Roma 11 - Bible en Guidar

Maŋgəlva dəzgan Israyel ɓa

¹ Nənahək kan na, Maŋgəlva azgetik ɗiy nan sa? Tay vas ɓa! Vi mə Israyel nani, mazlalwã na Abraham zev Benyamin.

² Maŋgəlva dəzget ɗiy nan məs asən dafsən ɓa. Awaniɓa Kəsənnən an Əver apel aka wən na Eliya aka adawɓuh man aka Israyel aza Maŋgəlva na:

³ Daya abeyinik məskəleŋɗe noko, aɓzluwinik matuyaɗe noko. In takərgu nəpələ, tay əkayanən zeŋgilewa ɓa sa?

⁴ Mbar Maŋgəlva azlan sən di? Aɓsən na: Nəpələk ɗiy gabal buhul ammba ki zuwa məs duddukun takpret aba Ba'al ɓa.

⁵ Vaski kan addəv pay an kakaŋka'e, tahəŋ məs dəmbraŋ va aza uwel na mbəlembəle.

⁶ Ya an də mbəlembəle yi na, də wən na wəza yi ɓa; an vaski na mbəlembəle van mbəlembəle əmpa ɓa.

⁷ Mi kan di? An məs Israyel akayani, dərəh ɓa. Məweleɗe na, arəhənka. En meɓɓet aɓɓəlanənək kiyti.

⁸ Va məverin na: Maŋgəlva apsitik əmpəs nawleŋge. Heret məza awəl na ɓa gəm sləmet məza aprəm na ɓa ha gap pay dəpaŋka.

⁹ Davit amna: Way net dəsan sit ka bizwil gəm ka mazzaɗə, ka zəga nazbərgiti gəm nawfaɗ an dəslə siti.

¹⁰ Kəta heret dəgrifi, vi adawlaŋ ɓa. Pay pak aɓe'gən gəɓeti.

¹¹ Nənah kan na, ataŋgbayãŋ na vi kazbər sa? Tay vas ɓa! Ya sən heslepe neti yi, məpsit əkõh sit ɗiy-ɗarə, vi kawsilgin kotorok neti.

¹² Ya an heslepe net akkpaŋgək ka ərəh na dəlva, əddak net ka ərəh net ɗiy-ɗar na, əsilye net ziw waki əzaɓ dayə.

Əkõh net ɗiy məza mə Yudeɗiŋ ɓa

¹³ In tat ənah sukum mənokum ɗiy-ɗarə: Adan intə maslən azet ɗiy-ɗarə, in tat əgagdakan wəza nawa.

¹⁴ Kuzuŋ wanəsilgən kotorok net həlfiŋgiɗwa, ka nəkõhgitgən ɗiy meɓɓet səreti.

¹⁵ An əndol net akiyək əsler na dələv də Maŋgəlva na, mbar əmsak əsap net adawsan an əmilye səka əmta addəv zeŋgile yi ɓa di?

¹⁶ An memteke mərɗan daabəŋ salala yi, an məzbəkən pak salala yi. An suwer wəlaŋga salala yi, kivan vaski yi'e.

¹⁷ An məlotni kiva wəlaŋga səzani, an mətipku yi is hereme nawra a gəleti, an kərahək haran nok səza suwerin də səza telembe na hereme vani,

¹⁸ kədawkaɓ aka kivan an məlotnəŋ ɓa. An is tat əkaɓa, asən hara kan na, istə kəslan suwere ɓa, suwere dəsloko.

¹⁹ Kuzuŋ wakənah na: Məlot kivan na, vi kawtipu a gəlani soko.

²⁰ Gesiŋ, ya məlotən na, vi dətafaŋ ɓa yi. Noko, mətipuk na, vi kətafi, vi vaski kədawkaɓ ɓa, ageslne' dərəŋgə.

²¹ Vi an Maŋgəlva dəppan kiva wəlaŋga na man ɓa, asla zuko appok na ɓa.

²² Azlək sləma aka moggon gəm daraw na Maŋgəlva, daraw nan aket en məlotti, moggon nan akoko an kəsokuk addəv moggon vani, an vaski ɓa na, nok pak kawlotki yi.

²³ Net tamə, an dəssoŋ addəv əgəsa na ətaf ɓa, kawtipti yi. Vi Maŋgəlva tay də əɓap namsak ətipti

²⁴ Vi an nok məlotki səka hereme nawra məs kəsok akan lahəŋka, mətipkuyi aka hereme neŋgili, eŋkiŋ dərəŋ nawtip day aka hereme an net məs assoŋ akan far lahəŋka.

Əkõh net ɗiy na Israyel an bayma faɗə

²⁵ Vi maw tay aka kəssoŋgən məza əsən mahaɗamaŋ ɓa milmiŋgiɗwa, vi kədawɗinən kikum va məsmaɗɗulet ɓa: kiɓəɓəl net mə israyelɗe meɓɓet wasan hã gap an ɗiy-ɗar pak atoŋgoŋko.

²⁶ Asna Israyel pak wakõh va məverin na: Sə Siyon məpəl ɗiy adazzani. Wazargən əkəw aba Maŋgəlva səza Yakob.

²⁷ Aski wənmiyna naw dənɗaŋ, pay nədavvuyon sit mambray neti.

²⁸ Dəwəl sən alabara neneke, məzuzelɗeŋgə, ammbokum; dəwəl sən uwele, məŋgliwtiŋ sən wən net əfiŋgitti.

²⁹ Vi əvəl na mbəlembəle gəm iya na Maŋgəlva avviyoŋ na ɓa.

³⁰ Vaska'ey nokum far lahəŋka, kəprəmən ma Maŋgəlva ɓa, ya kəkaŋ na, awələk sahã akokum sən əɓoŋ neti;

³¹ Vaski net kakaŋka'e, dəɓe'eŋ sənən vi awəl sahã akokum ɓa, vi net pak dərahaŋgən ulasasãh nani yi.

³² Vi Maŋgəlva amsetik ɗiy pak sap addəv əɓoŋ neti, vi kawla sahã aket pakə.

Moggon na gagdak na Maŋgəlva

³³ Arya, maɗɗula gəm əsən na Maŋgəlva kpumi. Ətawwən nan gabban akkos ɓa. Gabbet tiveɗ nan awsən ɓa.

³⁴ Vi naway dəsən əɗɗum na Daya di? Awaniɓa naway məzusəɓ nan di?

³⁵ Awaniɓa naway dəpsən zəga daabəŋ vi dəmsakgən əfaɗ sən di?

³⁶ Vi zəga pak səzani, ndən dəɗɗa gəm nani, Gagdak nani ka faɗə. Amin!