Mika 5 - Bible en Guidar

Bet-Lehem, dələv na məlĩ məkõhgit ɗiyi

¹ Is Bet-Lehem Efrata, təki muzliya kənan naŋɗa aret en na mahəlfa na Yuda ɓa. Səzoki nədawgilgin ɗəf an dədawzəm məlĩ dəka iya naw aket ɗiy na Israyel, ətəŋ nan gala aka pay dətoŋ farfari yi.

² Vini kana, wappet hã gap ɗak nawa təwəgəni. Asna madambirgit milmiŋgiɗ wamndoŋ azet ɗiy na Israyel.

³ Wasili, wateɗ timeŋgiɗ nan də gbogboŋ na Yawe, də gagdak na iya na Yawe Maŋgəlva nani. Wassoŋ zay vi kawsənni mẽmẽtiŋ nan hã gap meŋge na dəlvafuŋ.

⁴ Ndən nawsan zazaya. An mə Asiriɗe tay əzzoŋ əgul dələv namə gəm ətoŋ addəv gəla na məlĩ namə, waməsilgit məzuteɗeŋge buhul akani dit deyeɗe dudopoɗo.

⁵ Net wataɗən dələv na Asiri də masalam gəm dələv na Nimrod tam də slohõ. Nan wakõhgəm səva Asiri, an azzoŋguk aka dələv namə, atoŋgoŋguk kiyit meŋge.

Ɗiy en dənduwəɗaŋ na Israyel dəssoŋ a weleŋgit ɗiy na Guwa

⁶ Ɗiy na Yakob dənduwəɗaŋ a weleŋgit ɗiy-ɗar diyɗa wassoŋ va minɗe dəzzoŋ səza Yawe, va buwən maŋgalaw dəzi aka kevile, məza əɗɗum aka ɗəf ɓa məza əgan səmmba vet ɗiy ɓa.

⁷ Ɗiy na Yakob dənduwəɗaŋ a weleŋgit ɗiy-ɗar diyɗa, wassoŋ va ɓoolu a weleŋgit zəgeɗ nawra, va wət ɓoolu a waleŋgit gilewi. Də təki atoŋ pak tay əŋgrofon gəm əbakan zəga ɗəf tay nawmõhun səman ɓa.

⁸ Aslan vok aket məzuzelɗe noko, məzuseɓɗe nok pak dəmtaŋgə!

Yawe tay əzan əbbah mbərayən pakə

⁹ Pay nan dəpaska, Yawe aɗiyman na: wanəbey pilseŋge nok sənokda gəm wanəzet mawteŋɗe nawgay noko.

¹⁰ Wanəzet walaŋgəleɗ gugriɗ naka dələv noko, wanəɓzliw korguɗe noko.

¹¹ Wanəzet teteleɗ noko məsənaŋ wən net ŋgərzleɗ təttaka assoŋ na anok da ɓa.

¹² Waniɓzliw zəgeɗkameŋgilveɗ noko gəm serekɗe noko, kuppu' na abet zəgeɗ məs kəzaɓ də vokuŋ əmpa ɓa.

¹³ Waniptu Astereɗ sənokda gəm wanəzet walaŋgəleɗ gugriɗ noko.

¹⁴ Addəv ədagədəv gəm herɗe nədampəlkiya aket ɗiy en dəprəmaŋ ɓa.