Nehemi 9 - Bible en Guidar

Əɗi marava aka mambray keret ɗiyi

¹ Də əvoŋ makaklaw sula kiyən poɗon na təla vanəska, mə Israyelɗe akkalaŋka də əɗɗa meme də lukutɗe na sak azeti gəm burɗuk kpu'kpu' aka kiti.

² Zev mə Israyelɗe zit welwel səret molhõyẽɗ baymeti, aziweŋ aɗiyaŋ marava aka wən na mambray neti gəm heslepe net efiŋgiɗti.

³ Amsak əsilyoŋ a gəleti, aŋɗanən ɗerewel na mahenziŋ na Yawe Maŋgəlva neti zəga na təbəz hoku; gəm əmpa zəga na təbəz hoku sən əɗi marava səka gbudukko aba Yawe Maŋgəlva neti.

⁴ Yaŋ may Yosuwa, Bani, Kadmiyel, Sebaniya, Bunni, Serebiya, Bani də Kenani asulyoŋ ziw aka təki zollo net mə Leviɗe, adaŋzlaŋ vaŋvəl dayadaya sən Yawe Maŋgəlva neti.

⁵ Yaŋ mə Leviɗe Yosuwa, Kadmiyel, Bani, Hasabneya, Serebiya, Hodiya, Sebaniya, gəm Petaya aɓɗaŋ na: «Misili! Məsokon Yawe Maŋgəlva nokum pay pak hã faɗə!» Dəgagdakanən iya nok metiŋgin məs dəday ki əgagdakani gəm ki əɗikiya pakəŋka!

Əkkam na paya

⁶ Istə Yawe, is takərguko! Istə kəɗɗa disiŋ, disiŋ naka disiŋ də dula nalpa naddivit pakə, dəlvafuŋ də an dəsan akan pakə, iŋkile də an dəsan addivit pakə. Istə kəpsən əmpəs sən zəga pakə. Dula nalpa na disiŋ tay əgduk aboko.

⁷ Is Yawe Maŋgəlva tə kəwel Abram. Kəgilgin sə Ur net mə Kaldiyeɗi, yaŋ kəɗi iya nan na Abraham.

⁸ Yaŋ kərəh na makran tay təstəs aboko, ndəni keziwgin wənmiyna dəndən napsən dələv net mə Kana'anɗe, mə Hittiɗe, mə Amorɗe, mə Perziɗe, mə Yebusɗe, mə Girgasɗe, kapsən sən zeŋvini. Yaŋ kəɗɗa va kəpeli, vi təstəs kənani.

⁹ Yaŋ kula əzəmsahã net efiŋgiɗim a Eziptə; kəprəmək vaŋvəl net ama pehe net vəlarɗe.

¹⁰ Kəgəɗək zəga narba gəm sekeneɗ aka Farawən may aket gewleɗ nan beymeti gəm aket ɗiy naka dələv nan baymeti. Vi kəsənək na tahəŋ əɗɗa daraw aketi. Kəɗiyək ki iya nok va asan pay dəpaŋkəŋka.

¹¹ Kəppraslək pehe səbeti, aggaraŋ dəddak pehe məklakani. Ɗiy en dədarɓehetin na, kəbətgitik a delŋgeɗek va gərəm ara guzlo məzubay gagay.

¹² Də kapay na, kədawək abet də dədəka na slaybuwna. Dəfəɗ tamə, də dədəka na offo, vi dəkekeɓe' sitgən tive məs adawdawaŋ dəkani.

¹³ Yaŋ Kəpirik aka mossorgo metiŋ na Sinay, kəpel dənɗaŋ hã sə disiŋ; kipsit tivenanziya an sarara gəm mahenziŋɗe na gegesiŋ, tiveɗnanziya kəɗiyə gəm an kəɗi moggon temtem naɗɗa.

¹⁴ Kərban sitik pay naffet an na salala noko gəm an kəɗi temtem naɗɗa, may əhãy temtemi, may mahenziŋ kipsit də va gawla nok Moyis.

¹⁵ Hã sə disiŋ kipsit way nawbay may neti, kəgilgit sit iŋkile səddəv milɓe vi kawbey sit meme neti. Yaŋ kənah sit dəzzoŋgən əmõh dələv məs kəslan vok napsiti.

¹⁶ Ya ndəɗaŋ dit efiŋgiɗim pak aɓoŋgoŋko, aɓɓəlanənək kiyti, dəzbanən mahenziŋ nok ɓa.

¹⁷ Aɓoŋgoŋguk daprəma, dəɗɗumetin zəgeɗ naggət aket məs kəgəɗ dənɗaŋ ɓa, aɓɓəlanən kiyti. Yaŋ aɗiyaŋ məlyã, vi kamndoŋ aka balam addəv əɓoŋ neti. Yaŋ is Maŋgəlva məvvuyon mambraya, məgəɗ mbəlembəle, muwəl-sasãhĩ awdagədəv go' ɓa, məgəɗ moggoni diyɗa.

¹⁸ Də azaɓaŋ wət wasliyək na təbəz məhə̃sən, anəhaŋ na: Maŋgəlva nok məs dəgilguk sə Eziptə yaŋka! Gəm adansukun gəduvuk diyɗa zlaŋ;

¹⁹ də ulasahã nok məza meŋge nan ɓa naka, kəppet ndol a kapta-muyã ɓa, adan dədəka na slaybuwən dəzar səket kapay dawdawgit aka tive ɓa, dədəka na offo akekeɓe'ik ndəɗaŋ də tive məs adaddoŋ dəkan pakə.

