Matiye 5 - Bible en Guidar

Yesu tay ərba wən na Maŋgəlva aka mossorgo metiŋ

¹ Adan Yesu awla vanday net ɗiyi, ndən peŋ aka mossorgo metiŋ, asani, gewleɗ nan azzoŋ azani,

² agəm əpel ərban sit wən də wənah na:

Ənnek an gesiŋ

³ Əzaɓ aket en dəsənən zit na məs saheŋɗeŋ aba Maŋgəlva, vi wassoŋ də Maŋgəlva addəv məlĩ nani.

⁴ Əzaɓ aket məzəmaŋ sahã, vi Maŋgəlva waffeten makreti.

⁵ Əzaɓ aket məs mekret zayə, vi Maŋgəlva wapsit dələv va anahə.

⁶ Əzaɓ aket en dəssoŋ də mãy gəm də meme nanziya təstəsə, vi net Maŋgəlva wabeti.

⁷ Əzaɓ aket mulaŋ sahã aket ɗiyi, vi Maŋgəlva wawəl sahã aketi.

⁸ Əzaɓ aket məs mekret barə, vi wawlanən Maŋgəlva.

⁹ Əzaɓ aket məsleretin ɗiyi, vi wassoŋ kirtin Maŋgəlva.

¹⁰ Əzaɓ aket məsər meti sən təstəs neti, vi məlĩ na Maŋgəlva neti.

¹¹ Əzaɓ akokum, an ɗiy tay ərokuməni, tay əsərnən mokum gəm tay əpeleŋ mbərayən zev awandi pak akokum aka wən nawa.

¹² Mənneken zukum, məpepɗeki, vi ərəh nokum tay a disiŋ diyɗa vaski asərnən met məskəleŋɗe en daabəŋ kikum.

Bətuwa gəm əkeɗeɗe'e

¹³ Nokum, bətuw na dəlvafuŋ kənanaŋgə, ya an bətuw azanək lelem nani, kallemen də mi di? Tay an adawtər əmpa ɓa abbər əfukun a gizbe ka ɗiy dəndapanəngən ɓa.

¹⁴ Nokum, əkeɗeɗe nagge kənanaŋgə, walaŋgəla-metiŋ naka mossorgo metiŋ aɗam na ɓa.

¹⁵ Kasɗani lalam vi kawɗup kasli akan ɓa, aka təki nawɗi lalam adawɗinən dərəŋ vi dəkasekgin ɗiy neŋgil pakə.

¹⁶ Əkasak nokum dəwiɓ vas abet ɗiyi, vi duletingin wəzeɗe mogget nokum dəgagdakanəngən Afukum an na disiŋ.

Əyak aka mahenziŋ

¹⁷ Kədaɗɗumoŋ na nədek vi kawpəl mahenziŋ na Moyis awaniɓa wəpel net məskəleŋɗe ɓa. Nəde vi kawpələn ɓa, vi kaknahan nəde dərəŋgə.

¹⁸ Gesiŋ nədawnah sukum: Va disiŋ də dəlvafuŋ adanziyaŋ pakə, ma masin muzliyəkə awaniɓa muzliyək na mahenziŋ kazgati a gizbe ɓa, hã gap əgrak net zəgeɗ pakə.

¹⁹ Ɗəf an dəzelen mahenziŋ akən muzliyəkə, awaniɓa arban sit ɗiy dəɗɗaŋgən vaska, nan wasan muzliya addəv məlĩ na Maŋgəlva. Ya ɗəf an dərma wən nani, arbanək sit ɗiy dərmanəngən wən nan vaska, nan wasan ɗəf metiŋgin addəv məlĩ na Maŋgəlva.

²⁰ Gesiŋ nədawnah sukum: An təstəs nokum dəday ki net mərbaŋ-mahenziŋ dit Farisaɗe ɓa, kətoŋgoŋ na addəv məlĩ na Maŋgəlva ɓa.

Əyak aka wən na ədagədəva

²¹ Kəprəmənək mənahi na: Kədawbay gəbay ɓa, ɗəf dəbay ɗəf pak kawtawi wən akani.

²² Ya naw in tat ənah sukum na: Ɗəf pak məs dədə gədəv aka məlmən na, kawtawi wən akani. Ɗəf pak dənah sən məlmən na: Zəga ɗəɗar kənani na, kawkani abet ɗiy gugriɗ na dəlva. Ɗəf pak dənah sən məlmən na: Dərwa kənani na, agapək nawgulun addəv offo məs amta ɓa.

²³ An kəkak əvəl nok a matuya, yaŋ kəɗɗumon adak na məlmuk tay də wən də isi na,

²⁴ appan əvəl nok van aba matuya adaka, dok tagay əsler də məlmuko, asna kəmilgən əpsən əvəl noko.

