Mika 1 - Bible en Guidar

Ətawwən aka Israyel gəm aka Yuda ( 1:1—3:12 )

¹ Əpel na Yawe sən Mika ɗəf na Moreset aka pay na Yotam, Akaz, Hizkiya, milyeŋge na Yuda. An awəl aka wən na Samari gəm Yerusalem yaŋka.

Yawe tay əki dolgoy aket ɗiy nani

² Mənokum ɗiy pakə, məprəma; dələv də an dəknahuk pak agəɗ maɗɗula! Yawe Maŋgəlva miziwe narban an kəɗɗaŋ hã səddəv gəla nan salala.

³ Vi Yawe yaŋ əgilye sə təki nani tay əprikeni, tay əzban ədaw də disiŋ ki dəlvafuŋ.

⁴ Mossorgoɗe gugriɗ tay əlyuɓoŋ ammba təlni walaŋɗe tay əpɗakaŋ va timbe akoffo va iŋkile darɓəzlaŋ səka mossorgo metiŋ.

⁵ As pak vi əɓoŋ net kirtin Yakob, gəm mambray net mə Israyelɗe yi Əɓoŋ na Yakob van mi di? Samari yi ɓa sa? Naway dəkdah Yuda addəvit gəleɗe-nettuyeŋge di? Yerusalem yi ɓa sa?

⁶ Wanəkkpaŋgan Samari va kiməskiya va muyã nampa megezlembirkeɗi; wanəɗɗa gərmeŋge nan dəderzeheŋgin də kakara addəv walaŋ, gabban wawəl appaka.

⁷ Zəgeɗkameŋgilveɗ nan pak wakrapaŋgə, zəgeɗ en məpsit pak kazgeti akoffo; wanəreygit zəgakamaŋgəlva nan pakə, vi akkelet zəgeɗis pak na də wərəh na polkoyo nani yi, wakkpaŋgaŋ ərəh na polkoyo.

Tatwãh tay ərəh Yerusalem

⁸ Vini nədaɓuh maw gəm nədanɗəsa, nədadaw təlu mekeleŋ gəm zu mekeleŋ. Va waway, nədaɓuh mawa. Va herkeseŋ nədahəm na gəlabaya.

⁹ Vi huwa nan anzaɗ na ɓa, anzlərgənək zən hã a Yuda arəŋgənək maddambet ɗiy nawa agapək a Yerusalem.

¹⁰ Kəpelin alabaras a Gat ɓa, kəhəmaŋ ɓa. Nəputukuluk afuŋ a Bet-Le'afra.

¹¹ Ɗiy na Safir, məddoŋgu, zukum mekeleŋ gəm net wili. Ɗiy na Sa'anan agilyoŋ na ɓa. Tay əɓuhnən met a walaŋgəla na Bet-Essel, əbbah nan pak wagəm səzokum.

¹² Ɗiy na Marot tatɗaŋ kpo'kpo' ammba ənziya neneke. Vi tatwãh aprikik səza Yawe a maddamba Yerusalem.

¹³ Ɗiy na Lakis, mətok mawteɗ ammbet pilseŋge nokum. Vi siskey suwer mambray na Yerusalem, vi anokda mərəh əɓoŋ na Israyel.

¹⁴ Vini kana, muɗak dit ɗiy na Moreset-Gat. Gəleɗe na Akzib, zəgeɗ nawmbəɗet milyeŋge na Israyeləŋ.

¹⁵ Ɗiy na Maresa, nokum van wanəki ɗəf nawmõhkum. Gagdak na Israyel wambat əɗam a bətəŋ a Adullam.

¹⁶ Məfiw kiykum, məfaɗ kiykum, aka betemit kirtukum məs kəŋglaŋgə, məfaɗ kiykum dəsangən vorzloho va na mogdoku, vi tay əsimgitin ɓa' səzoko.