Mika 6 - Bible en Guidar

Əpel nazga'a gəm naɗɗum nawga zəga ( 6:1—7:20 ) Yawe tay əki dolgoy aket ɗiy nani

¹ Məprəm an Yawe anah ɗa: Akə dolgoy abet mossorgoɗe gugriɗe mossorgoɗe dəprəmən wəloko.

² Mossorgoɗe gugriɗe, məprəm dolgoy na Yawe, mənokum kəssoŋ gabba dələv məs aɓla ɓa kəŋkə: Yawe tay əki dolgoy aket ɗiy nani, tay əki wən aka Israyel.

³ Ɗiy nawa, mi nəgəɗ sukum di? Də mi nəyokum di? Məzlan suwa!

⁴ Vi nəgilgukum sə Eziptə sa? Nəpəluk səka balam gəm nəslin may Moyis, Aron gəm Miryam abokum sa?

⁵ Ɗiy nawa, əŋga məɗɗumoni, kamə! An məs Balak, məlĩ na Mo'ab, aɗɗum naɗɗa, gəm an Balam, wətən Be'or azlan səni. Gəm an dəgəɗ təŋ sə Sitim hã gap a Gilgal. Asna wakəsənnən wəza na təstəs na Yawe.

An Yawe adaŋgla azet ɗiyi

⁶ Də mi nədaddaw ərban kizu aba Yawe an in tat əddaw əkduk sən Maŋgəlva na disiŋ di? Nəziwgin aban də əvəl nawzla kurmbuɗuk sa? Dit kirit wasliɗe na əzva takataka sa?

⁷ Yawe watef timeŋgiɗ məza anɗaŋ ɓa gəm mẽl diyɗa va məlpa sa? Nəpsən tizi naw ka dəvvuyongən əɓoŋ naw sa? Gəm uwa naddəvu aka mambray naw sa?

⁸ Mənah suki an dəslə is ɗəfa, an Yawe adawkayan azok na: zəga mbərni balsən wəɗɗa təstəsə əŋgla moggoni əsla zuk ədaw də Maŋgəlva noko.

Yawe watawwən aka vurum gəm aka daraw

⁹ Yawe tay iya walaŋgəla-metiŋ, wakohgit məzugeslne'eŋ sənən iya nani: Məprəm əzga na ɗəf an dəpele!

¹⁰ Zəga na vurum tay məzaɓan eŋgil ana məsdaraw da, gəm huloŋguk maɗawak nawsla zəga məs nəzel sa?

¹¹ Wanule məslaŋ zəga aka məsləgagdak na zəga na daraw awaniɓa məs gərəm nawhal də əsla gagdak na zəga, a gabal azet na, va dəɗɗaŋ zəga ɓa sa?

¹² Məs aryeɗ na walaŋgəla-metiŋ aknahaŋgə də daraw ɗiy nan tahəŋ uwawəna, a beret na, hərzlumit na tepelke yi.

¹³ Ndəni naw tam nədarguk dit gbəgbaɗe, nədawzok vi mambrayɗe noko.

¹⁴ Wakəzəmə, ya kəbə na ɓa hara, may wasan a walaŋkum! Wakəzaɓ zəga, ya asan na ɓa hara. Ya an kəzaɓə, wanəzan də masalam.

¹⁵ Wakəzlgə, kəkkal na zəga na mabardaw nan ɓa hara. Wakuɗot mẽl na hereme, kəpay na mẽl van ɓa. Wakəɗot mbazla na meketepe ya wakəsə mbazla ɓa.

¹⁶ Is tat əzban an məlĩ Omri aziwgini, is tat ədaw va gəla na Akab adawə. Is tat əzban təlni! Wanəraygən walaŋgəla-metiŋ, kawmasi aket ɗiy nani. Əra net wil net ɗiy naw wakkpaŋ akokum.