Matiye 2 - Bible en Guidar

Məsənaŋ zəga tahəŋ əzza ula Yesu

¹ Muwani Yesu a Bet-Lehem aka dələv na Yude, gala Herodə asan aka məlyã. Dərɓaga muwani, məsənaŋ zəga azzoŋguk səmmba pay nampum a Yerusalem.

² Assohoŋ na: Aŋgay wiyən muwan nawsan məlĩ net mə Yudeɗiŋ di? Mulak ngərzla nan ambra pay nampum vini məde kawgagdakani.

³ Adan məlĩ Herodə aprəm vaska, attapək dit ɗiy na Yerusalem pakə.

⁴ Yaŋ akkelet deyeɗe net məsdəlveŋge dit mərbaŋ-mahenziŋ pakə, attokonək met na, aŋgay adawanən Kristu di?

⁵ Azlan sənən na: A Bet-Lehem a Yude. Vaski məskəleŋ avere.

⁶ Is Bet-Lehem dələv na Yuda məgəsuk kənan a walaŋgit walagəleɗe gugriɗ mbrit na Yuda ɓa: Vi səzoki məlĩ adawgilyeni məs nawtaɗ ɗiy naw mə Israyel.

⁷ Yaŋ Herodə aye məsənaŋ zəga mahaɗama yaŋ aprəman sənən pay məs ngərzla arbə təstəsə.

⁸ Aslinik a Bet-Lehem, aɓsit na, mədoŋ məkayan gəla wiyən van lewlewi, an kərəhnənka, Kənah suwəngən ndawgən əgagdakan tamə.

⁹ Səza aprəmən an məlĩ anahə, ambataŋka. Yaŋ ngərzla məs awlaŋ ammba pay nampum nak adaw abeti, ade iziw aka təki məs wiyən asani.

¹⁰ Səza awlanən ngərzla, annekenənək zit də ənnek diyɗa.

¹¹ Atoŋgoŋguk eŋgili, awlanənək wiyna dət man, Miryam. Agdukoŋguk afuŋ agagdakanənka. Yaŋ apələn ma gabal net apsənənək zəga, meleŋge də gaŋgəlnya, gəm tursan nani.

¹² Yaŋ Maŋgəlva anah sit də wisine adawmilyoŋ kəlaza Herodə ɓa, amndoŋguk aka dələv net dəka tive mbərən.

Əsmaɗ əmbat a Eziptə

¹³ Səza məsənaŋ zəga ambataŋgə, maslay na Daya arbanək zən aza Yosef addəv əssine aɓsən na: Asili, aslan wiyən dət mani dok a Eziptə, asok adak hã gap nənah sukgəni. Vi Herodə wakayan wiyən kawbayən.

¹⁴ Yosef afɗahka aslanək wiyən dət mani də dəfɗa ambataŋgək a Eziptə.

¹⁵ Asanək adak hã gap Herodə zamə. Vasna vi kaknahan an Daya anah də ma məskəleŋ nani, sə Eziptə nəya wətuwa.

Wəbay kirin məmeɗeŋɗe

¹⁶ Adan Herodə awla na məsənaŋ zəga asmayanənka, gədəvən adək diyɗa, yaŋ aslən əzet kirin mezeŋleket sə Bet-Lehem pak gəm səket meŋge nan pakə, təŋ səka wəzva sula hã məs dəgapaŋ ɓa pakə, va an məs aprəm səmet məsənaŋ zəga va pay awlanən ngərzla nan egili.

¹⁷ Vaski zəga an məskəleŋ Yeremiya apel akan aknahə.

¹⁸ Məprəmni vamvəl a Rama, əhəma də əɓuhma tay diyɗa, Rakel tat əhəm ammbet kirtita, təɓoŋguk dawɓətgət aka wən net kirtita vi tahəŋ ɓa.

Əmilyẽ sə Eziptə

¹⁹ Adan Herodə amtə, maslay na Daya arbanək zən aza Yosef addəv əssine a Eziptə.

²⁰ Aɓsən na: Asili, aslan wiyən dət mani, amndok aka dələv na Israyel vi məzukayanən wiyən kawbayən amtaŋka.

²¹ Asilke agəmək wiyən dət mani amilyoŋguk aka dələv na Israyel.

²² Adan aprəm na Arkelawus dəsan məlĩ a Yude agəla Herodə afəni, geslne armak dawsan adaka, yaŋ Daya anah sən addəv əssine, ammbat aka dələv na Galile.

²³ Ambatka, asanək a walaŋgəla məs adawyaŋ na Nazaret. Vi kaknahan an məskəleŋɗe anahaŋ na: Kawyani na mə Nazaret.