Nehemi 5 - Bible en Guidar

Nehemi tay ətak zəga an təstəsi ɓa sə weleŋgit ɗiyi

¹ Təl taka na, ɗiy dit gil net akiyaŋgək dolgoy gədak sən wən net mə Yudeɗ milmiŋgiɗti.

² Tahəŋ dənahaŋ na: «kirtəm mezeŋgleket dit muguluŋgiti gəm mənam na, dik mənani. Mam aka haykəmari məzəmgəni, məzgəlgən kiymə!»

³ Tahəŋ dənahaŋ na: «Gulyeŋge namə, megezlembirkeɗ namə may gəleɗe nam pak məɗiyik met ka mərahgən haykəmari gala mayã.»

⁴ Tahəŋ dənahaŋ na: «Aket gulyeŋge dit megezlembirkeɗ nam mədawgəm koɓeɗ dəmən na nzalaka na məlyã.

⁵ Gəɓa zəm va net milmiŋgiɗmi yi; kirtiti va kirtiməŋgə. Yaŋkəŋ na, nam mənam kan əppet kirtəm mezeŋgleket dit muguluŋgit va belemɗe; tahəŋ dəkkpaŋgaŋ belemɗe səkay səret kirtəm muguluŋgiti, ya kuket tay avam ɓa, gulyeŋge nam dit megezlembirkeɗ nam pak akkpaŋgaŋgək net ɗiyi!»

⁶ Səza nəprəm dolgoy neti gəm əpel temteməska, assawək ɗiyɗa.

⁷ Ninanək a makraw nazga'sit ɗiy gugriɗe dit mətawaŋwəna, nəɓsit na: «Ɗəf pak əzəm zəga na məlmən kana! Mənokum əpsa dəmən na, namndan dit iŋkile! Yaŋ nəyə əkkal metiŋgin aka wən neti.»

⁸ Nəɓsit na: «Nam na, də kuket an dəsan nawalaŋmə, məbit milmiŋgiɗəm mə Yudeɗ en məvilit sit ɗiy-ɗarə; yaŋ nokum tamə, kədawvilnin milmiŋgiɗkum; səm kəvilsəməni!» Ndəɗaŋ ɓata' ɓata'ə, dərəhaŋ nawpel ɓa.

⁹ Yaŋ nəmna: «Zəga kədaɗɗaŋgəŋ tay moggon ɓa. Addəv geslne na Maŋgəlva nam kədawdawaŋ vi ərba wil azet ɗiy en dəzelməniŋ kəta ɓa sa?

¹⁰ In vat pak, nəpsitik koɓeɗi may haykəmari dəmən sit milmiŋgiɗwa gəm gewleɗ nawa; ya məppet səmsit iŋkile naniŋ kana.

¹¹ Dəpaŋkəŋka məppet sit gulyeŋge neti, megezlembirkeɗ neti, wəlaŋ heremeɗ neti, gəleɗe neti may koɓoɗi, may haykəmari, mbazla na meketepe, melẽ, məs kəpsitin dəmən namndan dit iŋkileŋka.»

¹² Yaŋ aɓɗaŋ na: «Waməɗɗa va kənahəska. Waməmndagan siti, zəga tay mədassõh səvet ɓa.» Nəyek məsdəlveŋge, nəswaygitik naɗɗan va məpelin.

¹³ Nəttu' gabba lukut nawa, yaŋ nəmna: «Vaŋki Maŋgəlva adattu' ɗəf məs dəzban əpeləŋ ɓa səddəv gəla nani, faraɗa səza arya nani; vas adattu'ən mbagən bartata!» Wəkkal dəwənnan pak azlan na: «Dəsan vaska! Aɗinənək ki Yawe!» Ɗiy aɗɗanənək va əpeləska.

¹⁴ Təŋ səza məɗiyəw anaw nəsawgən daya na kivadələv na Yuda, təŋ səza wəzva makaklaw sulan hã gap wəzva makaklaw hoku kiyən sula na məlĩ Artazerses; wəzva kəlaw kiyən sula in dit milmiŋgiɗəw məzəm way na daya nakki vadələv ɓa.

¹⁵ Deyeɗe nakki vadələv en maddaabəŋ kiyu na, assoŋguk aket ɗiyi. Atafaŋgək əzəma, mbazla gəm koɓeɗ kaklaw poɗo əmpa'e səveti. Gawleɗ net tam əskanən wəlet ɗiyi. Ya naw nəgəɗ vas ɓa vi geslne na Maŋgəlva.

¹⁶ Əmpa na, nəgəɗək wəza nawzaɓan zlavaŋka, məlbah guli ɓa, gawleɗ naw pak akkalaŋgək aŋ aka wəza.

¹⁷ Mə Yudeɗ dit mətawaŋwən məs dədawzəmaŋ anawda aɗɗaŋgək ɗiy səkat də kaklaw sle'i, gəm en dədazzoŋ səret ɗiy-ɗar dətərwəsl kiymə.

¹⁸ An mədan aza wəsɓəta pak na: medgeɗge taka, gəlew dəwel-dəwel sləre gəm gimndeɗ adawdaŋ suwəni. Aza əvoŋ kəlaw pak mbazla keslkesli. Də as pak, Nəttokon zəga nawzəm na daya na kivadələv ɓa, vi wəza adayək aket ɗiy veti.

¹⁹ «Aɗɗum akaw moggoni Maŋgəlva, sən an nəgəɗ ammbet ɗiyiŋ pakə.»