Nehemi 2 - Bible en Guidar

Məppay tive sən Nehemi ndəmndagən a Yerusalem

¹ Təl taka də təla na Nisan addəv wəzva makaklaw sula na məlĩ Artazerses na, mbazla tay aban ta'a, yaŋ nəgəm mbazla van nəpsən məlyã. Nəsaw ɗah so'or so'or aban ɓa.

² Yaŋ məlĩ aɓsu na: «Vimi kəsok so'or so'or di? Ya gbəgba' kənan ɓa zlaŋ; tay an dədassan mokrok soko.» Geslne armuwək diyɗa sawɓa.

³ Yaŋ nəɓsən məlĩ na: «Kəta məlyoffo dəsan egge hã faɗə! Nəsawna so'or so'or ɓa mbar əmpa di? Walaŋgəla-metiŋ məs magamasɗe net efiŋgiɗu assoŋ adak tay əkkpaŋ kiməskiya, may maddembeɗe na man pak offo azimike!»

⁴ Məlĩ aɓsu na: «Ammba mi kədawgay yaŋkəŋ di?» Yaŋ nəkkaman Maŋgəlva na disiŋ,

⁵ nəzlan sən məlĩ na: «An wal sən məlyã, an wən na gawla nok wasan lew aroko, aslənu a Yuda, a walaŋgəla-metiŋ məs məndik efiŋgiɗu adaka, vi nəmsakgən ərkani.»

⁶ Məlĩ tay dət ma'ãyək nan amaŋgavan ɗewwe, yaŋ assõhõw na: «Əvoŋ mbarwa malaka nok van adaɗɗa di? Dewɗe kədawmilyok di?» Annekik zə məlyã, appaw ədda yaŋ nəɗisən pay nawmilye.

⁷ Nəmsak ənah sən əmpa na: «An wal sən məlyã, kəta dəvay ɗerewelɗe avaw sit deyeɗe net kiyvetdilveŋge na dəgar ki Efrat, vi dəppawəngən ətoŋ hã in gap a Yuda.

⁸ Gəm ɗerewel əmpa sən Asaf, məgə muyã na məlyã, vi dəvaygən wəleŋɗe gala nakkpa' maddambeɗe na walaŋgəla-metiŋ na korgu dəsan go'o də gəla na Maŋgəlva, may na zlava naka walaŋgəla-metiŋ, may na gəla məs nədaddaw addəvən.» Məlĩ apsəwike, vi va moggon na Maŋgəlva naw tay akawa.

⁹ Yaŋ nəmbat kan azet deyeɗe na kivadələv na dəgar ki Efrat, nipsit ɗerewelɗe na məlyã. Məlĩ van dit deyeɗe net məzəlpaŋgə, may məŋkoroŋ pilseŋge aslənwã.

¹⁰ Sanballat mə Horon gəm Tobiya mə Ammon dəsan daya na wəza aprəmənka, ya dəlsit nek ta'sa ka ɗəf dəɗɗumgən ammba moggon sit mə Israyelɗe ɓa.

Nehemi tay ula va zlavaɗe assoŋgu

¹¹ In gap a Yerusalem, nəsaw adak əvoŋ hoku.

¹² Yaŋ nəsil də dəfəɗ dit ɗiy ammbaw siɗikke, nənah an Maŋgəlva naw avay a makkraw naɗɗa ammba Yerusalem sən ɗəf ɓa. Zəga mamayã tay avaw abbər an nəka' akanəŋ ɓa.

¹³ In vit də maddamba na Walaŋ də dəfɗa, haraw sek kəla met iŋkile na Dohõtuya nadda də maddamba na Ba'arə. Yaŋ kan nəsəŋgləkan zlava na Yerusalem; zən foŋfoŋ, offo azimik maddambeɗe nani.

¹⁴ In toŋ də maddamba na heret iŋkile də ma bobok na məlyã. Ya təki nawtoŋ na zəga mamayã məs nəsaw akan tay ɓa.

¹⁵ Ndəni kan nəpeŋ də dəfəɗ kəla təki məzzoro nədawsəŋgləkan zlava; yaŋ nəmili, nəde kəla maddamba na walaŋ, vas nəmili.

¹⁶ Ɗiy naba məlĩ dəsənnən aŋga ndaw di, may mi ndaw əɗɗa di ɓa, vi aka dəpas na, tay məs nənah sit mə Yudeɗ ɓa, sit məsdəlveŋge ɓa, ɗiy na meŋgle na məlĩ ɓa, ɗiy naba məlĩ ɓa may sit meddembirgit məɗɗaŋ wəza ɓa.

¹⁷ Yaŋ nəɓsit na: «horokum tay ula əzəmsahã an məsam addəvənəŋ kan ɓa sa: Yerusalem akkpaŋgək kiməskiya, məɗi siti offo sit maddambeɗe nani! Məde mərkagən zlava na Yerusalem, mədawsam ka zəga net wil əmpa ɓa.»

¹⁸ Nənah sitik va va Maŋgəlva naw asan moggon də ina gəm əpel an məlĩ apel suwa, yaŋ aɓɗaŋ na: «Məsilsəmə, mərkagənə!» Yaŋ asoknən zit aza wəza moggonəska.

¹⁹ Adan may Sanballat mə Horon, də Tobiya mə Ammon ɗəf naka wəza gəm mə Arab adawyaŋ Gesem aprəmən na, yaŋ amasaŋ akamə; adawlaŋ azam də əzelemə, yaŋ aɓɗaŋ na: «Mə zəga miy aŋ kədaɗɗaŋgəŋ di? Aka məlĩ kədawɓoŋgoŋ sa?»

²⁰ Yaŋ nəmndagan sit əpele, nəɓsit na: «Maŋgəlva na disiŋ sən kiyən dədaɗɗan ka dədawsəmgəni. Nam mənam məgəɗ wəza nan na, waməsil wamərka; Ya nokum na, haran nokum tay ɓa, tive naɗɗa zəga tay abokum ɓa, kaɗɗumokumi a Yerusalem ɓa!»