Nahum 2 - Bible en Guidar

Əskot na Niniwe ( 2:1—3:19 )

¹ Yuda, awle təl ɗəf məzutəl ma na wən neneke; əzzan dəket mossorgoɗe gugriɗe. Tay ətəlma na zazaya, aɗɗe wəzləreɗ noko, aknahaŋ an mok aynə! Vi məs mambray atoŋ na ɗah anokda əmpa ɓa, məzani kəkəɗə.

² Ngaɓa nawwak suk yaŋ aboko. Apeŋ aka zlava, agə, asekeɗ tive asɓan gizeko, ampa təlko, asɓet bələɗɗe nok pakə!

³ Vi Yawe amndagan sənək nenek na Yakob, ndən sən kini nenek na Israyel. Vi məmõhõŋtin ɗiy amõhetinke, aŋgrofinik megezlembirkeɗ neti.

Məderzeh aka Niniwe gəm məmõhõni

⁴ Baray net məs mekret nan məhəmni; məzəlpaŋ lukutɗe pepreŋ va offo aguloŋgu. Mawteɗ nawgay net va offo mətalən pay adazzəŋgaŋ ama wəgaya. Tulheŋge tahəŋ əɓlaŋgə.

⁵ Mawteɗ nawgay tahəŋ əddoŋ də gagay tivetive; tahəŋ əgəmnən zit təki pakə; va kəmna offoɗe məteltiŋ; va əwiɗ na buwən adanzoŋgu.

⁶ Məlĩ na Asiri amsak əye deyeɗe net məzəlpaŋ nani, ya ədaw net goɓolgoɓoli yi! Məzuzelɗe agəmnən zit hã aba zlava; azaɓaŋ təki nawɗama.

⁷ Məŋzliwti maddambeɗe nakəlaka məlpa; gəla na məlĩ tay əɓzla!

⁸ Məggbat na, məslani zəgakamaŋgəlva; belemɗe nan muguluŋgit tahəŋ əhəmaŋ va biŋgeɗ na maha; tay ərganən mekreti.

⁹ Va boboki Niniwe asan farə, iŋkile papa'papa'ə. Yaŋ na tay əɓahaŋgə! Miziwi, miziw məmpa təlkum! Ya ɗəf tay dədawman haran ɓa!

¹⁰ Məkkpor təbəz babara, məkkpor meleŋge, əgrak nan tay ɓa, aknahək dit zəgeɗ na sləma!

¹¹ Məmõhõni pakə, məkkporni, məraygəni yi; mekret aɓohko, takpret sulagən gbuduku, zit pak korkoru, heret pak həmhəm pərreŋgi.

Niniwe tay va ɓoolu məska wəlani

¹² Aŋgay yi bətəŋ na ɓoolu di? Adak kirtin adawtafnən əzəm neti; an ɓoolu tay əmbat əkay əzəma, ɓoolu mugolun tay adaka, ɗəf tay nattepet kirtin ɓoolu ɓa.

¹³ An ɓoolu arəmək sluwa, sit kirtini yi, ndən ərrəsl sit kirtin muguluŋgiti; tay əknəh bətəŋ nan dit zəgeɗ arəmə, təki nawɗam nan də slu məbakani.

¹⁴ Nəsilik akoko Yawe Məzuɓappak aɗiymani! Wanəzle mawteɗ nawgay nani. Masalam wazim kirtin ɓoolu noko. Wanərsla wəzəm nok səka dəlva, kaprəmi ɓaɓəlmet maslənɗe nok əmpa ɓa.