Obadya 1 - Bible en Guidar

Əzga' sən Edom ( 1-14 )

¹ Ula na Obadya. An Yawe Maŋgəlva anah aka wən na Edom yaŋka: Alabara məprəm səza Yawe ade məsləni maslən a weleŋgit ɗiyi Misili! Misil səm əwaksəni.

Daya tay ərban əbzla na Edom

² Awla wanəkkpaŋgok muzliya nemmbet ɗiyi. Wakəsok məzelko.

³ Mokrok tay əmbəɗok dərwa! A popor gərəm kənanə, aka təki məɓayən, yaŋ kənah dəddəvuk na: Naway nawprikgu afuŋ di?

⁴ Va kəraɗək a disiŋ va gazla zlaŋ kəɗɗak gəla nok aweleŋgit ŋgirzleɗi, wanəprikguk sədaka. Vas Yawe aɗiymani.

⁵ An məhelɗeŋge gəm məmohoŋ zəga atoŋgoŋguk akokum də dəfɗa, wagəmən an na mekreti ya nok wakəsok kumtu'u An məhoroŋ uwa net wəleŋɗe atoŋgoŋguk addəv megezlembirke noko, wappaŋ day ki mokkoy dəŋɗedəŋɗe sa?

⁶ Vas akosonən Esaw məsənni gəla əzaɓ nani.

⁷ Karɓohoki səka dələv noko, ɗiy məs kinə wənmiyna dənɗaŋ pak wambəɗokun dərwa, beyneŋgiɗuk warmukuni ɗiy en kədawzəm way dənɗaŋgə, wanslənaŋ peweŋ aboko. Wanahaŋ na maɗɗulan tay ɓa.

⁸ Pay nan dəpaska Yawe aɗiyman na, wanəzet məs əsən aket na Edom, gəm əsən səka mossorgo metiŋ na Esaw.

⁹ Məzəlpaŋ nok na Teman wakkereŋ sən geslne hã gap bay əbey ɗiy naka mossorgo metiŋ na Esaw pakə.

Mə Edomɗe tay əryaŋ ammba əray na Israyel

¹⁰ Aka əsilye nok aka məlmuk Yakob, zəga net wil adazzan akoko kədawza kuɗupu!

¹¹ Aka kiziw gobbok bitbit gala məzuzelɗe adawkenin məzəlpa nok aka balam gala ɗiy ɗaɗarɗe adawtoŋgoŋ kəla metive noko gəm aɗɗaŋ vẽpəlwa aka Yerusalem, nok van pak kəsokuk va ndəɗaŋ.

¹² Kədannek dula pay na tatwãh na məlmuk ɓa pay na sãhã nan ɓa, kədanneken zuk aka əza net ɗiy na Yuda ɓa, kədawmas akan aka pay na tatwãh nan ɓa.

¹³ Kədawtoŋ addəv walaŋgəla-metiŋ net ɗiy naw aka pay nawzəm sãhã net ɓa. Kədannek dula tatwãh nan pay na əza nan ɓa. Gəm kədawnda arya nan aka pay tatwãh metiŋgin arəh ɓa.

¹⁴ Kədawziw aka zlazlaŋgbray tive ka kawbay ɗəf məs dəndəwəɗ dədanzan ɓa, awaniɓa karman kapsən ammba va məzuzel nan aka pay na tatwãhəs ɓa.

Pay na Daya ( 15-21 )

¹⁵ Vi pay Yawe adataw wən net ɗiy pak go'oy yi. Asna, va kəgəɗ sit ɗiyi, kaɗɗa suki vaska. Mbərayən məs kəgəɗ wamil akoko.

Israyel tay əmpəlkiya aka Edom

¹⁶ Aka mossorgo Salala nawa kəzəmaŋgək sahã hara na, ɗiy-ɗar wazbanən əzəmsahã wazəmaŋ sahã hã va tay nawpel wən nan ɓa.

¹⁷ Ya aka mossorgo metiŋ na Siyon na ɗiy en dəndəwəɗaŋ warahaŋ təki nawɗama. Kirtin Yakob watafən dələv net səvet ɗiy en dəmõhən səveti.

¹⁸ Kirtin Yakob wassoŋ va offo kirtin Yosef wassoŋ va hərzləm offo, ya kirtin Esaw wassoŋ va tərɗa, wazletini, wazetin kuɗupu, məza mbəkaŋ ɗəf madaran tətaka na Esaw ɓa. Vi Yawe dəpeli.

¹⁹ Ɗiy na Yuda wamõhnən Negev, mossorgo metiŋ na Esaw də Bagərma net mə Filistiɗe. Wamõhnən dələv na Efrayim gəm dələv na Samari. Kirtin Benyamin wamõhən Galad.

²⁰ Mə Israyelɗe məsimgiti, ndəɗaŋgə məzəlpaŋ narɓehetin mə Kana'anɗe hã Sarepta. Məs məsimgit sə Yerusalem, məs dəssoŋ a Sefarat, watefnin walaŋgəleɗe gugriɗ na Negev.

²¹ Məmetiŋ ɗiyi, wapeŋgeŋ aka mossorgo metiŋ na Siyon, sədaki adarbanən məlĩ net aka Esaw. Yawe wasan məlyã!