Nehemi 1 - Bible en Guidar

Nehemi tay əmndan a Yerusalem ( 1:1—2:20 )

¹ Əpel na Nehemi wətən Hakaliya. Aka təla na Kislew addəv wəzva makaklaw sulani, naw in tat a Susan walaŋgəla-metiŋ na korgu,

Nehemi tay ərəh alabaraɗe aka Yerusalem

² yaŋ Hanani taka səret milmiŋgiɗu ade, ndən dit ɗiy sə Yuda. Nəssõhẽt aka wən net mə Yudeɗ məs dəppaŋ dəssoŋ səza mərma ɗiyi gəm aka wən na Yerusalem.

³ Aɓsuwən na: «En dəppaŋ dəssoŋ akkiva adak vet tahəŋ addəv tatwãhã gəm ərba wil diyɗa. Zlava na Yerusalem foŋfoŋgi, offo azimik maddambeɗe nani.»

Əkkam na Nehemi ammbet mə Yudeɗi

⁴ Səza nəprəm əpeliska, in ɗew əhəma; nəgəɗək əvoŋ diyɗa aka əɗəka də əɗɗa meme gəm əkkam aba Maŋgəlva na disiŋ,

⁵ nəmna: «Kamə, Yawe Maŋgəlva na disiŋ, Maŋgəlva metiŋ, məs dəgap nawgeslne' səni, məzərma wənmiyna də əɗɗa moggon azet ɗiy en dəŋglunəni gəm en dərmanən wən nan məs aɗiyə.

⁶ Kamə, sləmok dəsan pakka, horok dəsan kollo, naprəm əkkam naw in gawla nok məzəkkam abok pay dəpaŋ dəfəɗ də kapay ammbet mə Israyelɗe məɗɗaŋ wəza noko; in tat əɗi marava aka wən net mambrayɗe net mə Israyelɗe məs dətoŋgəmən əɗɗa mambray azokuŋka. In də gəla na əbba məgəɗək mambraya.

⁷ Məraygən sukuk sawɓa, mərma an kəɗi naɗɗa, may mahenziŋ noko, may tiveɗnanziya nok məs kəpsən gawla nok Moyis ɓa.

⁸ Kamə aɗɗumon əpel məs kəɗi wən nan sən gawla nok Moyis də ənəh na: Nokum an mənokum tat əɗɗa moggon ɓa na, wanətraygukum aret ɗiyi,

⁹ ya an kəmilyoŋguk azawa, kərmanənək wən an nəɗiyə, kəɗɗaŋgək wəza dəndən, asna kəta en mətreyet nokum dəssoŋ akki dələv abayman zlaŋ, wanəkkelet sədaka. Wanəmilgit a təki nəwel ka iya naw dəsangən adak naka.

¹⁰ Məɗɗaŋ wəza nokəŋgə, ɗiy nok məs kəkõhgit də əɓap nok metiŋgini gəm də vok gbogboŋgo.

¹¹ Kamə Daya, apak sləmok ammba əkkam na gawla nok ɗah gəm ammba əkkam net gewleɗ nok en məs dəŋglaŋ nawgeslne' sən iya noko.» Kamə aɗɗa kəta wən dədaw ammba gawla nok pay dəpaŋka, aɗɗa kəta dərahgən ulasahã səza dəfəŋka. Intə məpsən zəga nawsa sən məlĩ daska.