Nehemi 8 - Bible en Guidar

¹ Ɗiy pak akkalaŋgək va ɗəf təttaka a təki naba metive net iŋkile, anəhaŋ sənən məzuver Ezra dəki ɗerewel na mahenziŋ na Moyis, məs Yawe aɗi wən nan sən Israyel.

² Məsdələv Ezra kan mah əki ɗerewel na mahenziŋ abet ɗiy məkkelit beymeti: zeli, gili, gəm ɗəf məs nawsən an adaprəm pakə. Də əsɓəta maddaabəŋ na təla mabuhuloni yi.

³ Aŋɗanək ɗerewel van aba təki na metive net Iŋkile, təŋ də mompumo hã gap tətaŋ pay abet zeli, gili, gəm en nawɓap əprəmaŋgə. Sləmet ɗiy pak asanək pakpak ammba əŋɗa na ɗerewel na mahenziŋ.

⁴ Ezra məzuver aziwik a təki nawpele, aket wəleŋɗe məzeɓit ŋgiyoŋ sən wən nani; may Mattitiya, Sema, Anaya, Uriya, Hilkiya gəm Maseya dəziweŋ dəka va dəzəŋ nani, dəka zlaɓay nan tam may Pedaya, Mikayel, Malkiya, Hasum, Hasbadana, Zakarya gəm Mesulam.

⁵ Ezra akol ɗerewel na, a maheret ɗiy paki, vi a təki zollo yi daykiyit ɗiyi. Adan akolo, ɗiy pak le'eŋ ziwziwi.

⁶ Yaŋ Ezra asokon Yawe, Maŋgəlva Metiŋ. Ɗiy pak azlanən na: «Dəsan vaska! Dəsan vaska!» Də əslan vet a disiŋ, aɓe'eŋgi, agdukoŋ aba Yawe hã miŋkinit ne' afuŋ.

⁷ Mə leviɗe Yosuwa, Bani, Serebiya, Yamin, Akkub, Sabtay, Hodiya, Maseya, Kelita, Azariya, Yozabad, Hanan gəm Pelaya dədaprəman sitin mahenziŋ sit ɗiyi. Ɗiy pak a gəlet ziwziwi.

⁸ Yaŋ adaŋɗanən də tiven səddəv ɗerewel na mahenziŋ na Maŋgəlva, də əboton gabbani, də əpəlen wən nan vi kaprəman an aŋɗanən sit ɗiyi.

⁹ Yaŋ daya nakki vadələv adawyaŋ Nehemi, Ezra məsdələv məzuvere gəm mə leviɗe məzərbaŋ-zəga sit ɗiy nek apeleŋ sit ɗiy pak na: «Wəsɓəta dəpaŋkəŋ sən Yawe Maŋgəlva nokum arbə. Kədassoŋ na gəlabay ɓa, kədawhəmaŋ ɓa, vi ɗiy pak tahəŋ əhəmaŋ daprəm əpel temtem na mahenziŋ naka!»

¹⁰ Aɓsit na: «Məddoŋgu, məzəm teɓ moggeti, məsə zəga nawsa neneke, məslən sən haran na ɗəf məs dəzaɓan zən nawda ɓa; vi wəsɓətaŋ ammba Yawe nam arbə. Vasna kədassoŋ zukum so'or so'or ɓa; vi ənnek na Yawe, ndəni gbəgboŋ nokum.»

¹¹ Mə leviɗe aɓətgitinik ɗiy pak də ənəh na: «Məɓətə! Wəsɓətaŋ sən Yawe arbə, Kədassahãnən zukum ɓa!»

¹² Yas kan ɗiy pak ambataŋ kawzəma may kawsa, may kawslən haran an nawsləna gəm kannek diyɗa vi aprəmənək əpel temtem məs arbaŋ sitini.

Əɗɗa wəzləra net guɗukɗe

¹³ Də pay masulan na, migil gəla naret ɗiy pakə, məsdəlveŋge gəm mə leviɗe, kəkalkəkalaŋ aza məzuver Ezra kawsən gabba əpel na mahenziŋ.

¹⁴ Arəhnən məverin addəv ɗerewel na mahenziŋ məs Yawe aɗi wən nan dəza Moyis na, mə Israyelɗe dəvoŋgoŋgən addivit guɗukɗe də wəzləra naka təla mabuhuloni.

¹⁵ Dəpelingən wən na wəzləra van də ətəlma a walaŋgəleɗe gugriɗ net pakə gəm a Yerusalem də ənəh na: «Məgil aggərma, kəkiyaŋgən kiva hereme nawra may an məmpa, may na wəlaŋga adawyaŋ na mirtə, may na gogozlo, may net wəleŋɗe rəɓə vi kawzaɓ guɗukɗe va məverin.»

¹⁶ Yas kan ɗiy addoŋgu, akiyaŋgə; azeɓnin guɗukɗe net naway pak aka an nan a daŋgla ananda, may a daŋgla na Gəla na Maŋgəlva, may a təki naba metive net Iŋkile, may a təki naba metive na Efrayim.

¹⁷ Ɗiy en dəkkalaŋ adak pak, məs dəzzoŋ səka balam azaɓaŋgək guɗukɗe, assoŋ addivit guɗukɗe. Vi təŋ səza pay na Yosuwa wətən Nun hã gap pay dəpaŋka mə Israyelɗe dəɗɗaŋ vas ɓa. Ənnek agəɗək diyɗa sawɓa.

¹⁸ Əŋɗanən ɗerewel na mahenziŋ na Maŋgəlva pay pakə, təŋ səza pay maddaabəŋ hã gap aka an meddirɓe. Aɗɗaŋgək wəzləra lumu taka, əvoŋ madədopoɗon na, əkkal na paya, va matuya net aŋgələ.