Mika 3 - Bible en Guidar

Əzgasit deyeɗe

¹ Yaŋ nənah na: Məprəma kamə mənokum deyeɗe na Yakob mənokum mətawaŋwən na Israyel. Əsən ətawwən təstəs wəza nokumi ɓa sa?

² Mənokum tat əzel təstəs gəm əŋglu mambraya, mənokum tat əttor kotorok gəm slu səka slesleŋgit ɗiyi.

³ Məzəmaŋ sliwit ɗiy nawa. Məttorən kotorok neti, mənzlaŋ slesleŋti, mərsletin va nawɗi a mesteɓe va slu addəv mesteɓe.

⁴ Vasna wakkamanən Yawe ya azlan sit na ɓa. Pay nani, wakkpaŋgan haran səketi sən wəza mbərayən məs aɗɗaŋgə.

Əzga' sit məskəleŋɗe muwaŋ wən sit ɗiyi

⁵ An Yawe anah aket məskəleŋɗe məzetin ɗiy nan yaŋka: An zəga tay a bereti, ndəɗaŋ ənahaŋ na zazay tayi, ya ndəɗaŋ əɗɗa əgay də ɗəf an dəgul sit zəga a beret ɓa.

⁶ Vini asan dəfəɗ vikum ula tay ɓa. Guzli vikum, kəskaŋ na helig ɓa. Pay watəp aket məskəleŋɗe, təki watir aketi.

⁷ Məzulaŋ pak wil wadenini məskaŋ helig wassoŋ simbim simbimi, pakgit waɗemetin eŋgemeti, vi Maŋgəlva tay adawzlan ɓa.

⁸ Ya naw dərəŋ na, əmpəs na Yawe aknahwək də gbogboŋgo, də təstəsə gəm də gurom nərban səngən əɓoŋ na Yakob gəm nərban səngən mambray na Israyel.

Mika tay əpel aka əɓzla na Yerusalem

⁹ Kamə məprəma mənokum deyeɗe na Yakob, gəm mənokum mətawaŋwən na Israyel. Mənokum məzeleŋ təstəsə gəm məslokoron təstəsə.

¹⁰ Mənokum tat ərka Siyon addivit mbeli, Yerusalem tamə addəv an dəslə ɓa

¹¹ Ɗiy gugriɗ tay ətawənwən ammba əraha; məsdəlveŋge tahəŋ ərbanən wən ammba ərəha məskəleŋɗe tahəŋ əskaŋ helig vi kawrah koɓeɗi. Də as pak tahəŋ əziw aka Yawe də ənah na: Yawe tay a walaŋgəm ɓa sa? Tatwãh ade na akam ɓa!

¹² Aka wən nokum Siyon wakkpaŋ guli minseni, Yerusalem kiməskiya, gəla nakkam məɓayən wakkpaŋ wəleŋɗe kpəŋgə.