Matiye 8 - Bible en Guidar

Yesu tay əmbəlgən məskokolo

¹ Adan Yesu adawpirken səka mossorgo, ɗiy diyɗa azbanənka.

² Yaŋ məskokolo azar azani appu' aban dawnəh na: Daya, an kətafəka a kəɓap əmbəlguwa.

³ Yesu atələk vani, arəŋgəni, aɓsən na: Nətafəka, ambələ. Məskokolo ambələk go'ləŋgə.

⁴ Yaŋ Yesu aɓsən na: Awle: Kədawnah sən ɗəf ɓa, is zuk nok dok ərban zuk aza məsdəlva, aɗɗa əvəl an Moyis aɗi wən nani, vi karban sit na kəmbəlka.

Yesu tay əmbəlgən gawla na daya net məzəlpaŋ mə Rom

⁵ Səza Yesu atoŋ a Kafarnahum, daya net məzəlpaŋ mə Rom azarək azani, akkamanəka.

⁶ Aɓsən na: Daya, gawla naw tay ɗuffo eŋgil də gbəgba'a, aɓruko, tay əzəmsahã diyɗa.

⁷ Yesu aɓsən na: Wanəmbat kawmbəlgəni.

⁸ Daya net məzəlpaŋ nak amna: Daya nawa, nəgap kətoŋgən a nawda ɓa. Apəl əpel taka kaka' gawla naw wambələ.

⁹ Vi naw ammba təl ɗəf gagdak nəsawa, məzəlpaŋ tam tahəŋ ammba təlwa. An nənah sənək aŋka: Doko, ndən əmbata; sən maɓɓan na: Ade, ndən əzzani; sən balam nawa: Aɗɗa vana, ndən əɗɗani.

¹⁰ Adan Yesu aprəm əpel nani, aggətka, yaŋ aɓsit məzəzbanən na: Gesiŋ nədawnah sukum: Nərah ətaf metiŋgin vaŋ aza ɗəf na Israyel ɓa.

¹¹ In tat ənah sukum: Ɗiy diyɗa wazzoŋ səmmba pay nampum gəm səmmba pay na moskoyo, wazəmaŋ də Abraham, Isak gəm Yakob addəv məlĩ na disiŋ.

¹² Ya en nawtoŋgoŋ məlĩ nan kəta dərəŋgə, kazgeti ara guzli appaka, adaki əhəm gəm əmpəran slay ɗəf asani.

¹³ Yesu aɓsən daya net məzəlpa nak na: Dok eŋgili, dəgəɗ suk va kətafa. Balam nan ambələk aka payəska.

Yesu tay əmbəlgit məs gbəgbaɗe diyɗa

¹⁴ Səza Yesu atoŋ ana Piyer da, awlətək atən tat ɗuffo də gamba,

¹⁵ arəŋgətək aza vata, gamba appatəka, ndət ləŋ le' təŋ əgəɗ sən wəza.

¹⁶ Adan moskoy agəɗə, akiyaŋ sənənək ɗiy mitemit diyɗa. Arɓihik ətemɗe səket də wəpele, ambəlgitik məs gbəgbaɗe pakə.

¹⁷ Aspak vi kaknahan an məskəleŋ Isaya anah dawnəh na: Ndəni dənde əddakɗe namə, asletik gbəgba' namə.

Ɗiy tay əŋglaŋ kazban Yesu

¹⁸ Adan Yesu awle ɗiy diyɗa, kiyən karkarə, aɗi wən nan sit gewleɗ nan nawmbat dəgar ki pehe.

¹⁹ Mərbə-mahenziŋ azar azani amna: Mərbəzəga, wanəzbok a təki kədawmbat pakə.

²⁰ Yesu aɓsən na: Balwayɗe tahəŋ dit vovɗe, biŋgeɗ tahəŋ dit gəleɗe. Ya Wətən Ɗəf na, tay də təki nawvoŋ naffeten zən ɓa.

²¹ Taka səret gewleɗ nan amna: Daya apəl su tive, ndaw əndək əbba tagay.

²² Yesu aɓsən na: Azbawa appet ɗiy mimtit dəndiknin mimtit neti.

Yesu tay əɓitgit barkataŋ

²³ Yaŋ Yesu atoŋ addəv bəlay, gewleɗ nan azbanənka.

²⁴ Barkataŋɗe asilyoŋguk gədak aka pehe hã vavolumɗe akay əsərətən bəlay. Yesu tay əleŋge.

²⁵ Gewleɗ nan azzoŋguk azani, afɗahanənka, aɓsənən na: Daya akõhgəmə mənam tat əmta.

²⁶ Yaŋ aɓsit na: Vimi kədawgeslne'eŋ di? Munokum məs ətaf nokum siɗikke. Yaŋ asili, ahayẽt barkataŋɗe də pehe, təki agəɗ sləɓəkə.

²⁷ Ɗiy aggətaŋgək diyɗa, ənahaŋ na: Aŋ ɗəf mi aŋ di mãy barkataŋɗe də pehe pak əprəmnən manəŋ di?

Yesu tay əmbəlgit ɗiy mətemit sula

²⁸ Səza agap dəgar ki pehe aka dələv net mə Gadarɗe, ɗiy mətemit sula agilyoŋguk səddivit magamasɗe, azzoŋ ələm səni. Nawgeslne sitiŋ diyɗa, hã ɗəf tay dədawɓap ətoŋ dəka tive vanəs ɓa.

²⁹ Yaŋ aɗiyaŋ geŋgere aɓɗaŋ na: Mi kəŋgəl azam di is Wətən Maŋgəlva? Kədek aŋ vi kawzəmgəm sahã dafsən sa?

³⁰ Ngaɓa net vedemɗe ɗakɗak tay ɓuhho səzeti, tay ətaɗa.

³¹ Tuyeŋɗe nek akkamanəni, aɓɗaŋ na: An mok aka ərɓəhmə, aslənəm aka ngaɓa net vedemɗe ndaka.

³² Yaŋ anah sit na: Məddoŋgu. Səza agilyoŋ səketi, addoŋguk aket vedemɗe. Yaŋ ngaɓa bayman arɓəsl səba mabuzgum məɓayən a pehe, amtaŋ aret iŋkile.

³³ Məzuteɗeŋɗe anzoŋko, ambataŋ a walaŋgəla-metiŋ, anahən an məs dəgəɗ pakə, gəm an məs dəgəɗ aket ɗiy mətemit neki.

³⁴ Yaŋ ɗiy na walaŋgəla-metiŋ pak agulyoŋ vi kalma də Yesu. Adan awlanəni, akkamanənək dəzargən səka dələv neti.