Mika 7 - Bible en Guidar

Əɓuhma na məskəleŋ

¹ Aw haya! Vi in tat va ɗəf məkkal zəga na mabardaw də mawala va məhor uwa net wəleŋɗe ya mokkoy tay nawɓuh nawzəm ɓa, muduvurziyo na sokoyo məs maw asan akan zlaŋ tay ɓa.

² Ɗəf təstəs tay aka dələv ɓa, ɗəf tay taka mədaw sarara aweleŋgit ɗiy ɓa. Baymet pak sən əggbo' mbel avoŋgoŋ tive; ɗəf pak tay ənslən pew̃eŋ aba məlməni.

³ Vet tay əɗɗa zəga daryawə. Kaɗɗa moggon na, ɗiy gugriɗ tay əŋglaŋ zəga, Mətawaŋwən na vi kawrəha, ɗiy gagdakɗe tahəŋ əpel vi kaknahan əsim zəga neti, gəm tay əzəmaŋ kiyit ɗiyi.

⁴ Ɗəf məs ədaw nan moggon səret tay va dewrege, ɗəf təstəs naret adayək kiy ŋgərəɓ net gedirgeɗi. Pay na tatwãh nan tay əzzani pay nan dəgapə. Kakaŋ pay nattap neti yi!

⁵ Kədawtafən əpel net beyneŋgiɗkum ɓa. Kədarban geŋɗetuk sən baynok an va gərok ɓa. Dəsan sət ɗak nok zlaŋ ataɗ moko.

⁶ Vi wiyən awran afəni, waŋ tawsilyet akat mata, ɗak tawsilyet akat atəta, naway pak məzuzelɗe nan əŋgil anandahəŋgə.

⁷ Ya nawa, aza Yawe nədawla, səza Maŋgəlva nədawga əkõh nawa, Maŋgəlva naw waprəmwa.

Əɗɗum nawga zəga gəm əkkam net ɗiyi

⁸ Məzuzelwa, kənnek aka an dərəhu ɓa! Nəskot zlaŋ na wanəsili! Nəsaw arah guzli zlaŋgə, Yawe yi əkeɗeɗe nawa!

⁹ Wanəɓəs ədagədəv na Yawe, vi nəgəɗək mambray akani. Pay wade wawlu sãhə wagəɗ su təstəsə. Wagilgu ara təki babara, wanula təstəs nani.

¹⁰ Məzuzelu wawla wil wadanəni, ndən mənah su wən nak na: Aŋgay Yawe Maŋgəlva nok di? Haraw wawla kawndapani kakaŋ ammba təl ɗəf va ndərɓa aka tive.

¹¹ Pay narkan zlava nok na, Pay dəpaska, kaddergiti meŋge nok ɓa'ə.

¹² Pay nan dəpaska kazzoy anokda sə Asiri gəm sə walaŋgəleɗe gugriɗ na Eziptə, sə Eziptə gəm sə ma məlpa, sə ma pehe hã ama pehe mbərən, gəm sə mossorgo metiŋ aza mossorgo metiŋ.

¹³ Dələv waray viyit ɗiy nakani gəm sən zəga naɗɗa neti.

¹⁴ Adawgit ɗiy nok də zleŋge nawtaɗ noko, gazlaŋ net gilew na vawrayko, məs dəssoŋ derder a muyã a weleŋgit wəleŋɗe nawzəma. Dətaɗaŋ a Basan gəm aka dələv na Galad, va aka pay lahəŋka.

¹⁵ Va lahəŋ aka pay kəgil sə Eziptə, wanərban sən sekeneɗi.

¹⁶ Ɗiy wawlanəni, wil wade də gurom net dayday. Wasukun vet a meti sləmet wasuku.

¹⁷ Wazəmaŋ burɗuk va dohõ gəm va zəgeɗ mukroket mədawaŋ də gidivit aka dəlvafuŋ. Də əkker adawgilyoŋ səddəvit gəleɗe net mogget aza Yawe Maŋgəlva namə; geslne' warme, wageslne'eŋ sukuni.

¹⁸ Maŋgəlva tay va is ɓa, məvvuyon mambraya, məppan əɓoŋ net ɗiy nan en dəppaŋ medereti. Ədagədəv nan awsan faɗ ɓa, vi zən neki dəɗɗa moggoni.

¹⁹ Wakəmsak ulasãsahmə, wakəndapet mambrayɗe namə, wakəzgan mambray nam pak addəv kpukpum na pehe.

²⁰ Wakərban moggon nok sən Yakob gəm moggon nok sən zəv Abraham va kəsway sit efiŋgiɗəm aka far lahəŋka.