Roma 10 - Bible en Guidar

¹ Milmiŋgiɗwa, əŋgla na makraw gəm əkkam naw aza Maŋgəlva ammbet na, kəta dəkõhoŋgəni.

² In tat əpel aket gesiŋ na, tahəŋ də əŋgla na Maŋgəlva. Ya əŋgla nan dəziw aka əsən an gesiŋ ɓa.

³ Vi dəsənən təstəs na Maŋgəlva ɓa. Adan adawkayanən təstəs neti, dəɓe'eŋ sənən təstəs na Maŋgəlva ɓa.

⁴ Vi Kristu iyi əgrak na mahenziŋ vi təstəs dəsangən sən məs dətaf pakə.

Əkõh tay vi ɗəf dətaf Daya pakə

⁵ Vi an Moyis averik aka təstəs məs dəde səza mahenziŋ yaŋka: Ɗəf dəzban mahenziŋ na, wasan madaran dəndən.

⁶ Ya an təstəs məs dəde səza ətaf anah yaŋka: Kədawnah a mokrok na: Naway nawpeŋ a disiŋ di ɓa? Va ənah na: Vi kawprikgən Kristu.

⁷ Awaniɓa, naway nawpirken a delŋgeɗek di? Va ənəh na: Vi kawgilgin Kristu səret ɗiy mimtiti.

⁸ Mbar an məverin van anah di? Əpel na Maŋgəlva go'oy də isi, abaroki gəm a mokroko. Va ənəh na: Əpel na ətaf məs mədawtəl ma nani.

⁹ An kəpelik də mok na: Yesu iyi Daya, an kətafək a mokrok na, Maŋgəlva asilgənək səret ɗiy mimtiti, wakəkõhu.

¹⁰ Vi a makra iyi ətaf nawka ɗəf aka təstəs asani, də ma ɗəfi əfet adawgilye nawka ɗəf aka əkõho.

¹¹ Vi Əver anahək na: Ɗəf məs dətafa arbə na wil ɓa.

¹² Vi uɗak tay a walaŋ mə Yuda də Gərek ɓa, baymet pak Daya net taka yi, moggon nan tay aket məzuyanən iya nan pakə.

¹³ Vi ɗəf an dədawya iya na Daya pak na wakõhũ.

¹⁴ Ya mbarmbari adawyanən iya nan məza dətafnən ɓa di? Mbarmbari adawtafnən məza dəprəmnən wən nan ɓa di? Mbarmbari adaprəmnən an mətəl ma tay ɓa di?

¹⁵ Mbarmbari adawtəlaŋ ma an məsləni ɓa di? Va məver na: Mi lelew va tilit ɗiy mərbanən Alabara Nenek di?

¹⁶ Ya ɗiy pak dətafnən Alabara nenek ɓa. Isaya amna: Daya, naway dətaf an aprəməm əpel di?

¹⁷ Vaski, ətaf səza an ɗəf adaprəm adazzani, an ɗəf adaprəm van səza əpel na Kristu yi.

¹⁸ Ya nənahək na: Dəprəmnən ɓayi kan sa? Vaski dərəŋ ɓa: Wəlet aprəmək aka dələv pakə, əpel net agapək hã a təki dələv abaymani.

¹⁹ Ya nənahək na: Israyelɗe dəsənən ɓayi sa? Daabəŋ Moyis azlanək na: Wanəkkpaŋgokum məs kotorokɗe net ɗiy məs tektekəŋ ɓa, wanədan sukum gədəvkum dit ɗiy məza əsən aket ɓa.

²⁰ Isaya dəgeslne' ɓa, amna: Ɗiy məs dəkayawən ɓa dərəhwəni. Nərbanək zu azet ɗiy məs dəssohowən ɓa.

²¹ Ya aka wən net mə Israyelɗe na, amna: Nəsɓətək huruɓ ətəl vaw sit ɗiy məs aprəmaŋ ma ɓa, məɓoŋti.