Matiye 4 - Bible en Guidar

Wərak na Yesu

¹ Yaŋ Zeŋgile Salala akak Yesu a kapta-muyã vi Satan dərakangəni.

² Dərɓaga agəɗ meme əsɓəta kaklaw poɗo gəm dəfəɗ kaklaw poɗo, may armaka.

³ Satan azarək azani, aɓsən na: An Wət Maŋgəlva kənani anah sit girmeŋgeŋki dəkkpaŋgaŋ zəga nawzəma.

⁴ Yaŋ Yesu azlani, amna, Məverni na: Ɗəf asan na madaran vi way kaka ɓa, abbər də wəpel an dədawgilyen səma Maŋgəlva pak dərəŋgə.

⁵ Yaŋ Satan agəma, aka a walaŋgəla-metiŋ salala, aɗiy aka gəla na Maŋgəlva.

⁶ Aɓsən na: An Wətən Maŋgəlva kənan na, azlah saŋ hã afuŋ, vi məverni na: Maŋgəlva waɗi wən nan sit maslayɗe nan viko, dəkaslkungən aka veti, vi tuluk adawtaŋgbãy aza gərəm ɓa.

⁷ Yesu aɗiyman sən na: Məverni na: Kədawrakan Maŋgəlva Daya nok ɓa.

⁸ Yaŋ Satan agəm əmpa aka mossorgo metiŋ məɓayən diyɗa, arbet sin milyeŋge na dələv pak də gagdak neti.

⁹ Aɓsən na: Anipsuk pakəski an kukdukuk takkprok kappu' abawa.

¹⁰ Yaŋ Yesu aɓsən na: Azar səzawa Satan. Məverni gesiŋ na: Daya Maŋgəlva noki yi kədawgeslne' səni, anan kədawgəɗ sən wəza.

¹¹ Ndəni Satan appan Yesu, yaŋ maslayɗe azzoŋ azani aɗɗaŋ sənən wəza.

Wəza na Yesu a waleŋgit ɗiy a Galile ( 4:12—18:35 ) Yesu atəŋ wəza nan a Galile

¹² Səza Yesu aprəm na, məzgani Yohanna a fərsəna, asilke, ambatka aka dələv na Galile.

¹³ Adderik sə Nazaret, ade asan a Kafarnahum, ama pehe, aket dəlveŋge na Zabulon də Neftali.

¹⁴ Vi kaknahan zəga an məskəleŋ Isaya anah dawnəh na:

¹⁵ Dələv na Zabulon də dələv na Neftali, aka tive na pehe dəgar ki Yurdeŋ də Galile dələv net ɗiy-ɗarə,

¹⁶ ɗiy dəssoŋ ara guzliyo awlanənək əkeɗeɗe metiŋgini. Ya en dəssoŋ aka kivadələv addəv guzli na əmta, əkeɗeɗe wakekeɓe aketi.

¹⁷ Təŋ sissiŋgi Yesu atəŋ ətəlma gəm ənah na: Məkkpaŋgan ədaw nokum vi məlĩ na Maŋgəlva go'oy.

Yesu tay əye mərmaŋ kilif poɗo

¹⁸ Adan adabal dəma pehe na Galile, awlek ɗiy də məlma zit sula. Simoŋ məs adawyaŋ na Piyer də Andre an məlməni tay əzganən zəva aret iŋkile na pehe, vi mərmaŋ kilfiŋ gesiŋ.

¹⁹ Yaŋ aɓsit na: Məzbawa, wanəkkpaŋgokum mərmaŋ ɗiyi.

²⁰ Yaŋ appetin zəveɗe net ləŋ azbanəni.

²¹ Yaŋ ambat zarra sədaka, awlek ɗiy də məlma zit sula meɓɓeti, Yakob wətən Zebede, də Yohanna məlməni tahəŋ addəv bəlay də Zebede afit əzeɓetin zəveɗe neti. Yaŋ aye.

²² Yaŋ appanən bəlay də afit ləŋ azbanəni.

Yesu Tay əyeget ɗiy gəm əmbəlgiti

²³ Yaŋ adabbal a Galile də wən nani, əyeget ɗiy addəv gəla nakkam net mə Yudeɗi, ətəlma na Wən Nenek na məlĩ na Maŋgəlva gəm ənzeɗ gbəgbaɗe pak dit ɗiy məmbər sit pakə.

²⁴ Alabara nan atərayək aka dələv na Siri pakə, akisənənək məzuzəmaŋ sahã də gbəgba' temtem gəm məs gbəgbaɗe məɗeŋgreŋ, ɗiy mətemit məs tuyeŋge aketi gəm ɗiy məlleɓti. Ambəlgitike.

²⁵ Ɗəf titir diyɗa azbanəka, en dəzzoŋ sə Galile, səka dələv net Walaŋ-gəleɗe-kəlaw, sə Yerusalem, sə Yude, gəm sə dəgar ki Yurdeŋ.