Nehemi 4 - Bible en Guidar

¹ Adan may Sanballat, Tobiya, Arabɗe, mə Ammonɗe dit mə Asdodɗe aprəmnən na ərka na zlava na Yerusalem tay əɓaya, may an viŋviŋ tay ətəŋ əsuko na, herɗe aɗɗennik diyɗa.

² Yaŋ aslerin met ammba zit beymet kawaksən Yerusalem, kawraygəni.

³ Ndəni kan məkkaman Maŋgəlva namə, məɗi məgaɗe na dəfəɗ də kapay sən wən net kawtər kiyəm səbeti.

⁴ Ya ɗiy na Yuda aɓɗaŋ na: «Gbəgboŋ net məslaŋ zəga affetke, burɗuk adayka, məɓap na ərka zlava van ɓa!»

⁵ Məzuzelɗe nam aɓɗaŋ na: «Mə Yudeɗ asənnən ɓa, awlanən ɓa, hã mənam gap a weleŋti, məbeygini, mətakgən wəza vani.»

Nehemi tay ipsit zəga nawgay sit ɗiy en məzəɗɗaŋ wəza

⁶ Mə Yudeɗ məs dəssoŋ də gəla a meŋgevet azzoŋguk ənah səm təl kəlaw dayday na: «Sə təki temtem an kedawmulyoŋ pak na, məde kəlazamə!»

⁷ Yaŋ kan nəso' təki afuŋ dəɓɓa zlava appaka, nəziwgit ɗiy adak aza məlma na zit dit masalamɗe neti, tulhoŋge may bəleɗe neti.

⁸ Səza nəsəŋgləketi, in le'i, nəɓsit ɗiy na məlĩ dit mətawaŋwəna gəm madambirgit ɗiy na: «Geslne adukum sit ɓa! Məɗɗumon Daya metiŋgin məs dədah nawgeslne' sən diyɗaŋka! Məgay ammbet milmiŋgiɗkum, kirtukum mezeŋgleket dit muguluŋgiti, gil nokum gəm gəleɗe nokum.»

⁹ Səza mezuzelɗe nam aprəmən na məsənək dərweti, Maŋgəlva araygənək an aynaŋ naɗɗa na, mənam buryok baymam aza zlava, naway pak aka wəza nani.

¹⁰ Təŋ səza pay dəpas na, wəɗak net ɗiy məɗɗaŋ wəza naw dədaɗɗaŋ wəza, wəɗak net tam dit tulhõŋge, barayɗe, bəleɗe may lukutɗe na təbza. Deyeɗe net ɗiy aziweŋgək aɓɓet ɗiy na Yuda beymeti.

¹¹ En məzərkanən zlava gəm en məzuslaŋ zəga tahəŋ əɗɗanən də vet taka, taka tam ərma zəga nawgaya.

¹² Məzərkaŋ zlava tahəŋ ərkan naway pak də masalam nan minan a gəzeni. Muffu gozloro tam a maŋgavawa.

¹³ Yaŋ nəɓsit ɗiy gugriɗe dit mətawaŋwəna gəm madambərgit ɗiy na: «Zəga naɗɗa diɗayi, zekiyi; ya traytray mənan aka zlava vani, ɗəf pak ɓa' səza maɓɓani.

¹⁴ A təki kəssoŋ pak, an kəprəmən gozloro na, məde məkkalan zukum azam adaka. Maŋgəlva wagay vimə!»

¹⁵ Vas məzban əɗɗa wəza kana, wəɗak net ɗiy dit tulhoŋge avet təŋ də bapummo hã gap ngərzleɗ ngərayə.

¹⁶ Də pay as vanə'e nənahsit ɗiy na, nawaydi pak dəvoŋgən addak Yerusalem də gawla nani; dəssoŋgən məga nam də dəfɗa, kapay tam əɗɗa wəza.

¹⁷ Ina, milmiŋgiɗwa, gewleɗ nawa, ɗiy en məgaŋ dəssoŋ ammbaw pak, ɗəf tay təttaka dəggbuk lukutɗe nan səzan ɓa. Naway pak asanək dit zəgeɗ nawgay nan ammba van dəzəŋ.