko. Ya an mbərayən kəɗɗa na, ageslne'i, vi ɗari alaw masalam ɓa, məgəɗ wəza na Maŋgəlva yi kagrakan ədagədəv nan aka məgəɗ mbərayən.

⁵ Vini, aslək nawɓe' səni, aka ədagədəv nani kaka ɓa, ya vi əɗɗum na mokrokum.

⁶ Vi aski'e kədawfaɗaŋ nzalaka. Vi məzutafnən vet Maŋgəlva dəɗi dəɗɗanəngən wəza vanəs ɗayɗayə.

⁷ Sən ɗəf pak məfaɗ sən an dəslə səni, nzalaka sən məkkal nzalaka, an mətawən nawfaɗ sən məs dətawa, geslne sən an nawgeslne səni, əɗikiya sən an nawɗi kiyən.

Əŋgla na megge

⁸ Dəmən na ɗəf adawsan akokum an əŋglu zukumi ɓa ɓa. Vi ɗəf məs dəŋglu meggeni, aknahanək mahenziŋ.

⁹ Vi mahenziŋɗe: Kədakuh a gizbe ɓa, kədawbay gəbay ɓa, kədaw hãl ɓa, kədawsim zəga ɓa. Mahenziŋɗe meɓɓet pak tay əsapaŋ addəv əpeliŋka: Aŋglu meggok va kəŋglu kiyko.

¹⁰ Əŋgla aɗɗa wəza mbərayən sən megge ɓa. Əŋgla na əknahan mahenziŋgi.

Əssa məsla zuk əga əzza na Kristu

¹¹ Adan kəsənənək pay məs məsamə, pay nafɗah səket sin nokumi, vi kakaŋ əkõh nam go'oy day ki aka mətəŋ ətafa.

¹² Dəfəɗ atirik sawɓa, go'oy aza əddaŋga, məppet sim wəzeɗe nara guzliyo, məlaw sim gulomɗe na əkeɗeɗe'e.

¹³ Mədawsəm va məs dəslə, va kapaya, məza əzəm də əsa mbazla day ɓa, əkuh a gizbe mãy ɗarɗar ɓa, əgaya gəm kotorok ɓa.

¹⁴ Mugul Daya Yesu Kristu azoku dərəŋgə, kədappanən zukum sən əŋgla na gəɓa zukum kaɗɗa əŋgla nan ɓa.