Mika 4 - Bible en Guidar

Əzaɓan ənziya gəm zazaya ( 4:1—5:14 ) Yerusalem, təki məs zazay asan addəvni

¹ Addivit əvoŋɗe nabe na mossorgo metiŋ na gəla na Yawe waday kiyit mossorgoɗe gugriɗe meɓɓeti, gəm waday kiyit təki ɗagarraɗi. Asna ɗiy naka dələv dəwənnet pak wazzoŋ ɗakɗak akani.

² Ɗiy diyɗa wambataŋ adaka; wanahaŋ na mide məpeŋgin aka mossorgo metiŋ na Yawe addəv gəla na Maŋgəlva na Yakob. Warbet sim tiveɗ nani, mədawgən aket tiveɗ nani vi sə Siyon əyak adawgilyeni, əpel na Yawe tamə sə Yerusalem adazzani.

³ Wataw wən a walaŋgit ɗiy diyɗa, wasan məzətər net ɗiy en gbogboŋɗe na faraɗa. Dit masalamɗe neti, wavotoŋ gulekɗe, də tulhõ neti, wazaɓaŋ slogoyɗe. Dələv maɓɓan asil sən na maɓɓan ɓa, ayaganən na əgay əmpa ɓa.

⁴ Wassoŋ naway pak də maɗɗulan ammba megezlembirke gəm sokoyo nani, ɗəf tay nazlzlaɓan ɓa. Vi ma Yawe Məzuɓappak dəpeli.

⁵ An ɗiy pak tay ədawaŋ naway pak aka iya na maŋgəlva nan na, nam mənam tat ədaw də iya na Yawe Maŋgəlva nam pay pak hã faɗə.

Yawe, məlĩ a Yerusalem

⁶ Pay nan dəpaska, Yawe aɗiyman na, wanəkkelet vədalɗe wanəmndeget ɗiy məɓɓehti, gəm ɗiy en nəzəmgit sahã.

⁷ Wanəkkpeŋget vədalɗe ka en məs dəndəwəɗaŋgə, en məsimgit tamə ka vanday gbogboŋgo. Yawe yi nawzəm məlĩ aketi aka mossorgo metiŋ na Siyon təŋ kakaŋka hã faɗə.

⁸ Ya isi mossorgo na Yerusalem, gəla nawga, abeŋ na wakərəh gagdak nok an lahəŋka. Yerusalem wamsak əsan təki məlĩ adawsani.

Əsla gəm əkõh na Yerusalem

⁹ Vimi kədanzlaŋ vaŋvəl kakaŋ di ɗiy na Yerusalem? Məlĩ nokum tay ɓa sa? Məzəsəɓ sukum amtək sa? Vimi kəssoŋ ɓalwãy-ɓalwãy sən əssa va guluk məɓay uwa di?

¹⁰ Ahəm sən tatwãha va guluk məɓay uwa Siyon! Vi kakaŋ na wakəgil sə walaŋgəla-metiŋ kadda əsok awra gəm kawmbat hã a Babilon. Adaka kawkõhguki, Yawe wabituk səmmba vet məzuzelɗe noko.

¹¹ Kakaŋ na dəlveŋge diyɗa tahəŋ əkkal akoko. En məzunahaŋ na, walaŋgəla-metiŋ van dərayə, haram dəwəl də Siyon!

¹² Net dəsənən əɗɗum na Yawe ɓa, dəprəmnən an aziwgin nakkelet va maŋgav a kelleŋ ɓa.

¹³ Asil arga haya, Yerusalem! Vi wanəkkpaŋgan mohok va təbza gəm eperkeperke nok va təbəz pepreŋge. Wakəsər ɗiy diyɗa. Wanəzan zəga nawrəh na ma wəgay net də iya na Yawe gəm kawɗi arya net sən Yawe na dələv pakə.

¹⁴ Kakaŋ na, Yerusalem antaran zuko. Məsərŋgəslmi, tahəŋ ərganən daya na Israyel a tapaslayən də zləŋge.