²⁵ Asler də ɗəf məs dəkə dolgoy akok tak is tat aka tive dəndəni, vi adappok ava mətawwəna, mətawwən tamə kawkuk ava məlawgəlom kazgok a fərsəna ɓa.

²⁶ Gesiŋ in tat ənah suko: Kəgil na sədak an kəfaɗ dəmən nakokəŋ gərak ɓa ɓa.

Əyak aka wən na əku a gizbe

²⁷ Kəprəmənək mənahi na: Kədawku a gizbe ɓa.

²⁸ Ya naw in tat ənah sukum: Ɗəf pak dulət gulku də əsimta, agəɗək əku a gizbe a makran dəndən səkay.

²⁹ An horok dəzəŋ dədaskotguko, akdəh azgan faraɗa səzoko. Gesiŋ dəɗah suk zəga taka səza gəɓa zuk dəzə ki zuk də wən nan əmbat addəv offo məs amta ɓa.

³⁰ Ya an vok dəzəŋ dədaskotguko, atawa azgan faraɗa səzoko, gesiŋ dəɗah suk zəga taka səza gəɓa zuk dəzə ki zuk də wən nan əmbat addəv offo məs amta ɓa.

Əyak aka wən na uɗak dət gulku

³¹ Mənahi na: Ɗəf dədappat ɗak nani, dəpsət ɗerewel narban na appatəka.

³² Ya naw in tat ənah sukum: Ɗəf dəppat ɗak nani an aka wən na əku a gizbe yi ɓa ɓa, tay əkkpaŋgat məku a gizbe, an ɗəf agəmək guluk məppata məkuh a gizbey.

Əya aka wən na əswaya

³³ Kəprəmənək mənahi əmpa sit dəhiŋgiɗkum na: Kədanzlu an kiynan mok akan ɓa, aknahan an kiynan də mok aba Daya.

³⁴ Ya naw in tat ənah sukum: Kədaswayaŋ kpak ɓa, də disiŋ ɓa vi mazaŋga na məlĩ Maŋgəlva yi.

³⁵ Də dəlvafuŋ ɓa, vi təki nawɗi təlni, də Yerusalem ɓa, vi walaŋgəla-metiŋ na məlĩ metiŋgi.

³⁶ Kədasway də kiyuk ɓa'e, vi kəɓap na əkkpaŋgan muhur tətaka səkan dəsangən babara awaniɓa titir ɓa.

³⁷ Əpel nokum dəsan na: Ha'aw ha'aw, awaniɓa awwo awwo, an dəday ki asna səza mbərayən ade.

Əyak aka wən na əmpəlkiya

³⁸ Kəprəmənək mənahi na: Hara ɗəfa a gəla hara ɗəfa, slay ɗəfa a gəla slay ɗəfa.

³⁹ Ya naw in tat ənah sukum na: Kədamndaganən mambray ɓa. An ɗəf avərkuk a tapaslayuk dəzəŋ, akkpaŋgan sən zlaɓay.

⁴⁰ An ɗəf akək dolgoy akok vi kawtafət lukutuk muzliyək noko, appan dəgəm lukut məkso'o noko.

⁴¹ An ɗəf agəɗ sukuk vavyak kədawgən zəga na kilometər taka, adaw gap kilometər sula dəndəni.

⁴² An ɗəf aŋgələk zəga avoko, apsəni, an ɗəf assohuk dəmən kəlɓoŋ ɓa.

Əŋgliw məzuzelɗe

⁴³ Kəprəmənək mənahi na: Aŋglu meggoko azel məzuzelko.

⁴⁴ Ya naw in tat ənah sukum na: Miŋgliw məzuzelkumuni, məkkam viyit məzusərnən mokum.

⁴⁵ Vi kəssoŋgən kirtin Afukum na disiŋ. Tay əgilgin pay aket məs mambrayɗe dit məɗɗaŋ moggoni, tay əzi buwən viyit məɗɗaŋ təstəs dit məɗɗaŋ an dəslə ɓa pakə.

⁴⁶ Gesiŋ an kəŋgluwinik məzəŋglukumən kaka'ə, əfaɗ mi kədawrahaŋ di? Məkkalaŋ nzalaka dayday tay əɗɗaŋ vaska.

⁴⁷ An milmiŋgiɗkum kaka kədasɗaŋ na, an tay va ndən ɓa kədaɗɗaŋ sa? Ɗiy-ɗar dayday tay əɗɗaŋ vaska.

⁴⁸ Məsoŋ təstəs gərak va Afukum na disiŋ, nan təstəsi gərakə.