Matiye 3 - Bible en Guidar

Wəza na Yohanna məgəɗ Baptem ( 3:1-12 ) Ərbawən na Yohanna məgəɗ baptem

¹ Pay nani Yohanna məgəɗ baptem agilik ərbawən a kapta-muyã na Yude.

² Amna: Məkkpaŋgan ədaw nokum vi məlĩ na Maŋgəlva go'oy.

³ Ndəni an məskəleŋ Isaya apel wən nani, amna: Ɗəf tay wənzla vamvəl awra: Məzaɓan tive na Daya, məɗɗa sən tiveɗ dəsoŋgən sarara.

⁴ Yohanna van tay də lukut məɗɗan də denɗeke na zlogomo gəm aynanək dədakən də kətu, zəga nawzəm nan na heyɗeŋɗe gəm amama nawra.

⁵ Ndəni ɗiy sə Yerusalem, səka dələv na Yude may səka dələv na maŋgava məlpa na Yurdeŋ pak azzoŋguk azani.

⁶ Arahaŋgək baptem səvan a məlpa Yurdeŋ, arbanənək mambray neti.

⁷ Adan awle ɗiy diyɗa səret Farisaɗe dit Sadukiɗe əzzoŋ azan vi kawrəh baptem, aɓsit na: Kirtit barwayɗe nawa dərban sukum ənza səma ədagədəv an dədazzan di?

⁸ Məgəɗ wəza an narban na kəɗiyaŋgək marava:

⁹ Kədaɗɗumoŋ a mokrokum na: Dəhiŋgiɗin Abraham mənani ɓa. Naw in tat ənah sukum, Maŋgəlva tay də gbogboŋ nakkpeŋget kuneŋgeŋ ka kirtin Abraham.

¹⁰ Məɗiyni ma zlimbe aket suwerit wəleŋɗe səkay, wəlaŋga məs awa moggon ɓa pak kawbəlni, kawsapən aka offo.

¹¹ Naw in tat əgəɗ sukum baptem dit iŋkile vi kəɗiyaŋ marava. Ɗəf an nazan dərɓagawa də gagdaki day kiwa, nəgap nakgbuk hensek səka tələn ɓa, nan waɗɗa sukum baptem də Zeŋgile Salala gəm də offo.

¹² Tekpesle nawseŋger zəga tay avani, wafaɗ kelle nani. Wakkalan hay nan a maha, ya keselme na, wazle də offo an məza amta ɓa.

Baptem gəm ərak na Yesu ( 3:13—4:11 ) Wəɗɗa Baptem sən Yesu

¹³ Yaŋ Yesu asil səka dələv na Galile, ade a məlpa na Yurdeŋ aza Yohanna, vi dəgəɗ səngən baptem.

¹⁴ Yohanna dəŋgəm sən ɓa, aɓsən na: Naw nəŋgəl dərəŋ na, kəgəɗ suwəgən baptem yaŋ is əmpa pay azaw sa?

¹⁵ Yesu azlani, aɓsən na: Apan vaska, vi aslək məknahangən an dəslə pakə. Yaŋ Yohanna aŋgeri.

¹⁶ Səza Yesu arah baptem, agil səret iŋkile ləŋgə, disiŋ akolko, awlak Əmpəs na Maŋgəlva əpriken va bəŋga na maha əzzan akani.

¹⁷ Yaŋ əpel ade sə disiŋ amna: Aŋki wətu an nəŋgələ, in tat ənneken zu dəndən sawɓa.