²⁰ Kipsitik əmpəs nok moggon vi dəsənəngən gabba wəna, kətak manhu nok səmet ɓa, kipsitik iŋkile nawbay meme neti.

²¹ Wəzva kaklaw poɗo kəzgə sləma aket a kapta-muyã. Zəga tay dəkkpap sit ɓa. Lukutɗe net dərayaŋ ɓa, tilit dəsẽ' ɓa.

²² Kipsitik dəlveŋge dit ɗiyi, kuɗeket sitik dəlveŋge na maŋgava an neti. Azəmnənək dələv na Sihon məlĩ na Hesbon, gəm dələv na Og, məlĩ na Basan.

²³ Kəwetik kirtit va ŋgərzleɗ na disiŋ. Yaŋ kəke aka dələv məs kənah sit efiŋgiɗit dəzzoŋgən ətafən ka neti naka.

²⁴ Kirtit azzoŋko, amõhnənək dələv vani, kəvoŋgənək kiyit ɗiy naka dələv na Kana'an səbeti, kipsitik ammba vet dit milyeŋge neti, may ɗiy naka dələv vani, vi dəɗaŋgən an aŋglaŋ dənɗaŋ.

²⁵ Aziminik walaŋgəleɗe gugriɗe mərka kiyti də dələv an moggoni; amõhinik gəleɗe məknəhit də zəga nawrəha may vovɗe net iŋkile, may megezlembirkeɗi, heremeɗi, may wəleŋɗe ɗiyɗa nawzəma; Azəmaŋka, abaŋka, akəraŋka, assoŋguk addəv ənnek diyɗa vi moggon nok ɗiyɗa naka.

²⁶ Yaŋ asulyoŋ də isi, aɓoŋgoŋ akoko; azganən mahenziŋ nok dərɓegeti, abeynin məskəleŋɗe noko, məs dədawsəɓaŋ sitin kawmilgit azoko; ndəni aɗɗaŋ mbərayən diyɗa.

²⁷ Yas kan kəppet ammba vet meseŋgiɗit asərən meti. Ya aka pay nawzəm sahã neti, ahəmaŋ sukunko, yaŋ nok kəprim hã sə disiŋ; vi ulasahã nok məza meŋge nan ɓa naka, kəslən sitik ɗiy nawkõhgit səmmba vet meseŋgiɗti.

²⁸ An arahaŋ əffet leŋ na, ndəɗaŋ həmsak təŋ əɗɗa mambray aboko, ndəni kəppet ammba vet məzuzelɗe neti, askanən wəleti; amulyoŋ əmpa ahəmaŋ sukuni, yaŋ nok kəprim hã sə disiŋ, kəkõhgiti, vi ulasahã nok məza meŋge nan ɓaŋka.

²⁹ Kəsəɓ sitike, vi dəmulyoŋgən aka mahenziŋ noko, yaŋ net adaɗɗaŋ zəga nawkaɓa, dəɓe'eŋ sitin mahenziŋɗe nok ɓa, may dəzbetin tiveɗnanziya nok məs ɗəf adazba ka dəsangən madaran viyit ɓa. Aɓəlanənək kiyti, aktuhunək gəɓeti, dəprəmaŋ ɓa.

³⁰ Kəɓəsək wən net wəzva diyɗa. Kəssak sitik də əmpəs noko dəzet məskəleŋɗe, ya dəprəmaŋ ɓa. Yaŋ kəɗi ammba vet ɗiy-ɗar nammba dəlva.

³¹ Ya vi ulasahã nok məza meŋge nan ɓa naka, kəzet kəkkãh ɓa; kəppet ndol ɓa, vi Maŋgəlva məs də mbəlembəle gəm məwəl sahã kənani.

³² Ya gəgaŋ na, Maŋgəlva namə, Maŋgəlva metiŋ məzuɓapa, məs dədah nawgeslne' səni, məɗi kiyən aka wənmiyna gəm moggoni, kədawgəsan əzəmsahã məs dərəhəm anam dit milyeŋge namə gəm məsdəlveŋge namə may məskəleŋɗe namə, may efiŋgiɗmə gəm ɗiy nok baymet təŋ səza pay net milyeŋge na Asiri hã gap pay dəpaŋkəŋ ɓa.

³³ Nok təstəs kənan addəv an dəgəɗ akam pakə, vi təstəs kəgəɗə yaŋ nam məɗɗa də mbərayən.

³⁴ Milyeŋge namə, ɗiy gugriɗ namə, məsdəlveŋge namə, dit efiŋgiɗəm pak dəɓe'eŋ sənən mahenziŋ nok ɓa; dəzgaŋ sləma aket mahenziŋɗe may əsəɓ temtem məs kədawsəɓ sit dənɗaŋgəŋ ɓa.

³⁵ Yaŋ net addəv əzəm məlĩ net də əba məs kəpsit aka dələv slopprok moggon məs kəɗi abet nak na, dəɗɗaŋ sukun wəza ɓa, dəkkpaŋgaŋ səka zəga naɗɗa net temtem mbəraynəŋ ɓa.

³⁶ Pay dəpaŋ na, mənam yakəŋ belemɗe kana! Belemɗe mənan aka dələv mes kəpsit afiŋgiɗəm vi dəzəmnəngən uwa net wəleŋɗe nani dit zəgeɗ mogget nani; yaŋ na, mənam yakəŋ belemɗe addəvən.

³⁷ Zəga na mabardaw naddəvən gbaŋkəŋ na, net milyeŋge məs kəɗi akami sən wən na mambray namə; tahəŋ əzəmaŋ məlĩ va aŋglaŋ akamə gəm aka zəga mamayã namə. Addəv əzəmsahã diyɗa mənani.