Roma 12 - Bible en Guidar

Ədaw na məkristu ( 12:1—15:13 ) Zeŋgile meleketen aka wəza na Maŋgəlva

¹ In tat əɓɓəlokum kana milmiŋgiɗwa, də ulasahã na Maŋgəlva kərahaŋgəŋ na, məpsən zukum ka əzaɓ-Maŋgəlva madarani, salala, məs dəslə sən Maŋgəlva. Aski əpəl nokum dəslə na əpalən.

² Kədappanən zukum əkkpaŋ ammba ənziya eggeŋ ɓa, məppan Maŋgəlva əkkpaŋgokum dəpsukum əsən meleketeni, vi kawsən əŋgla nani, an moggoni, an nannek zəni gəm an moggon gərakə.

³ Də mbəlembəle məs məvaya, in tat ənah sən ɗəf səmmbokum pak na: Kədaɗɗumoŋ aka gagdak na zukum dayki an dəslə sukum ɓa, ya məɗɗum əɗɗum an salala, naway pak va əsla na ətaf məs Maŋgəlva apsəni.

⁴ Vi, va gəɓa zəm asan dit zəget diyɗa azani, zəgeɗ nazan vet pak wəza net taka yi ɓa,

⁵ vaski yi'e, mənam diyɗa, gəɓa zəm taka yi addəv Kristu, zəgeɗ naza gəɓa zəm taka taka nam pak mənani.

⁶ Mərahək əvəl na mbəlembəle temtem va aza məpsəmə, an əvəl na kəleŋgi, əɗɗan na sap də ətafa.

⁷ An əvəl na wəza yi, dəɗɗa wəza nani. An əvəl narbazəga yi, dərbani.

⁸ An əvəl nahheɗet ɗiyi, dəhheɗeti. An dədaŋgla əvəla, dəɗɗa makran taka. An dəssan daya, dəɗɗa zən soksoku. An məwəl sahãy, dəɗɗa də zən neki.

⁹ Əŋgla nokum adawsan də muluvuluvu ɓa. Məzel mambraya, mətip aza moggoni.

¹⁰ Məssoŋ də əŋgla, məknəhkum də əŋgla na məlma a walaŋ zukum, əɗi kiya dəsan a walaŋkum, məza əgay ɓa.

¹¹ Də əsok zukum məza tampəl ɓa, də əmpəs nawziw ɓəɓəl, məgəɗ sən wəza sən Daya.

¹² Mənnek də əga nokum, məɓəs tatwãha, məkkam pay pakə.

¹³ Məbbah sit ɗiy na Maŋgəlva addəv wəray neti, məzban ətef melekeɗi.

¹⁴ Məɗɗa əzaɓa aket məzusərnən mokum, məɗɗa əzaɓa məza mefɗeke ɓa.

¹⁵ Mənnek dit məzennekeŋgi, məhəm dit məzuhəmaŋgə.

¹⁶ Məssoŋ məslerkum a walaŋ zukum, kədawkayaŋ gagdak ɓa, dəɗah mətaf wəza an məs tay də gagdak ɓa, kədawɗiyən ki zukum na va kəsənənək zəga pakə ɓa.

¹⁷ Kədamndaganən mbərayən də mbərayən sən ɗəf ɓa. Məsok zukum əɗɗa wəza moggon a maheret ɗiy pakə.

¹⁸ Va wagəɗ na, va kədaɓapən pak, məssoŋ zay dit ɗiy pakə.

¹⁹ Bayneŋgiɗwa, kədamndaganən harat huloŋguk dəvokum ɓa, məppan təki sən ədagədəv na Maŋgəlva, vi məverni na: Naw wanəmpəlkiya, intə nawfaɗ səni, Daya anahə.

²⁰ Ya an mãy tay əda məzuzelko, apsən əzəma; an meme tay ədanəni, apsən iŋkile dəsə. Vi də əɗɗa vasna, slayoffo kədakkalan aka kini.

²¹ Kədappan mbərayən əska wəlok ɓa, aska wəla mbərayən də əɗɗa moggoni.