Nehemi 6 - Bible en Guidar

Məzuzelɗe arəhaŋgək kuket meleketeni

¹ Səza Sanballat, Tobiya, Gesem mə Arab dit madambirgit məzuzelɗe nam aprəmnən na nərkak zlava, tay dəmbər foŋgo azan ɓa, aka dəpas na nimpe maddembeɗe a met metiveɗ tagay ɓa:

² Yas Sanballat də Gesem aslənaŋ ɗəf azaw də ənəh na: «Ade mələmgən a Kefirim a walaŋ na Ono.» Net aynanənək nawgəɗsu zəga mbərayən.

³ Yaŋ nəslən maslənɗe azet ənəh na: «Wəza metiŋgin nədaɗɗa, nəɓap na əpirkew ɓa. Vimi di sa na wəza waziw pay nədawzar kawpirkew azokum.»

⁴ Təl poɗo aslənaŋ səwən zev əpeliska, nəmndagan sit zev əzlan məstaka.

⁵ Yaŋ Sanballat aslən su əpel van əmpa təl mesle'eni, gawla nan ade də ɗerewel sit ɗiy pak avani.

⁶ Məverin addəvən na: «Ɗiy pak aprəmənka, Gasmu pak tay əpelin na: Isi dit mə Yudeɗ na, mənokum tat iynan nawɓoŋgo, ndəni kədarka zlavaŋka. Va əzban əpel vanəs na, istə kan kədakkpaŋ məlĩ neti.

⁷ Əmpa na, kəɗiyək məskəleŋɗe a Yerusalem dəŋzlaŋgən vaŋvəl aka wən nok də ənəh na: Məlĩ tay a Yuda kana! Gəgaŋka məlĩ adaprəm va məpel temteməska. Yaŋkəŋ na, ade məzgəgən meŋ awalaŋmə.»

⁸ Yaŋ nəslən sən də ənəh na: «Tay dəgil va əpel kədawpel pakəs ɓa, dəkiyuk kədawtawən.»

⁹ Ndəɗaŋ beymet tahəŋ əgeslnegəm də ənəh na: «Mekret wamtə wappanən wəza, ka agəɗ na ɓa.» Yaŋkəŋ na, asɓan su vawa!

¹⁰ In mbat ana Semaya wətən Delaya wət Mehetave'el da, ya tay ɗewwe ɓa, yaŋ amna: «Mələmgən addəv gəla na Maŋgəlva, addak gəla na Maŋgəlva vani. Məmsetgin maddambeɗe na gəla na Maŋgəlva vani. Vi wazzoŋ kawbayko; dəfəɗ adazzoŋ kawbaykuni.»

¹¹ Yaŋ nəzlansən na: «Ɗəf va inəŋ na, kanzan sa? Ɗəf va in awani nazzan ətoŋ addəv gəla na Maŋgəlva kawsan madaran di? Naw nətoŋ na adak ɓa.»

¹² Nulak na, Maŋgəlva dəslən ɓa, kəleŋ məs agəɗ akawəŋ na, Tobiya də Sanballat dəfaɗnəni.

¹³ Afaɗən vasna, vi nəgeslne'gəni, nəgəɗgən vaska, nəgəɗgən mbərayən. Wakkpaŋ azet ka iya mbərayən, karbaŋ səwən wili.

¹⁴ «Aw Maŋgəlva nawa, kədazgət kiyit may Tobiya də Sanballat ɓa, sən zev wəza netiŋka; gəm məskəleŋgək Nodiya may madambirgit məskəleŋɗe məs dəgeslne' guwəniŋki.»

¹⁵ Zlava avãhə̃k də əvoŋ makaklaw sula kiyən sle'en na təla na Elul, agəɗək əvoŋ kaklaw sle' kiyən sula.

¹⁶ Səza məzuzelɗe nam aprəmən gərakə, mahəlfaɗe məs dəssoŋ kiyəm tərwəsl ageslne'eŋke, wil adeninik diyɗa, asənənək na də əŋgla na Maŋgəlva nami wəzaŋ agəɗə.

¹⁷ Aka pay aska, gewleɗ na məlĩ na Yuda avereŋgik ɗerewelɗe diyɗa sən Tobiya, na Tobiya tam əzzoŋ ərihti.

¹⁸ Ɗiy na Yuda diyɗa tahəŋ məslerit də əsway ammban də Tobiya, vi zələt wətən Sekaniya wətən Ara yi gəm wətən adawyaŋ na Yohanan, aɗitək wətən Mesulam wət Berekiya.

¹⁹ Gəm ndəɗaŋ əpeleŋ wən moggon akan abawa. Ndəɗaŋ əkasənən əpel nawa. Tobiya kan əslən ɗereweɗe nawgeslne' guwəni.