Roma 1 - Bible en Guidar

Ətoŋ addəvən gəm kiywəna ( 1:1-17 ) Əsɗa

¹ Pol balam na Yesu Kristu, miyan dəsangən maslən, məɗiyən ta' nawpel alabara nenek na Maŋgəlva,

² vi aynanək far də met məskəleŋɗe nan addivit Ɗerewelɗe Salala,

³ aka an dəwəl sən Wətəni məs dəde səza mazlalwã Davit,

⁴ məs mewelin də əɓap na Zeŋgile Salala ka Wət Maŋgəlva də əsilgin səret ɗiy mimtiti, ndəni Yesu Kristu Daya namə.

⁵ Dəndəni məray mbəlembəle gəm wəza nawsləna, vi kawsilgin ətaf a walaŋgit ɗiy-ɗar pakə, dəɓe'eŋ sənəgən iya nani.

⁶ Nokum pak a walaŋgit ɗiy məs Yesu Kristu ayə kənanaŋgə.

⁷ In tat əver sukum mənokum ɗiy na Rom məs Maŋgəlva aŋgəl pakə, məs ayə kəssoŋgən salala; mbəlembəle gəm zazay na afəm Maŋgəlva gəm səza Daya Yesu Kristu dəsan akokum.

Pol man aka ədda ule məkristuɗe na Rom

⁸ Dabəŋ nani, in tat əɗɗa əsoko sən Maŋgəlva naw də iya na Yesu Kristu aka wən nokum pakgukum, vi tay əpeleŋ aka wən na ətaf nokum aka dələv gboŋgu.

⁹ Vi Maŋgəlva yi miziwe nawa, məs nadawɗi kiyən addəv əɗɗum naw də əpel alabara nenek na Wətəni, in tat əɗɗum akokum pay pakə.

¹⁰ Pay pak in tat əkkaman Maŋgəlva dəzaɓan sugən wən na əmbat naw anokumda, an aŋgerke.

¹¹ Maw aka ulukum sawɓa, vi kapsukum əvəl na Əmpəs na mbəlembəle, vi kasɓokum.

¹² Awaniɓa, ka mərahgən əsɓan zəm sap a nokum da addəv ətafa.

¹³ Milmiŋgiɗwa, nəŋgəl kəsənəngən na, təl ɓəɓɓay nəkay tive nawmbat anokumda, ya hã kakaŋka nərah tive ɓa. Vi nəŋgəl na wəza naw dəgəɗgən ətərwəray a nokumda va a net ɗiy məɓɓet ɗar da.

¹⁴ Məsdəmən net ɗiy en məkol heret dit en məkolni heret nani, gəm net məsmaɗɗuleti dit en əsən tay aketi ɓa.

¹⁵ Vaski əŋgla maw vikum mənokum na Rom, kawpel sukum Alabara Nenek tamə.

Gagdak na Alabara Neneke

¹⁶ Wil aduwən na aka Alabara Nenek ɓa, əɓap na Maŋgəlva yi vi əkõh na ɗəf məs dətaf pakə, anet mə Yudeɗ daabəŋ asna Gərekɗe.

¹⁷ Vi təstəs na Maŋgəlva tay ərba addəvən də ətafa gəm sən ətafa, va məverin na: Ɗəf təstəs wasan madaran də ətafa.

Ɗiy pak met aka əkõho ( 1:18—3:20 ) Ɗiy pak məɗɗaŋ mambrayəŋ

¹⁸ Vi ədagədəv na Maŋgəlva arbək hã sə disiŋ aka mambray də ɗarɗar net ɗiyi, məzubayən təstəs addəv ɗarɗarə.

¹⁹ Vi an ɗəf adawsən aka Maŋgəlva, tay ərba a walaŋti; vi Maŋgəlva arban sitike.

²⁰ Vi zəgeɗ məs ɗəf awle səzan ɓa təŋ səza əzəməɗ na dəlva va əɓap nan məza meŋge ɓa gəm əssa nan asan Maŋgəlva tay ərbaŋ addivit zəgeɗ en agəɗə an əsən agohonko. Vini təki narma vet asan na ɓa.

²¹ Vi asənənək Maŋgəlva ya dəgagdakanən va Maŋgəlva ɓa, dəfeteŋ akan ɓa. Yaŋ akkpaŋgaŋ ɗar addəv əɗɗum neti, mekret məs aprəm gabba zəga ɓaŋ kpaŋ guzliyo.

²² Əɗiyən kiyzit na va məs maɗɗuleti mbaraka dərweŋge akkpaŋgaŋgə.

²³ Yaŋ akkpaŋganən gagdak na Maŋgəlva məs amta ɓa, aslanən də zeŋgile zəga məzəmta va ɗəfa, biŋgeɗi, zəgeɗ məs təlit poɗo dit en mədawaŋ də gidivti.

²⁴ Vini Maŋgəlva appet dəzbanəngən əsim na makret mbərayni, dəraygənəngən zit a walaŋ ziti.

²⁵ Ndəɗaŋ məs dəkkpaŋganən gegesiŋ ka uwa wəna, yaŋ adawɓe'eŋ gəm adawgagdakanən zəga məzəməɗən mbagən məs dəzəmiɗe, məs nawgagdakan hã faɗə. Amin.

²⁶ Sən aski Maŋgəlva appet addəv əsim zəga nawraygən ziti. Muguluŋgit net akkpaŋganənək əsap an təstəs də an məs təstəs ɓa.

²⁷ Vaski yi'e, mezeŋleket net appanən əsap an təstəs dit en məguluŋgiti, ndəɗaŋ bir addəv əsim net a walaŋ ziti, ərbaŋ wil mezeŋleket dit mezeŋleketi, sə dərɓagan na, ndəni adawrahaŋ əfaɗ an dəslə aza əza neti.

²⁸ Adan dətafnən əsən Maŋgəlva ɓa, Maŋgəlva mbegit addəv əsən net ɗarəŋka, ndəɗaŋ əɗɗa zəgeɗ en naɗɗaŋ ɓa.

²⁹ Aknahaŋgək də ɗarɗarə, də əɗɗum mbərayən, də əsim deleɗ day, də daraw, aknahaŋgək də əsim zəga, də əbaygəbaya, də ərma mama, də vurum, də zəga mbərayən, məraygənən iya na ɗəfəŋ,

³⁰ məndaŋ gabba ɗəfəŋ, məzuzel na Maŋgəlvaŋ, məkutiŋ, məɗiyən kizitiŋ, məzuɗoktoŋgoŋgu, məsənaŋ əɗɗa mbərayən, aprəmən met migilit ɓa.

³¹ Tahəŋ də əsən ɓa, awziweŋ aka an aynaŋ ɓa, tahəŋ də əŋgla ɓa, awlaŋ sahã ɓa.

³² Də asənnən mahenziŋ na Maŋgəlva təstəs zlaŋ, məs dədawnəh na, məɗɗaŋ zev zəgeɗ vas pak adahaŋgək nawbeyti. Vi adaɗɗenini kaka ɓa ndəɗaŋ əmpa ənnekeŋ dit məzəɗɗənini.